เฌาพรา ปี วี ต็อห ดี อาโยวบา, “แม ทาง, แม ดี ปึอน ดึห อึณแปด, แปด เลห มากราย บอ ดึห วัน, ปัก กาณึบ อัน?

2 แม ทาง แม ดี ปึอน ดึห วัน, บลูห มูห อัน บอ ดึห ฮีน โฆะ, ฟ็อะ ดี กูงกาบ อัน?

3 แม ทาง มากราย ตี ดี บอ วี ดอง บาน แม, วี กาลาง โฆรห อึณจูะ อึณจัม บอ วอน แม?

4 แม ทาง, อัน ดี บอ วี กาแซณ ดี แม, ดัว กาดีก ซัดฌา ดี แม, แตห อัน แบน หมาย แม บอ โบง ฆาน แม เซเซ?

5 แม ทาง แม ดี บอ ปึอน พึก อัน, แตห แม ปึอน ดี ดีลาว ดี อัน, ปี แม พึก มาซีม? แม ทาง แม ดี บอ ปึอน ปัก อูน อัน, แตห อึณ แบน ปี บลัต ปี ดีลาว เฆ ฆอน อีบึณ แม?

6 แม ทาง เฆ ดูอี อี จึห อี ย็อง โกรว, เฆ ดี บอ ตัห กาจึห ง็อห อัน บอ จึห ฮาว อัน? เซ เฆ แฮะ ฮอต จึห, แม ทาง เฆ ดี บอ ดึห ฮาว อัน ลาย กาย็อห กาซาง กาแต เฆ?

7 แม ทาง แม ดี บอ ปึอน ดึห บลา เลียห, ซัด ฮูน อัน, ดึห บอ กาล็อง ปี ซัด อี มาฆา ตึอน, ซัด ฆีณ อัน?

8 แตห แม เทว ดี ปา โดว อัน ตา แด แม. แม ดี ยึร ปี ดี ปาย อัน ดี รู, วี กาโฆห ดี แม. วาย อัน ตี แม มืร อาว ฮู ปีว ดอ เหมา, อาว ฮู มึห น็อห ซี โบง ปาย ตี ปอ อู จึบ.

9 เซ แม คราม ดี กาโฆห ดี อัน, แม ดี คราม ปีเยณ. โคว, เซ ดูอี ยึร มากราย ตี, อึณ ดี บอ แบน กาปึณ กาเซา ดี อัน.

10 อาว มึห อาเซ อี ยัะ บยีต ยีต อัน บอ ยัะ กาโฆห ดี อัน. เซ อึณ ปาย ตี อึณ มืร ตู มึห คอ อู วี อี ปึอน กาบัห ดี โอว.

11 อาว มึห อาเซ อี แฮะ ดึอม เฆฌู โอว, แตห โอว โลว วี เวียะ ปี เฆฌู อัน. แดง กาดาย นี, อึณ มูห โตต โกรว โอว.

12 โอว ดี วี กาลาง ปอ อึณปัว ลอง มากราย. โอว ดี กาลาง ลอง เปลา อัน บอ โดว อัน อี แฮะ หมึอม ยอด บอ แคะ กืน แฮณ อัน.

13 อาว มึห อาเซ อี ปึอน บูต เลห ครึง ปี ตา อัน ทาบ เรต, บอ บลูห กาหลูห ซีโตว อัน อี กอย ครึม ครึง ตี.

14 อาว มึห อาเซ อี ปึอน กาวึห โมต อัน แตห อึณ อาง. อึณแปรง หราง อัน อึณ บอ หมึอม โยว, หมึอม กาฮีว กาเซา.

15 แฆด แดง กาตูะ อัน บอ กอย แบน อึณแปรง แบน อึณแปรง. อึณ บอ ลาย กาแตะ แบน ดีพลัะ แบน ดีพลัะ.

16 อึณ บอ กอย กาดึก ซีคยา, อาว ปึอน ดืด เลห.

17 แฆด อัน ตี, อึณ บอ กอย ลาย ดาม, อาว ปึอน ฆ็อห แตห อัน กาย็อห.

18 เซ มากราย ตี อาชีห, อึณ บอ บลาง เลห ดี ฆูงมูห อัน. คอ งาย อัน บอ บลาง ปี บลาง ซีแง เจว หณา.

19 แปละ เงา บอ กาโชต เงา บอ เลห ตัห แคง โมต อัน.

20 ดัก เงา บอ เลห แคง ฆูงมูห อัน. อึณ บอ ปี กาโละ อี แฮะ กาซึม, อี กอย แดง เงา อี แฮะ ดาด กาเซา.

21 พึอม ปี ฮึห เลห อัน, อึณ บอ แป ปี กูห เงา อึณกึร. แปละ เงา บอ นับ ดี เลห แคง โมต อัน.

22 ฆาน แมง อัน มึห โปลม มึห แฮณ กืน กาเซา. เฆ อี กาตูณ อัน, เฆ บอ โยว กาเซา.

23 ยัง อัน เฆ ฮูน อัน บอ กอย ลาย อึณฆลับ อึณฆลับ. ยี โปลม กาเซา, อาว ปึอน รัร.

24 บังน็อห อัน, บอ โปลม แหนน มาว. อึณ บอ โปลม ปี มาว ปี กรีด อี คามูน อี กอย บลาก นา ครึม.

25 ดอ ยีต อัน บอ เฆ อี มึห โปลม เฆ แฮณ กืน กาปึณ บอ โยว กาเซา, วี เตา อู เฌณ.

26 เฆ ปี บอ ดึห มาปัวะ ลาง บอ บลา เลียห กาโฆห ดี อัน มืร, อัน ตู นับ ดี ดีม ดี เซา ดอ เหมา. ปี บอ มูห เลียห, บอ มูห บลา, บอ มูห เลียห บัต, อาว ปึอน บลูห, อาว ปึอน ซัด อัน.

27 เซ อึณ มูห ฮีน, อึณ ปี เหรียง ดี อัน. เซ อึณ มูห บ็อง เดณ, อึณ บอ ปี เฮ อี ราม ดี อัน.

28 บลา อัะ มืร ตู ปึอน ณอน เตา อัน. ปี บอ ดึห ฆอน มาว, วี ปืะ อัน ตา อาปืะ มืร, อึณ บอ ปี แคะ กาอัห เฆ กาปูห ดี อัน.

29 เซ อี ดึห มัง มัห บอ มัห อัน, อึณ บอ ปี แคะ เดียบ โหงว. อัน บอ นับ ดี วี กาณัห ดี บลา เลียห ปี หงา เฆ ดี อัน.

30 แฆด อี กอย ดี วัต อัน นา ครึม, อึณ บอ ลัม ปี กาโละ กาลาต. อัน บอ นับ ดี ปล็อห ฮาว แคง โณะ ปี ปัน มังฟึร โดง นา.

31 อัน บอ นับ ดี วัร อึม นัมมูกซารา, แตห อึณ ปี อึม อี แฮะ ซีนัม. อัน บอ โบง แตห อึม นัมมูกซารา เลห ปูห อัน.

32 ดอ กาโลห ฮาว อัน กาแต อึม, อัน บอ โบง แตห อึม เลห ปูห ลูย ปูห ราว, แตห อึณ กอ มาบรีว โดบ ดี ปัน อัน.

33 แดง กาดาย นี, อาว มึห โดว ซัดดาวา อี ปี มากราย ตี. อัน บอ มูห โดว ซัด อี ตู นับ ดี โยว มาเซ.

34 อัน บอ ลูกตาย เฆ โดว ซัดดาวา อี ปีคึก. อัน บอ ปี คูนดีคัม อี อึบ เฆ โดว ซัดดาวา บอกาเฆลียด.” เฌาพรา แฮะ กาลาง ดี อาโยวบา แคะ ตี.