1 อึย แม เฌาพรา, แกวะ ดัม หมาบ ดี โอว ดอ รู แม. แกวะ มาโนว กาเซา โอว ดอ จาว แม.

2 อึณ ปี บลา อัะ แม เฌา แฮะ ลึบ แคง โดว โบ็ง โอว. อึณ บอ ปี แด แม เฌา แฮะ ดูห แตห โอว เกห.

3 แม เฌา แฮะ รู โกบ หมาบ โอว, แฮะ แบน เซาพึร กาเซา ดี โอว. แฮะ เซา บอ โดว.

4 หมาบ โอว แฮะ กืน กาเซา, อึณ ปี โอว แฮะ เจต แคง หมาบ. อึณ บอ ปี โอว โลว ฆอด โกรว จัน, ปี ตู แป โอว.

5 โกบ แฮะ รึร โอว, ดีม ดี โดว โอว บอ ลาต อูห อัม กาเซา.

6 โกบ แฮะ คัม โอว เซา กาเซา, อึณ ตู แตห โอว ปึอน ดี ยีต. ดอง วัน ดอง คืน โอว บอ ยาม บอ กลึร กาเซา.

7 ณอย โอว มืร แฮะ กาฮัวะ แหนน เงา. โดว โอว บอ โดว แฮะ เซา.

8 โอว บอ ดีหลัห อึณจัม บอ โดว, อาว ปึอน โบง มาเซ. น็อห โอว มืร บอ กาปยาต ลึร, แตห โอว บอ หงูน กาเซา.

9 อึย แม เฌาพรา, แคะ ปี โลว โอว ดอน โมยว แม เฌา บอ นับ โตต. แคะ ปี หงูน โอว ตี, แม เฌา บอ ยึร โตต.

10 บางน็อห โอว บอ ตา ตึก กาเซา. โอว อาว ฮู มึห แฮณ. งาย โอว มืร อาว ฮู บลาง.

11 เฆ อี ร็อก โอว บอ ฆึก โอว, เฆ บอ กอย โต็ง โอว โกบ แฮะ เซา โอว ตี. เฆ บีนอง วอแว โอว มืร บอ วัห โต็ง โอว.

12 เฆ อี ซี ง็อห โอว, เฆ บอ ดีณ ยอต ดี โอว. เฆ อี ซี โบง นา ตู หมึอม ดี โอว, เฆ บอ กามวน เฌณฌา ปี ดี ปาย เฆ ดี โบง ดอง วัน ดอง คืน.

13 โอว ยี ณึงราง ตู ยึร โฆรห เฆ, แตห โอว ปี ดูอี รึร, อี โหยะ กาอาว, อี ตู นับ ดี โฆรห.

14 โอว บอ ปี อี ตู นับ ดี โทม, อี ตู นับ ดี เวียะ โฆรห เฆ.

15 อึณ ยี มูห แม เฌาพรา, โอว บึง แม โกบ มูห แม เฌาพรา ปี กรึบ โอว. แม ดี บอ โทม บอ ย็อห โฆรห โอว.

16 โอว หมาณ, แกวะ แตห เฆ รันซู โอว โคย ตัห ดอ ดีหลัห โอว. แกวะ แตห เฆ ปึอน ดี ปีคึก เฆ, ปึอน ดี โคย กาณัห โอว ดอ ดีปลาด เกห โอว.

17 โคว, เซา แฮะ ดึก ดี โอว เซเซ. โอว มืร แฮะ รีน ดี เกห.

18 โอว บอ กาลาง หมาบ โอว. โกบ โหลห โอว หมาบ โอว, โอว บอ กลึร กาเซา.

19 เฆ รันซู โอว ยี กอย ดาคึย, มึห โปลม หลึอม โอว. เฆ ดูอี กืน บอ ฌ็อง โอว ปีเยณ.

20 โอว ต็อห, โอว ดี โบง นา บอด. เฆ ยี วี โบง เวียะ นา ตู หมึอม ดี โอว. เฆ วี แบน รันซู โอว โกบ โฆยวฆยา โอว ดี โบง นา บอด นา หมึอม.

21 อึย แม เฌาพรา, แม แกวะ เบลห แวน โอว. แม เฌา บอ มูห เฌาพรา ปี กรึบ โอว. โอว หมาณ, แตห แม กอย รึม โดบ โอว เซเซ.

22 แม เฌา บอ มูห เฌาพรา อี คยอด โอว. โอว หมาณ, แม เฌา จอย โอว แฮ แฮ.