เฌาพรา ปี วี กาลาง ดี อาโยวบา ต็อห, “แม นับ อาคราว ดอ ฆึอด ตัห มังเฆียห แคง แปร? แม แฮะ ดึอม บัร ดี ลึมลา ดอ มึห มาฌัะ ดี ฆอน?

2 แม นับ ซีณ ดอ แด เฆ บาดีก ซันเท กอ ฌัม ฆึอด ฆอน เฆ, อึณ เหลณ แคะ เหมา? แม นับ อาคราว ดี ฆึอด ฆอน เฆ ตี?

3 แม นับ อาคราว ปัน ดี เซา วัต เฆ บอ อีด แดง กาดาย, แตห ฆอน เฆ ฆึอด? แฮะ ฮอต ฆึอด, เซา มืร แฮะ หราย อู เฌณ.

4 ฆอน เฆ ตี บอ นับ ดี กอย ซีคยา บอ เหรห ตาง แคง ฆลัง. เฆ บอ นับ ดี ฆ็อห มา เฆ, ตู วี ตัห.

5 อาเซ แฮะ เบลห มาลา แปร, แตห อัน ปึอน ดี ฮาว ทังฮาง, ฮาว ดาคึย? อาเซ แฮะ ฆ็อห เลห วัน อี แฮะ ปัก อัน, แตห อัน ปึอน ดี แล วีว แล เวณ?

6 โอว แฮะ ดัม อูน แคง แปร กาฮ็อห, แตห อึณ แบน ปี กาง อัน. โอว บอ เบลห แตห อัน กอย แคง ฆลัง ซัยะ.

7 อัน มืร นับ ดี กอย, แตห อึณ กาโต็ง มืง, โดง ตู ซีนัน ซีนืง ดูอี. อัน มืร ตู ยึร โฆรห อาเซ อี แวด อี ณอน อัน.

8 อัน บอ เหรต ปี ดี โฮม อัน แดง นอน. อัน มืร เหรต ดี โฮม หลา อี ซี เงียน ซี อีม ดอน โมยว.

9 แม ทาง, มัก แปร ดี บอ จอย แม โบง ฆาน? แม ทาง, อัน ดี ตัห อีด โคบ กาลัยะ ปี เบลห อูน แม?

10 แม ทาง, แม ปึอน ดึห วัน ปัก มัก แปร, วี แตห อัน แท มาน แม? เซ อาว ปาย ตี มืร, แม ดี แตห อัน ลาก มังฟึร แคง โดง นา แม?

11 แม ทาง, แม ดี ปึอน ดี บึง โกบ แฮะ มึห อัน โปลม ตาง โปลม กืน? แม ซี แตห อัน โบง ฆาน แม อี จัน กาเซา?

12 แม หณึม อัน ดี ดึห อูน ซีบัยะ โหงว ปี โซะ แม? อัน ดี บอ ดึห ตัห ดี โอ็ง กางน็อห แม?

13 มาซีม กาฮาต บอ นับ ดี กายับ แฮ กาเซา เพียง อัน. มาแล, อัน ยี ตู นับ ดี บึณ.

14 มาซีม กาฮาต ตี, บอ นับ ดี เบลห แวน ปึอน อัน, แตห อึณ ซีอูณ แคง กาฮาต.

15 อัน มืร ตู น็อห แหม โยว อี เฮา ตัห แณต ปึอน อัน ตี. อัน ตู โยว บอ มาโดว แปร ดี ตัห แณต กาลาต.

16 อัน บอ โบง กาเซา ดี ฆอน อัน กอ แหนน อาว มูห ฆอน อัน. ดูก เฆ เซา แปะ แฮะ คัม ดอ ฆึอด ฆอน อัน ตี, อัน มืร ตู โยว อัน คัม ดีโลย ดีลาย ปีเยณ.

17 โคว, เฌาพรา แฮะ โบง แตห อัน รึร, ตู ดัว อางยาน ดี อัน.

18 มาแล, ดอ วี ยีต ดีฆรึห อัน โดว อัน ต็อห ดี เตา, อัน บอ นับ ดี กาณัห ดี มังปร็อง บอ ดี ดา อี ป็อะ มังปร็อง ตี.

19 อึย อาโยวบา, อึณ มูห แม อี แฮะ ดัว แตห มังปร็อง ตี มึห โปลม มึห แฮณ? อึณ มูห แม อี ฮับ แตห มังปร็อง ตี มึห กูก?

20 อึณ มูห แม อี โบง แตห อัน นับ ดี แดน ปี มาอาโฌ็ง? บอ นับ ดี กาโบยว ดูอี เซ ฮัม เลห แคง กาเดา ฆูงมูห อัน?

21 อัน บอ นับ ดี โฆละ ดี กรีห บาง แบลง เฆ โดบ ดีลัยะ. อัน บอ นับ ดี แดน ฮาว โดง กาโฆห เฆ ดา ซึก แคะ ซี ดี มึห อัน แฮณ.

22 อัน มืร ตู นับ ดี โยว มาเซ. มาปัวะ ลาง เฆ บลา เลียห มืร, อัน ตู นับ ดี เตา.

23 ครึง กาโฆห ปี โฆ็ง เฆ ดา อี ป็อะ มังปร็อง บอ ลาย ดึร ปาย กาเครียง กาเครียง, บอ มาบรีว มาบรีว โกบ ทอง ซีแง.

24 ดอ บูด เฆ เวา, แตห อึณ แดะ ตัห กาฌูะ เฆ ดา ซึก, อัน มืร อาว ปึอน กอย หนีม หนีม. อัน บอ บยาก บอ ดึห โฮม กาดาย, ซี ฮาว อู เฌณ.

25 ดอ บูด เฆ ตี, อัน มืร ซอ ฮัม กาแฮ, บอ นับ ดี โทม อูห โดง กาโฆห เฆ ดา ซึก อี แฮะ กอย กาโต็ง, อัน นับ บอ โดง แฮะ ดัด ซีนัน ซีนืง ดี บาง กาโฆห เฆ.

26 แม ทาง, แฮะ มูห อางยาน แม อี แตห มาลังดา ปึอน ดี ฮาว ฮาว ตัห ตัห, แตห อัน บอ บลัห เพียง อัน, บึณ ฮาว บลาก นา เตต?

27 แม ทาง แม แฮะ จัร มาฆลาง, แตห อัน ปึอน ดี โบง กาฮูน อัน แดง นอน จา?

28 อัน บอ นับ ดี โฆว โบง กาฮูน อัน บาง ดีฆล็อห, บอ แดง ดาอาง มาว อี แฮะ จา กาเซา. โดง ตี, อัน มืร ปึอน ดี กอย ดาคึย, กอย ซีคยา.

29 อัน บอ กอย โดง ตี บัร ดี ยอด โดว ปี ดี ปึอน อัน โฮม, อึณ บอ กอย กาโต็ง, กอย กาตัด, อัน ยึร โตต ดอน โปละ.

30 ฆอน อัน บอ นับ ดี หณอด ดี เดียง หนาม. เซ อึณ มึห โดว ยัม ดี เหมา, บอ มาลังดา บอ กอย ดี ตี.”