คาน 38
ลอง เฌาพรา กาลาง โฆรห ดี อาโยวบา
1 วาย อัน ตี เฌาพรา แฮะ กอย แคง คูน ตาง, วี กาลาง โฆรห ดี อาโยวบา ต็อห,
2 “อึณ มูห อาเซ อี ตู มึห อางยาน, อี กาลาง โฆรห ปีเยณ, ยี ยัะ ต็อห อากยาม อางยาน โอว ตู หมึอม?
3 วี อี กาลาง ปาย ตี แตห แม ปีกยัะ แม ปี อีมาย, วี เวียะ โฆรห ปี ดีหมอด โอว นี.
4 ดอ กาจูห โอว ดี แด ดัง กาดาย นี, แม กอย ดี เหมา? เซ แม แฮะ นับ ปาย มอก ตี, แตห แม กาลาง ดี โอว.
5 อาเซ แฮะ หมาย อูน เฆา อูน แคะ กาว็อห กาดาย นี? อาเซ แฮะ ดึห เซณ มัง ทัด, ทัด อูน? เซ แม นับ, แม ปึอน กาลาง ดี โอว.
6 ดัง เจณ ร็อง กาดาย, อึณ เบลห อูน แดง มาเซ? อาเซ แฮะ เบลห อูน มาว ดัง ร็อง ดี กาโตะ อัน?
7 บอ ดอ แฮะ มึห ซีมัณ อี เลห เจว หณา, อาเซ แฮะ โดบ เฆ อามู อามาด เฌาพรา อี แฮะ ต็อห โหมว ดาคึย กาเซา?
8 อาเซ แฮะ ดึห มาโลห, กาบีด อึม นัมมูกซารา ดอ เลห ตัห อึม ตี แคง กาเดา ตาง อี ปี วัต กาดาย?
9 อาเซ แฮะ ยึร ดอ ดึห โอว อึณอูะ, ซีบลึก อึม นัมมูกซารา บอ อึณดีบ อูน อัน แคง อับ ว็อง?
10 อาเซ แฮะ ยึร บอ ดอ แฮะ ซีห แฮะ หมาย อูน โอว, แตห อึม นัมมูกซารา มึห กาอูน อัน. แฮะ วี กาบีด อูน บอ มาโลห อัน?
11 อาเซ แฮะ ยึร ดอ ต็อห โอว ดี อึม นัมมูกซารา, ‘แม ปึอน แหล ฌัม มี ปูง นี, อาว ปึอน ปวน. มา อึม อี ซีลอย มืร, อึณ ตืก มี แคะ นี?’
12 อึย อาโยวบา, แม แฮะ ดึอม จัร ซีณวัห เจว, แตห อัน เลห ตัห? แม แฮะ ดึอม แหน อูน โดง ดี วัห แปร?
13 แม แฮะ ดึอม กาลาง แตห ซีณวัห เจว ดึห โฆ็ง กาดาย, บอ หรัด แวน โตต เฆ ดูอี ฮาย อี กอย แดง กาดาย ตี?
14 บลาง ซีแง นับ ดี โบง แตห กาดาย กาปลูะ อารึบ อัน ปี กาดาย กาปีด แปะ แฮะ ดอก อี ดี ฌึม. อึณ บอ ปี บอ ครึง แปะ แฮะ จูะ อี ซีนัม.
15 บลาง ซีแง ตี บอ แคร เฆ ดูอี ฮาย ดูอี มืก, แกวะ แตห เฆ โบง ฮาว อี ฮาย อี มืก.
16 แม แฮะ ดึอม ฮาว แคง โดง โตห อึม นัมมูกซารา? แม แฮะ ดึอม แณต ฮาว ดี กาดัม อึม โดง ลึก กาเซา?
17 แฮะ ดึอม มึห อี บยัะ มาโลห มืง มารานัะ ดี แม? แม แฮะ ดึอม ยึร มาโลห อี ลึบ แคง กาเดา โดง กอย ดูอี ยัม?
18 แม นับ แคะ กาว็อห แคะ ตาง กาดาย นี? เซ แม แฮะ นับ โตต ดอน โมยว ลอง อัน ตี, แตห แม กาลาง ดี โอว.
19 อึณเตณ อี แตห อี ฌัม โดง บลาง กอย ดี เหมา? บอ โดง อับ ว็อง กอย กาซืร เหมา?
20 แม ปึอน โบง แตห บลาง บอ อับ ว็อง ตี วี เวณ โดง กอย บรีม เฆ? แม นับ อึณเตณ อี ฮาว โดง กอย เฆ ตี?
21 แม แฮะ กาอาบ นับ ลอง อัน ตี. โคว, อึณ ปี แม แฮะ ฆึอด ดี อาต มึห อับ ฆาย บลาง. อาซาก แม มืร ปี อึณ แฮะ กืน หลึอม ฆาย ตี.
22 แม แฮะ ดึอม ลึบ ยอด แคง โฮง โดง อูน โอว อึม ดาด, บอ โดง อูน โอว เบรีย?
23 โอว แฮะ เครียง อูน อาดา ปัน ดี มึห ดูก, มึห อาเพ อาเร บอ ปัน ดี มึห อาคราว ดี ลาย กาโฆห ดูอี.
24 แม แฮะ ดึอม ฌัม โดง กาย็อห เลห บลาง ปลัะ อึณเปลต บอ โดง ตัห คูน นา เลห ซีแง อี บูด กาย็อห ฮาว ดอน นา ดอน โปละ?
25 อาเซ แฮะ ฆึห โรง โบง แตห อึม ฆลาย โนะ นา แคง? บอ ยัห อูน อึณเตณ เบล กาซัห?
26 อาเซ แฮะ แตห ฆลาย โจห แคง แปร กาฮ็อห, โดง ตู มึห ตู กอย ดูอี คอ อู วี?
27 อาเซ แฮะ ดึห อึม, รึก กาดาย อี แฮะ กาฮ็อห ต็อง, วี แตห เปต เฆ แปร วี มึห กาแดะ, มึห อึณโลห กืน กาเซา?
28 กาลาง ดี โอว โยว ฆลาย ตี มึห ฆูณ. แตห โอว บอ นับ อาเซ แฮะ โบง อึม ดีงาน แบน โบ็ง แบน โบ็ง?
29 อึม ดาด เฆ อึม เบรีย เลห ตัห แคง วัต อาเซ? อาเซ แฮะ กาดูห ดี ตู อัห ดี ฆึอด อึม ดาด บอ อึม เบรีย แคง ฆางหราว, แตห อึณ ปี อีบึณ ตู อัห ดี ฆึอด ฆอน?
30 อาเซ แตห อึม โปลม ปี มาว, บอ แตห กางีว อึม โปลม ดีฆัต?
31 แม บอ ปึอน ดึห วัน ปัก พึง ซีมัณ อี จืร ปาลีอาด? บอ นับ ดี ฆ็อห เลห วัน ดี พึง ซีมัณ อี จืร โอวรีโอน?
32 แม บอ ปึอน แดะ เลห พึง ซีมัณ ตี เซ แฮะ ฌัม อาคราว อัน? แม ปึอน ดี แยต พึง ซีมัณ อี จืร มาเฆรห บอ พึง ซีมัณ อี จืร ฆอน มาเฆรห?
33 แม นับ ลอง ปวน อี ปาย ดี อึบ แคง ฆางหราว? แม นับ ดี โบง แตห ปวน ตี อึบ บอ แดง กาดาย นี?
34 แม นับ ดี ดัด ตาง แตห อึณอูะ โทม โฆรห แม บอ แตห ฆลาย ตาง โจห แดง แม อู เฌณ?
35 แม ปึอน จัร ปลัะ อึณเปลต, แตห อึณ มาบรีว ฮาว? แฮะ ฮอต อึณ บอ นับ ดี วี ต็อห ดี แม, ‘โอว กอย ดี นี’?
36 อาเซ แฮะ นับ ดี ดึห อางยาน, วี ฮับ แคง น็อห ดูอี? อาเซ นับ ดี ดึห อี กาหลูห ดี น็อห แบน โมยว แบน โมยว, วี ฮับ อูน แคง น็อห พึอม ดูอี?
37 อาเซ แฮะ มึห อางยาน, แฮะ นับ ดี ตีห แคะ กอย อึณอูะ? อาเซ แฮะ ปึอน ฮูห เลห กาเปา อึม อี กอย แคง ฆางหราว
38 ดอ กาปูห แฮะ วี โปลม ปี ฮีน, บอ กาดาย แฮะ วี ลาย กาดึก รีด?
39 แม วีน ดี เหรต ปี ดี โฮม อาดา มาครังซี, บอ เฮียง แตห บอ ฆอน อัน ปึอน ดี โฮม.
40 ดอ แฮะ กอย เครียง เฆ แคง กาเดา มาว บอ ดอ แฮะ กาตับ บัร เฆ ปี ดี โฮม บอ กอย ครึม แปร?
41 อาเซ เฮียง เฆ มากาอัะ ดอ แฮะ กาปราณ เฆ ปี ดี โฮม บอ บึณ วีว บึณ เวณ ดอ แฮะ ฮัม แดะ เฆ ดี เฌาพรา บอ หมาณ ปี ดี โฮม?”