อีบึณ อี มึห อางยาน, อัน บอ นับ ดี ยอด แมน อึณโฮม อัน. อี มูห อีบึณ ตู หล็อก, อัน ยี ปยาต แตห อึณ ลึร.

2 ดูอี อี โบง นา มูห นา หมาน, อัน บอ โรวเซ เฌาพรา. ดูอี อี โบง นา โฆะ แฆะ, อัน ฌ็อง เฌาพรา.

3 โฆรห ปี กาลาง ดูอี รึร, อึณ ดี วี แตห อัน กาดูห มัห. โฆรห ปี กาลาง เฆ อี มึห อางยาน, อึณ ยี วี แบน อี ฆ็อง อี แร โดว เฆ.

4 เซ แม ตู มึห มัก, กาลาต โฮม อัน ดี ลืม ซีคยา. เซ แม ยี ตา แฮณ มัก อาโล็ง, ฆรัว โหงว แม ดี โนะ.

5 ดูอี แบน ซักเซ อี ปึอน หณึม, อัน บอ กาลาง โฆรห หมาน เซเซ. เซ อึณ ยี มึห อี ตู ปึอน หณึม, อัน ดี กาลาง มี โฆรห กาโลว.

6 อาเซ ปีคึก น็อห อัน, อัน ปี บอ เหรต อางยาน มืร, อัน ตู ปึอน. เซ อี ยี นับ ปี ปาย แบน โมยว แบน โมยว, อัน บอ หงึย นับ ปอ อึณ ปัว.

7 แตห แม กอย กาฆ็อห ดี ดูอี รึร. โคว, อาว มึห มาเซ ปี ดี โลว เฮน ดี อัน.

8 อางยาน ดูอี หล็อก แตห อัน นับ ปี โบง อัน. ดูอี รึร ยี รึร โกบ โดบ อัน อี ตู หมาน.

9 ดูอี ฮาย นับ ดี กาณัห ดี หมาบ ปี โบง อัน. เฌาพรา ยี อึง ดูอี อี โบง นา หมาน.^a

10 แม ปี บอ โคย, แม ปี บอ กลึร, อึณ มูห มี อาดา แม อู วี. แม มืร ตู ปึอน กาซาง กาย็อห ดัว ดี อี เฮา.

11 กาง เฆ ดูอี ฮาย, อึณ ดี บอ เกห ลึร. ทึบ เฆ ดูอี บอด, ดูอี หมึอม ยี กอย ซีคยา.

12 เซ แม โดบ อึณเตณ ปี ทาง แม แฮะ หมาน, อึณ ดี แตห แม ยัม.

13 ดูอี ปี บอ โคย ปี บอ กาณัห มืร, แคง น็อห อัน, อัน ยี นับ ดี วี กลึร, นับ ดี วี เหงา. เซ น็อห โคย น็อห ดาคึย ฮี โตต, อึณ มึห มี ดูก มี หณาบ ดี น็อห.

14 ดูอี น็อห กาลีง กาแล, อัน ดี บอ ปึอน รูห ปี โบง อัน, แตห อึณ เบระ ดอน โมยว. บอ ดูอี บอด ดูอี หมึอม ดี ยึร อาฆยึร ปี โบง อัน.

15 ดูอี รึร บอ หณึม โตต แคะ ปี กาลาง อี เฮา. ดูอี อี หล็อก, อัน บอ ฮาว นา เหมา, อัน ยี นับ ดี ซาดีก.

16 ดูอี อี มึห อางยาน, อัน นับ ดี ซาดีก บอ นับ ดี วัห นา จีจีว. ดูอี รึร ยี ตู นับ ดี ซาดีก. อัน บอ ยัะ ดี โบง.

17 ดูอี กาฮ็อห, อัน บอ โบง อี ตู มึห ดีโคว. อาเซ ปี หล็อก ดี อี, อัน แบน ปี ฌ็อง อี.

18 ปี โบง ดูอี ตู หล็อก, แฮะ วี แบน คาฆูน ดี อัน. ดูอี อี มึห อางยาน ยี นับ แบน โมยว แบน โมยว, แตห อึณ ปี อัน แฮะ ชึบ มังฆึม.

19 ดูอี ตู หมึอม, อัน ดี บอ โลว โฆม กรึบ ดูอี บอด ดูอี หมึอม. ดูอี ฮาย ดี บอ โลว มูด ฆึบ บาง มาโลห ดูอี หมึอม ตี.

20 ดูอี ฆีน ดูอี เอต, อาว มึห อาเซ อี อึง. ฆึก อัน อี กอย กาตัด อัน มืร, ตู โลว ตู อึง อัน. ดูอี ครัม ยี มึห ฆึก กืน กาเซา.

21 อาเซ ลูกตาย ดูอี ฆีน, ดูอี เอต อี กอย กาตัด อัน, อัน โบง แตห อึณ แบน หมาบ ดี อัน. อาเซ ยี กาเว ดูอี ฆีน, ดูอี เอต, อัน แฮะ ดาคึย.

22 เซ แม คราม ดี โบง นา บอด, อี เฮา ดี ร็อก แม บอ ฆัม แม, ตู ปีว แม ดอ เหมา. มาแล, เซ แม คราม ดี โบง นา ตู หมึอม, แม แฮะ ฮอต กาลึบ.

23 ฆาน ปี ออน แม ดี โบง ดอน โมยว, อึณ ดี แบน อาฆยึร ดี แม. เซ แม ยี ออน กามวน ดี อี เฮา, แม ดี พลาน, แม ดี เอต.

24 โกรวกราม ดูอี อี มึห อางยาน, อึณ ดี แตห อี โรวเซ อัน, แตห อึณ ปี อัน แฮะ ชึบ มังฆึม. นา ตู หมึอม ปี โบง เฆ ดูอี รึร, อึณ ดี แว ตู หมึอม หลึอม บรีม.

25 อาเซ แบน ซักเซ อี เฮา, เซ อัน กาลาง ซืร ซืร หมาน หมาน, อึณ บอ คยอด อาซาก อี. เซ อัน ยี กาโลว, กาลาง ตู หมาน, อัน กาย็อง อี เฮา.

26 อาเซ โรวเซ เฌาพรา, อัน ดี บอ กอย ซีคยา. อึณ ปี บอ อัน บอ ฆอน อัน แฮะ มึห โดง ดี ลึบ เครียง.

27 ปี โรวเซ เฌาพรา, อึณ บอ ปี อึม โตห อี ดัว อาซาก. อึณ บอ นับ ดี จอย แตห อี ลอด ยัม.

28 เซ คูนดีคัม อึบ ดูอี กืน, อึณ ดี แตห อัน มึห อาพูง ตาง. เซ ดา กาณา ยี ตู มึห ดูอี แคง มาน มืง อัน, อัน ตู มึห ดีโคว.

29 ดูอี อี กอย หนีม, ตู หงึย รู, อัน มูห ดูอี อี มึห อางยาน. ดูอี อี กาฮ็อห ยี บยัะ แคะ รึร อัน.

30 น็อห หนีม น็อห ฌอนโฌม, อึณ ดี แตห โดว โบ็ง แม โปลม คัะ. น็อห ซี ซีแฆะ ซี ปยาต อี เฮา, อึณ ดี แตห กาอาง แม ราม.

31 เซ แม คาหนาบ ดูอี ฆีน, ดูอี พลาน, อึณ ปี แม ตู โรวเซ เฌาพรา อี พาน เบลห เฆ. เซ แม กาเว ดูอี ฆีน, ดูอี เอต, แฮะ ปี แม โรวเซ อัน เฌา.

32 ดูอี ฮาย ดี บอ เกห ชึม ดอ ฌัม อัน ดูก. อึณ ยี มูห ดูอี อี โบง นา ซืร นา หมาน, อัน ปี บอ แฮะ รีน ดี ยัม, อัน ยี มึห โดง ดี ปึอน บึง.

33 อางยาน กอย แคง น็อห ดูอี อี นับ ปี ปาย แบน โมยว แบน โมยว. อี กอย แคง น็อห ดูอี รึร, อึณ ยี ดี ลึห ซีคยา.

34 เซ ดา ตาง แคง มืง โบง นา มูห นา หมาน, อึณ บอ แตห ดูอี เฮา อืบ มยูก ดูอี บอ มาน บอ มืง. เซ เฆ ยี โบง หมาบ โบง นา ตู หมึอม, อึณ ดี แตห ดูอี บอ มาน บอ มืง ชึม ซาเร.

35 คูนดีคัม ดอน กาดัง บอ อึง แดเจณ อี มึห อางยาน. เซ แดเจณ อัน ยี โบง อี หมึอม ซาย, อึณ แตห คูนดีคัม รู ดี อัน.