1 อึย แม เฌาพรา, โอว หมาณ, แกวะ แตห แม เฌา กอย หนีม ปาย ตี. แกวะ แตห แม กอย, ตู ต็อห มาเซ.

2 แตห แม เฌา บอ ยอด แคะ แฮะ ซีนัน ซีนืง รันซู แม. เฆ อี ฌ็อง แม เฌา, เฆ บอ ปีกยัะ เฆ, ต็อห ดี กาแคณ ดี แม เฌา.

3 เฆ คราม ดี ปีหล็อก ดี ดูอี ปี อึบ แม เฌา. เฆ บอ คราม ดี โบง กาบัห ดี ดูอี ปี ร็อก แม เฌา.

4 เฆ บอ ต็อห, “ตัห ตัห เอ, แตห เอ ดึห แวน เฆ. แกวะ แตห อึณ ซี มึห อี นัมโหลห ดูอี อีซาเรลัะ ดอ เหมา.”

5 เฆ แฮะ แบน อู น็อห, แฮะ ลาย โพรม ดี แบน รันซู แม เฌา.

6 อึณ มูห ดูอี เอโดม, ดูอี อาโมยว อาซามาน, ดูอี โมวอาบ, ดูอี อาโมยว ฮาการา,

7 ดูอี อาโมยว เกปาลา, ดูอี อัมโมน, ดูอี อามาเลก, ดูอี พีลีที บอ เฆ ดูอี แคง มืง ทูโรว.

8 บอ เฆ ดูอี อาซูรา แฮะ ฮาว รึม โดบ เฆ, แตห เฆ จอย เฆ ดูอี อี มูห หลาน อาโลด ตึอน.

9 เย หมาณ, แตห แม เฌา โบง ดี เฆ, แตห อึณ ปี ปี ดึอม โบง แม ดี ดูอี มีดีอาน บอ ดี โบว ตาง อี จืร อาซีซาลัะ ฆาย คูนดีคัม อายาพีน ดอ กอย เฆ โคบ แบลง อึม กีโซน ตึอน.

10 แม เฌา แฮะ โบง แตห เฆ ยัม ดี โดง จืร อีนตอลัะ ตึอน, แตห โดว ยัม เฆ ตี วี อัม ลาต, แบน โตต พูน กาดาย.

11 แตห แม เฌา โบง ดี เฆ ดา ตาง อี แยต เฆ, แตห อึณ ปี อาออราพัะ ฆาย อาเฌพัะ ตึอน. แตห แม กาโฆห ดี อามู อามาด เฆ, แตห อึณ ปี ดอ กาโฆห แม ดี คูนดีคัม อาเจพาฮา ฆาย อาจาลามูน อี แฮะ ฮอต ยัม ตึอน.

12 ดูอี เฆ ตี, เฆ แฮะ ดึอม ต็อห, “แตห เอ ดึห กาดาย ปี อึบ เฌาพรา ดี เอ.”

13 อึย แม เฌาพรา, แตห แม เฌา บรัด แวน เฆ, แตห อึณ ปี อี บรัด แวน กาปูห เฆ เดียบ โหงว ปี บูด คูน.

14 แตห เฆ ชึม ปี เงา กาซึม แปร. แตห อึณ บอ ปี แปละ เงา ปี โดะ อี มาน หรึอม.

15 แตห แม เฌา บอ ณอน เฆ ปี คูน ตาง ตัห บูด เฆ. แตห เฆ บอ โยว กาเซา ปี ปี โยว เฆ คูน ลาง.

16 แตห แม เฌา โบง แตห เฆ กอ โลว ซาย อี, แตห เฆ กอ วี โหลห แม เฌา.

17 แตห เฆ ฌัม ดูก ตาง บอ โยว เซเซ. แตห เฆ บอ ยัม, ชึม ซาเร.

18 อึย แม เฌาพรา บอด, แตห เฆ บอ นับ, แม มูห อัน เฌา. แม เฌา มูห เฌาพรา อู กาดัง อี อึบ โตต ดอน โมยว. อาว ฮู มึห ปอ อู กาดัง.