เฌาพรา ปี วี กาลาง โฆรห ดี อาโยวบา ต็อห,

2 “อึย อาโยวบา, แม ทาง ดูอี ดี ปึอน แน เฌาพรา อี อึบ โตต ดอน โมยว บอ ต็อห ปี โบง อัน ตู หมึอม? วี เหมา อี ต็อห ดี เฌาพรา ปาย ตี แตห อัน วี เวียะ วี กาลาง ดี โอว.”

3 แฮะ ฮอต อาโยวบา วี กาลาง ดี เฌาพรา ต็อห,

4 “อึย แม เฌา, อาว กาอาบ โอว กาลาง ดี แม. โอว อาว ฮู นับ ปี ดี กาลาง ดี แม. โอว แฮะ วี ตา แด โอว, วี กาบีด โมต โอว.

5 โอว แฮะ กาลาง อู เฌณ, แฮะ ฮอต ปี วี กาลาง ปอ อู เฌณ. ดอ ตี นี, โอว อาว ฮู มึห ปี ดี กาลาง, ปี ดี เวียะ โอว ดี แม เฌา.”

6 ดอ อัน ตี เฌาพรา บอ กาลาง โฆรห, แตห อึณ ตัห โดบ คูน ตาง, ต็อห ดี อาโยวบา,

7 “ปีกยัะ แม ปี อีมาย, แตห แม แป ดี ฆ็อห โฆรห ปี ดีหมอด โอว นี.

8 แม ซี ต็อห ปี ซูงพยาด โอว อาว หมาน? แม ซี ต็อห, อึณ มูห โอว อี แฮะ กาลึบ บอ วี ต็อห ปี โบง แม แฮะ มูห แฮะ หมาน?

9 แม ทาง แม มึห โปลม เฆ แฮณ ปี โอว? แม แฮะ ปึอน ดัด เรียง แตห อึณ กอ ปี ฮัม ปี ดัด โอว?

10 เซ แม แฮะ ปึอน โบง, แม ดี บอ ปึอน บยัะ อาพูง ดังโคว แม, บยัะ บอ แคะ ตาง ซาเร แม.

11 แตห แม ฮูห เลห น็อห รู แม อี แฮะ กาหลึอม. แตห แม ยอด เฆ ดอน อี อี มึห น็อห ปีคึก ปีจา, แตห เฆ วี โจห โลง โดง เตียม.

12 เฆ อี มึห น็อห ปีคึก ปีจา, แตห แม โบง แตห เฆ ชึม ซาเร, บอ แณต ดูอี อี ตู หมึอม โดง กอย เฆ.

13 ดึห ดูอี เฆ ตี บอกาเฆลียด, ดีบ กาโดบ โตต เฆ แคง กาดาย, บอ กาบีด นา เฆ, อูน แคง มืง มารานัะ.

14 เซ แม โบง ปาย ตี โอว ดี อืบ มยูก แม ต็อห, โปลม แม เฆ แฮณ แม ตี, แฮะ ปึอน วี คยอด โดว บรีม แม.

15 โอว แฮะ พาน เบลห มังปร็อง อึม^a ปี โอว พาน เบลห แม. อัน บอ นับ ดี โฮม เปต ปี มัก ดีโซว.

16 มาแล, อาพูง อัน กอย ดี ณอย อัน. โปลม เฆ แฮณ อัน, อึณ บอ กอย ดี ซีนัะ วัต อัน.

17 ซีดา อัน โปลม ปี เฮ อารีด. ซีนัะ เปลา บอ ลาย ดาณ กาแวะ ฮาว, แตห อึณ มึห โปลม.

18 กาอาง อัน บอ ปี กาซ็อง บ็อง เดณ. เปลา อัน บอ ปี ดีฆัร ฮีน.

19 อัน บอ มูห โดว ซัดดาวา อี หมึอม อาม หลึอม โดว เฮา แปะ แฮะ พาน เบลห เฌาพรา. อึณ มึห มี ดา กาณา อี แฮะ พาน เบลห อัน อี แป ดี อึบ อัน ตา มาปัวะ ลาง อัน.

20 มังปร็อง อึม ตี บอ โฮม เปต อี ลัต แดง นอน. โดว ซัดดาวา ดอน โมยว อี กอย แคง แปร บอ ลาย ดีลาว โคบ อัน.

21 อัน บอ อึง ดี อีด ครึม เฮ มอกโมว, บอ เครียง แคง กาบาง โฆล็ง เฆ แคง โหนง.

22 ยาบ เฮ มอกโมว ตี, อึณ บอ อับ ดี อัน. เฮ อาราบ อี กอย โคบ แบลง บอ กอย โรบ อัน.

23 อึมแประ ปี บอ ตัห ฌูห อัน แฮณ แคะ เหมา มืร, อัน ตู กาจัว. อึม แบลง ยอดาน ปี บอ อึณปูน โมต อัน มืร, อัน ตู โยว.

24 อาว มึห อาเซ อี ปึอน บลูห อับ งาย อัน ต็อห ดี เหมต อัน. อาว มึห อาเซ อี ปึอน บลูห มูห อัน ต็อห ดี เหมต อัน.”