อาเอลีฮู ปี วี กาลาง ฮาว ปัว ต็อห, “ปวน เฌาพรา ตี แตห น็อห โอว ดียูห ดีเยณ. พึอม โอว กอ แหนน ดี โตต.

2 แตห เบ โทม โฆรห เฌาพรา อี แฮะ ตาง กาเซา, โทม บอ ฮัม กานัม แฮะ เลห แคง โมต อัน.

3 อัน เฌา แฮะ เบลห ปลัะ อึณเปลต, แตห อึณ ฮาว กาลัต แคง เบลณ กอ วี ฌัม โดง ซืด กาดาย.

4 วาย อัน ตี ฮัม กานัม บอ มาบลึง ตัห, อึณ ปี โฆรห เฌาพรา อี ตาง กาเซา อี บยัะ แคะ ตาง ปวน อัน.

5 โฆรห ปี กาลาง เฌาพรา ตี อึณ บอ ปี ฮัม กานัม. อึณ บอ หมึอม อาม กาเซา. อัน เฌา บอ นับ ดี โบง อี อาเร ตาง กาเซา ปี ฮู นับ เอ ดี เฌณฌา.

6 อัน เฌา มืร จัร อึม ดาด, แตห อึณ โจห แดง กาดาย. อัน มืร จัร ฆลาย, แตห อึณ โจห แฮณ กาเซา.

7 อัน เฌา มืร โบง แตห เฆ ดูอี ดอน อี แปะ แฮะ พาน เบลห อัน นับ, อึณ มูห เฌาพรา อี แฮะ โบง ปาย ตี. อัน บอ โบง แตห เฆ ฆืด ดีเหลา ดี โบง ฆาน เฆ.

8 แคะ กอย เฆ มาโดว แปร มืร วี ลึบ กอย แคง กาเดา เฆ.

9 คูน ลาง บอ ตัห บลาก นา เตต. คูน เฆียด บอ ตัห บลาก นา กัว.

10 เฌาพรา บอ ฮึห พึอม อัน อี เฆียด กาเซา, แตห อึม กอ โฆระ โปลม. บอ อึม ดึง บอ อึม นัมมูกซารา นับ ดี โฆระ โปลม ปาย ตี.

11 อัน เฌา บอ ฮับ ฆลาย แคง อึณอูะ, แตห อึณอูะ บอ เฮต กาเซา. แฮะ ฮอต อัน วี แตห ปลัะ อึณเปลต มาบรีว เลห กาแต อึณอูะ ตี.

12 อัน เฌา บอ แตห ฆลาย เฆ คูน แล แลบ, แตห เฆ โบง แคะ ปี จัร อัน.

13 เฌาพรา แตห ฆลาย ตาง โจห แดง กาดาย นี, แตห อึณ ดัม หมาบ ดี ดูอี. อัน เฌา ยอด แมน ลึมลา แปร กาดาย, แตห ดูอี บอ ยึร น็อห ร็อก กาเว อัน.

14 อึย อาโยวบา, แตห แม โทม โฆรห ปี กาลาง โอว นี. แตห แม วี กาดัวะ กาพา ลอง อี แฮะ หมึอม อาม กาเซา แปะ แฮะ โบง อัน เฌา.

15 แม นับ, เฌาพรา ปาย เหมา ดี อึบ อึณอูะ, แตห เฆ โบง ปี อึง อัน บอ โบง แตห อึณ มึห ปลัะ อึณเปลต?

16 แม นับ, เหมา เฌาพรา ปาย ดี โบง, แตห อึณอูะ ฮาว แคง เบลณ? อึณ บอ บยัะ ปี โบง เฌาพรา แฮะ หมึอม อาม กาเซา. อึณ บอ บยัะ ลอง อางยาน เฌาพรา แฮะ เฌะฌูง, แตห อัน บอ นับ ดี โบง โตต ดอน โมยว.

17 เซ คูน กาฮัวะ ฮี บูด ตัห บลาก นา เตต, อึณ ดี แตห ครึง ตา แม กาฮัวะ แหม ดี โดว แม.

18 แม ยี ตู ปึอน บลัห เบลณ ปี ปี โบง อัน เฌา. แม ตู ปึอน แตห อึณ กอ วี โปลม ปี บ็อง บอ กาลัะ มาบรีว ปี แอบ ฌัม.

19 แตห แม มาโนว เย, แตห เย นับ ปี ดี ปาย ดี กาลาง ดี เฌาพรา. เย อาว ฮู ปึอน กาลาง ลอง อาเร เย. โคว, เย แฮะ กอย แคง อับ ว็อง, อาว ฮู นับ ปี ดี ปาย ดี กาลาง.

20 อึณ ตู กาอาบ โอว กาลาง โฆรห ดี เฌาพรา. อาว มึห อาเซ อี แฮะ ยัะ กาลาง ซืร ดี เฌาพรา. โคว, ดอน อี บอ โยว ดี ยัม.

21 เซ คูน แฮะ บูด แคง ฆางหราว, แตห บลาง ซีแง ลึห ซีคยา, อาว มึห ดูอี อี ปึอน ยอด บลาง ซีแง ตี.

22 อาโรง บลาง อี ปี ครีว บอ ตัห บลาก นา กัว, อึณ ปี เฌาพรา แฮะ บยัะ อาพูง ดังโคว อัน อี หมึอม โยว กาเซา.

23 อาพูง ดังโคว อัน เฌา อี อึบ โตต ดอน โมยว แฮะ ตาง กาเซา. เอ มืร ตู ปึอน ฮาว กาตัด ฮาว เครียะ อัน เฌา. อัน เฌา บอ มึห น็อห ซืร น็อห หมาน, บอ ซูงพยาด อามู ดูอี บอกาเฆลียด แตห อึณ การัม.

24 โคว อัน ตี, ดูอี โรวเซ อัน เฌา. อัน เฌา ยี ตู ยอด ตู งึอบ ดูอี อี แฮะ ทาง เฆ แฮะ หล็อก, แฮะ มึห อางยาน.”