1 อึย แม เฌาพรา, เหมา อึณ ปาย ปี แวน แม ดี โอว? เหมา อึณ ปาย ปี ตู ซี จอย แม ดี โอว, ตู ซี โทม โฆรห ปี หงูน โอว?

2 อึย แม เฌาพรา ปี กรึบ โอว, ดอ กาแต ซีแง โอว บอ แดะ แม เฌา, แม ยี ตู เวียะ โฆรห โอว. แคง หมึร โอว ปี วี แดะ แม เฌา, อึณ ยี ตู แตห น็อห โอว เยน.

3 แม เฌาพรา บอ มูห เฌาพรา อี ซีงา บอด. แม บอ มูห เฌาพรา ปี อืบ เฆ ดูอี อีซาเรลัะ.

4 ฆูณ ดา เย แฮะ บึง แม เฌาพรา. แม เฌาพรา บอ คยอด เฆ.

5 เฆ แฮะ ซาคึร แดะ แม เฌา, แม เฌา มืร จอย แตห เฆ ลอด. เฆ บึง แม เฌา, เฆ มืร ตู กาลูต น็อห.

6 อึณ ยี มูห โอว, โอว อาว ฮู ปี ดูอี, โอว แฮะ ปี วัะเรีย. เฆ ดูอี เอห โอว, ตู โรวเซ โอว.

7 แคะ กอย เฆ อี ยึร โอว, เฆ บอ กาณัห แนนัะ โอว, ลูกตาย โอว.

8 เฆ กามวน ต็อห, “อัน แฮะ บึง เฌาพรา, แตห เฌาพรา จอย อัน, แตห อัน ลอด. อัน แฮะ โบง โดบ ปี อึง เฌาพรา, แตห เฌาพรา คยอด อัน.”

9 มาแล, อึณ มูห แม เฌาพรา อี แตห โอว ฆึอด. แม เฌาพรา แฮะ แตห โอว กอย ซีคยา ดอ ปู โอว.

10 โอว แฮะ บึง แม เฌาพรา ซีณ ฆึอด โอว. แม เฌาพรา แฮะ มูห เฌาพรา ปี กรึบ โอว, ซีณ กอย โอว แคง วัต มา โอว.

11 โอว หมาณ, แตห แม เฌา กอย รึม โดบ โอว, โอว ดี โลว คัม ดูก ตาง. อึณ มืร ตู มึห อาเซ อี ปึอน จอย โอว.

12 เฆ รันซู โอว บอ ปี มัก ดีโซว อี แฮะ กอย โรบ โอว. มัก ดีโซว อาโมยว อี แฮณ กาเซา อี ตัห มืง บาซัน, เฆ ตัห กอย โคบ โอว.

13 เฆ บอ เรียง กาเซา ปี มาครังซี อี แฮะ ซี ก็อะ ยัม โอว.

14 โอว อาว ฮู มึห โปลม มาเซ. อึณ แฮะ หราย ปี อี โหลว อึม แคง กาฮาต. แคะ กอย กาอาง โอว บอกาเฆลียด, แหนน แฮะ ฮอต ลาย ลูด โตต. น็อห โอว แฮะ ดีแตด. อึณ บอ ปี บลัม อี แฮะ ลาต แบน อึม.

15 แฮณ โอว แฮะ หราย. อึณ บอ ปี โดณ กาโละ กาดาย กาลาต. ซีดัะ โอว บอ ดึก ดี หนึณ โอว. อึณ บอ ปี แม เฌา แฮะ เบลห แวน โอว แคง กาปูห, แตห โอว ยัม.

16 เฆ ดูอี ฮาย อี ปี มาโซว แปร แฮะ ตัห กอย โรบ โอว. เฆ ซัด แด โอว เฆ เปลา โอว.

17 กาอาง โอว บอ ลึห บอ ปึอน ยึร ดอน โปละ. เฆ บอ กาโพรม ดี ยอด ดี กาณัห โอว.

18 เฆ บอ ดึห ครึง ปี ตา โอว, กาซาง ดี เฆ. เฆ บอ กาโดว แตห เฆ นับ อาเซ ดี ปึอน ซีโตว โอว.

19 อึณ ยี มูห แม เฌาพรา, แตห แม กอย รึม โดบ โอว. แม เฌา อี นับ ดี ดัว โปลม ดี โอว, แตห แม ตัห ครัน ครัน, ตัห จอย โอว.

20 โอว หมาณ แม เฌา คยอด โอว, แกวะ แตห โอว ยัม ดี มาปัวะ ลาง. แกวะ แตห มาโซว เฆ นี ปึอน ดี ก็อะ ยัม โอว.

21 โอว หมาณ, แตห แม คยอด โอว,^a แตห โอว ลอด ดี โมต มาครังซี, แตห โอว ลอด ดี มัก ดีโซว อี กอย แคง แปร.

22 โอว ดี กาลาง ลอง แม เฌาพรา ดี บีนอง วอแว โอว ดอน อี. โอว ดี อืบ แม เฌาพรา กาแต เฆ ดูอี กืน, อี ตัห กรึบ แม เฌา.

23 อึย เบ ดูอี อี โรวเซ เฌาพรา, แตห เบ อืบ อัน เฌา. เบ ดูอี ครึร อาโกบ, แตห เบ มยูก อัน เฌา. เบ ดูอี อีซาเรลัะ, แตห เบ อาม ปี ปาย อัน เฌา.

24 โคว, เฌาพรา ตู กาอีห ดูอี ฆีน. อัน ตู ปีว ดูก ปี คัม เฆ. อัน บอ โทม ปี ซาคึร เฆ.

25 โอว ดี วี อืบ แม เฌา กาแต เฆ ดูอี กืน. แปะ แฮะ ดัว โอว กาดีก ซัดฌา ดี แม เฌา, โอว ดี บอ โบง โดบ, แตห บอ เฆ อี โรวเซ แม เฌา ยึร.

26 เฆ ดูอี อี กาดูห ดูก, เฆ ดี วี ปึอน ดี โฮม แพ. เฆ อี ซี หณึม เฌาพรา, เฆ ดี ปึอน ดี อืบ อัน. แตห เฌาพรา ม็องการา ดัว นา หมึอม ดี เฆ เซเซ.

27 เฆ อาโมยว ดูอี อี กอย แดง กาดาย ดอน นา ดอน โปละ, เฆ บอกาเฆลียด ดี วี โหลห เฌาพรา. แคะ กอย ดูอี บอกาเฆลียด ดอน ฌึร ดอน ครึร, เฆ ดี วี กรึบ เฌาพรา.

28 อึณ มูห เฌาพรา อี อึบ โตต มาน มืง บอกาเฆลียด. อัน อึบ บอ ดูอี ดอน ฌึร ดอน ครึร.

29 เฆ ดูอี อี ปีคึก เฆ, เฆ ดี โลว โฆม กรึบ เฌาพรา. อาโมยว ดูอี อี นับ ดี ยัม, เฆ ดอน อี ดี โลว ครึบเครา, กรึบ เฌาพรา.

30 บอ หลูกหลาน เอ อี ดี ฆึอด กามาย, เฆ ดี โบง ปี อึง เฌาพรา. เฆ ปี ดี วี กาลาง ลอง เฌาพรา ดี หลูกหลาน เฆ แบน ฌาด แบน ฌาด.

31 เฆ ดี บอ กาลาง ดี เฆ อี หณัม ฆึอด ต็อห, “เฌาพรา อี ปึอน คยอด ดูอี.”