โฆรห อึณจูะ อึณจัม บอ โฆรห งาม นับ ดี ฆ็อห แวน น็อห รู. โฆรห กาอัณ ยี แตห อี โทม แบน ดอซัะ.

2 โฆรห ปี กาลาง ดูอี อี มึห อางยาน, อึณ แตห ดูอี นับ ปี ปาย แบน โมยว แบน โมยว. อี มูห โฆรห ดูอี ตู หล็อก, อึณ แตห อี นับ แคะ รึร อัน.

3 เฌาพรา อี ยึร ดอน นา ดอน โปละ. อัน บอ ยอด แคะ ปี โบง เฆ อี หมึอม บอ อี ตู หมึอม.

4 โฆรห อี เหลา น็อห, อึณ ปี เฮ อี แตห อาซาก ดี อี. โฆรห อี ซีมา กาโลว, อึณ ดี ปยาต น็อห พึอม อี.

5 เซ แม วัห ปี มาโนว ฆูณ แม, แม แฮะ รึร. เซ แม ยี โทม ปี มาโนว อัน, แม ดี มึห อางยาน.

6 เฆ อี มึห น็อห ซืร น็อห หมาน, เฆ นับ ดี กาฌูะ อูน กืน โกรวกราม แคง กาง เฆ. ปี ปึอน เฆ ดูอี ฮาย, ยี แบน ดูก ดี เฆ.

7 ดูอี ฮาย ตู มาโนว แตห เอ นับ ปี ปาย แบน โมยว แบน โมยว. อึณ มูห ปี ดัว ดูอี อี มึห อางยาน.

8 ดอ ซาคึร ดูอี บอด ดูอี หมึอม, อึณ บอ ล็อะ น็อห เฌาพรา. อัน ยี ฌ็อง ปี หลู เฆ ดูอี ฮาย ดูอี มืก ดี อัน.

9 เฌาพรา บอ ฌ็อง ปี โบง เฆ ดูอี ฮาย. อัน ยี ร็อก เฆ อี โบง นา ซืร นา หมาน.

10 เซ แม โบง กาลึบ, โบง บลืง, แม ดี โลว คัม หมาบ กืน. เซ แม ตู ซี โทม ปี มาโนว อี เฮา, แม ดี ยัม.

11 มืง มารานัะ อี มูห มืง โดง ลึร โดง ชึม ตึอน, อึณ บอ ลึห ซีคยา ดี เฌาพรา. น็อห พึอม ดูอี, อึณ บอ แว ลึห ซีคยา ดี อัน หลึอม ตี.

12 ดูอี ปีคึก ตู ซี โทม ปี มาโนว อี เฮา. อัน มืร ตู ดึอม ดีหมอด อากยาม อางยาน ดี ดูอี อี มึห อางยาน.

13 ดอ มึห ดูอี น็อห โคย, เฆ บอ เอว. ดอ คัม เฆ ดูก, เฆ ยี กลึร บอ เหงา.

14 ดูอี อี มึห อางยาน หมึอม, อัน บอ ซี เฮน แตห อัน นับ แบน โมยว แบน โมยว. อี มูห ดูอี รึร, อัน บอ กอย ปีเยณ โกบ ตู นับ อัน มาเซ.

15 ดูอี ฆีน, ดูอี เอต, อึณ บอ หณาบ กาเซา ดี น็อห เฆ ดอน ซีแง. ดูอี อี มึห น็อห ดาคึย, เฆ ปี ดูอี อี ลึบ บลอย เซเซ.

16 เซ ดูอี ฆีน โรวเซ เฌาพรา, อึณ หมึอม หลึอม ดูอี ครัม, ยี มึห ดูก แคง น็อห.

17 ฮาบ เดา เงียน โดบ ดูอี อี ลาย ร็อก, อึณ บอ หมึอม หลึอม ฮาบ ยัง โดบ ดูอี อี ลาย ฌ็อง.

18 ดูอี กาฮ็อห อี หงึย รู, อัน บอ โบง แตห อี กาเอห กาแทณ. ดูอี น็อห เยน น็อห หนีม, อัน ยี โบง แตห ดูอี อี ลาย รู ลาย จาว วี เยน ดาคึย.

19 เซ แม กราน, แม ดี กาดูห ดูก หณาบ ดอน นา ดอน โปละ. เซ แม มึห น็อห ซืร น็อห หมาน, แม ดี ลอด อาเพ อาเร.

20 ฆอน อีมาย อี มึห อางยาน, อัน แตห น็อห ฆูณ อัน ดาคึย. ฆอน อีมาย อี รึร, อัน บอ ลูกตาย มา อัน.

21 ดูอี รึร, อัน บอ โบยว ดี โดบ อี ตู หมึอม. ดูอี อี มึห อางยาน หมึอม, อัน บอ โบง นา มูห นา หมาน.

22 เซ อาว มึห อี ดัว อากยาม อางยาน, ปี คราม อี ดี โบง, อึณ ดี ลึร ชึม. เซ อึณ ยี มึห ดูอี กืน, อี แตห อากยาม อางยาน, อึณ ดี บอ ออง บอ ปึอน.

23 เซ ดูอี แฮะ นับ ดี เวียะ ซีคยา โฆรห อี เฮา, อึณ แตห อัน ดาคึย. ปาย ตี, อึณ บอ หมึอม กาเซา เซ ดูอี นับ ดี กาลาง โฆรห อี กาอาบ กาลาง บอ กาลาง โฆรห ตี ดอ โลว กาลาง.

24 ดูอี อี มึห อางยาน, อัน ตู โดบ อึณเตณ อี โลง มืง มารานัะ. อัน โดบ อึณเตณ อี ดัว อาซาก, อี โฮะ นา แดง.

25 เฌาพรา ดี ย็อห แวน กาง เฆ อี มึห น็อห ปีคึก. อี มูห กาอูน กาดาย ยา ซีปรัห, อัน ยี แร, ยี ฆ็อง ดัว ดี เฆ.

26 เฌาพรา ฌ็อง อากยาม อางยาน อี ตู หมึอม. อัน เฌา ยี อึง อากยาม อางยาน เฆ ดูอี หมึอม.

27 เซ แม มึห น็อห ลอพัะ, อึณ ดี แตห บอ อึณโฮม แม ฌัม ดูก. เฆ อี ตู ดึห ตู โฮม ลักซอง อี, เฆ ยี ดี กอย ดาคึย ฆยามซา.

28 ดูอี อี โบง นา ซืร นา หมาน, อัน กาดัวะ กาพา อาต เวียะ อัน โฆรห อี. ดูอี ฮาย ยี ปีครัน ดี เวียะ โฆรห อี ตู หมึอม.

29 ดอ ซาคึร เฆ ดูอี อี มึห น็อห ซืร น็อห หมาน, เฌาพรา บอ โทม. อัน ยี วัห เฆ ดูอี ฮาย.

30 เซ เอ ยอด ดูอี อี เอว, นา อัน มืร ซีบลาง, อึณ บอ แบน น็อห ดาคึย ดี เอ. บอ ซาดาง ลอง นา บอด, อึณ ดี แบน น็อห โคย.

31 เซ แม นับ ดี โทม โฆรห ปี มาโนว อี, แม ดี บอ กอย รึม โดบ เฆ ดูอี อี มึห อางยาน.

32 เซ แม แวน ปี มาโนว อี, อึณ ปี แม ปยาต โดว แม แตห อึณ ชึม. เซ แม ยี ดึห ดี โทม, อางยาน แม ดี แว กืน.

33 เซ ดูอี โรวเซ เฌาพรา, อึณ ดี แตห อัน มึห อางยาน. แม โลว มึห น็อห เตียม น็อห โฆม ดี อาต. แฮะ ฮอต อี เฮา ดี วี โรวเซ แม.