1 แตห เอ ต็อห โหมว ดี เฌาพรา. อัน เฌา บอ มูห อี แตห โปลม แตห แฮณ ดี เอ. แตห เอ ต็อห โหมว ดาคึย ดี เฌาพรา ปี กรึบ อาโกบ.

2 แตห เอ ต็อห โหมว อี อืบ อัน เฌา. แตห เอ กัร ฆรึง ดีแตด, บัห ดีง ดอน โมยว อี ฮัม ดาคึย.

3 แตห เอ บูด เวา ดอ มูห ซีแง บลอย ตาง, อี มูห ซีแง มาเฆียน กามาย บอ ซีแง มาเฆียน กาลัง.

4 อึณ บอ มูห ฮีด เฆ ดูอี อีซาเรลัะ แปะ แฮะ ดัม อูน เฌาพรา ดี อาโกบ.

5 อัน เฌา แฮะ จัร เฆ หลูกหลาน อาโยว โดบ ฮีด ตี ดอ กาโฆห อัน ดี ดูอี แคง มืง แอฆึบ. ดอ อัน ตี โอว แฮะ ยึร โฆรห ดูอี ปี ตู นับ โอว.

6 อัน เฌา มืร แฮะ ต็อห, “โอว แฮะ ดึห แวน ปี โลว คัม เบ, อี ปี โกรว จัน อี กอย แดง ยัะ เบ. แด เบ มืร, อาว ฮู โลว โจะ คอน อี ฮับ มาว.

7 ดอ ฌัม เบ ดูก ตี, เบ แฮะ แดะ โอว. แฮะ ฮอต, โอว แฮะ ดืด เลห เบ. โอว แฮะ อึร โฆรห เบ ดอ กอย โอว แคง อึณอูะ บอ ฮัม กานัม. โอว แฮะ เทว น็อห เบ ดอ กอย เบ โคบ อึม เมรีบา ตึอน.

8 อึย เบ ดูอี ปี อึบ โอว, แตห เบ โทม โฆรห โอว. โอว ดี ดัว ซาดีก ดี เบ. อึย เบ ดูอี อีซาเรลัะ, แกวะ แตห เบ แวน โฆรห โอว.

9 แกวะ แตห เบ อูน อารึบ เฌาพรา ปี กรึบ อี เฮา, แกวะ แตห อึณ กอย โดง กอย เบ. แกวะ แตห เบ กรึบ ฌึร ตี ดอ เหมา.

10 โอว อี มูห เฌาพรา ปี กรึบ เบ, โอว อี ดึห เลห เบ แคง มืง แอฆึบ. แตห เบ บึง โอว, โอว ดี วี ดัว โตต ดอน โมยว ปี โลว เบ, แตห อึณ ปี ฆอน มาซีม แฮะ อาง โมต, แตห มา อัน ฮับ อัน โฮม.

11 อึณ ยี มูห ดูอี อี กรึบ โอว, เฆ ตู โทม โฆรห โอว. เฆ ดูอี อีซาเรลัะ ตู ซี โยม โอว.

12 โคว, โอว แฮะ แตห เฆ โดบ น็อห ดืร เฆ ตี, แตห เฆ โบง ปี คราม เฆ.

13-14 โอว ซี แตห ดูอี อาโมยว โอว โทม โฆรห โอว. เซ เฆ คัม ดี โบง มี แคะ ตี, โอว ดี ตัห, โฮว เตา รันซู เฆ ครัน ครัน. เซ เฆ คัม ดี โฆม โอว, โอว ดี ออง ดี แป รันซู เฆ.

15 ปัน ตี เฆ อี ฌ็อง เฌาพรา, เฆ ดี วี โยว อัน, วี ตัห ครึบเครา ดี อาต อัน. อัน เฌา ดี ดัม หมาบ ดี เฆ, แตห เฆ คัม เซเซ.

16 อึณ ยี มูห เบ, เบ ดี ปึอน ดี โฮม โบม อี ซีแงห กาเซา. โอว ดี ดัว บอ งาม มาเพียน อี กอย แคง แปร, แตห เบ ปึอน ดี โฮม แคะ ปี ซี โฮม เบ.”