วาย อัน ตี อาเอลีฮู ปี วี กาลาง ฮาว ปัว ต็อห,

2 “โอว หมาณ, แตห แม โอด น็อห, กอย โทม ปอ อี แจก. โอว ดี บยัะ ปี ปาย ลอง อัน เฌา ปอ อึณ ปัว.

3 โอว ดึห ตัห แคะ ปี นับ โอว ดี เฆ อี แฮะ กอย โต็ง กาเซา. โอว ดี วี กาลาง ลอง เฌาพรา อี มึห น็อห ซืร น็อห หมาน อี แฮะ พาน เบลห โอว.

4 โฆรห ปี กาลาง โอว อึณ บอ มูห โฆรห มูห โฆรห หมาน อาคาคัร. วี อี แฮะ มึห อางยาน อี เฌะฌูง แฮะ กอย รึม โดบ แม.

5 เฌาพรา มึห ปวน ตาง กาเซา. ปี บอ แฮะ ปาย ตี มืร, อัน เฌา ยี ตู กาอีห อาเซ. อัน เฌา มืร นับ โตต ดอน โมยว.

6 อัน ตู แตห เฆ ดูอี ฮาย มึห อาซาก โต็ง. อัน เฌา ยี ซูงพยาด แตห อึณ การัม ดี เฆ ดูอี อี แฮะ กาดูห ดูก.

7 อัน เฌา บอ ยอด แมน เฆ อี มึห น็อห ซืร น็อห หมาน เซเซ. อัน บอ ควาง แตห เฆ อึบ มืง, แบน อามู อามาด คูนดีคัม. อัน บอ แตห เฆ ปึอน ปี อืบ มยูก อี เฮา.

8 มาแล, เซ อึณ มึห ดูอี อี กาดูห ปัก ตา วัน ฮีน, บอ วี คัม ดูก โกบ ปี กาลึบ เฆ,

9 เฌาพรา บอ วี บยัะ ดี เฆ ลอง แปะ แฮะ โบง เฆ มูห หมาบ. อัน บอ บยัะ ดี เฆ ลอง มึห เฆ น็อห ปีคึก.

10 อัน เฌา วี แตห เฆ โทม โฆรห ปี มาโนว อัน บอ วี กาลาง แตห เฆ แวน อี ตู หมึอม ปี โบง เฆ.

11 เซ เฆ โทม โฆรห อัน เฌา บอ โบง ฆาน อัน, เฆ ดี บอ ปึอน ดี กอย ดาคึย, กอย ฆยามซา บอ โจว เฆ.

12 เซ เฆ ยี ตู ดึห ตู โทม โฆรห อัน เฌา ตี, เฆ ดี บอ คัม อาเพ อาเร. เฆ ดี ลึร ชึม ดี มาปัวะ ลาง บอ ยัม ฮาว โกบ ตู มึห เฆ อางยาน มาเซ.

13 เฆ ดูอี อี ตู มึห น็อห ซี โรวเซ เฌาพรา, เฆ บอ รู บอ อูน น็อห ดี อัน เฌา. เฆ ปี บอ แฮะ กาดูห ดี คัม หมาบ เฆ มืร, เฆ ยี ตู ซาคึร แตห อัน เฌา จอย เฆ.

14 ดูอี เฆ ตี, เฆ มืร ดี บอ ยัม ดอ ซี หนึม ซี ดีรอย เฆ. อาซาก เฆ ดี บอ ชึม ดอ กอย รึม เฆ โดบ ดูอี อี โบง อี หมึอม ซาย.

15 มาแล, เฌาพรา ยี ดี ปึอน ดี คยอด ดูอี อี คัม ดูก ตาง. ดอ คัม เฆ ดูก ตาง ตี, อึณ แตห เฆ วี มึห น็อห ซี โทม โฆรห เฌาพรา.

16 ปาย ตี เฌาพรา ซี แยต แตห แม เลห แคง อี ดูก อี หณาบ ดี น็อห แม ตี, แตห แม วี กอย โดง ดาคึย กาว็อห อี ตู มึห อี ฆีด อี โคง มาเซ. อัน เฌา ดี วี ดัว ปี ดี โฮม อี ซีแงห, แตห อึณ กอ วี โนะ แดง มาตีณ โบม แม.

17 มาแล, ดอ ตี นี แม ยี แฮะ ฮอต คัม อัน เฌา ดัม หมาบ ดี แม แคะ กาอาบ คัม ดูอี ฮาย ดูอี มืก. อัน เฌา ยี แฮะ ฮอต ซูงพยาด แคะ ปี โบง กาลึบ แม.

18 แตห แม ซาดีก โยว อี เฮา วี กาซูห แม, แตห แม วี มึห น็อห ซี ปึอน กืน โกรวกราม. แกวะ แตห แม กาลึบ ดี ดึห รึอน ปี ปรา อี เฮา ดี ดัว.

19 โกรวกราม ฌึร ตี ดอน โมยว บอ แคะ โฆยวฆยา แม ดี โบง, อึณ ตู แป ดี แตห แม ลอด แคง ดูก.

20 แกวะ แตห แม กาปรา แตห อึณ ฌัม แคง หมึร. โคว, อึณ มูห อาคราว แฮะ ยัม แฮะ หราย ดูอี กืน แบน โมยว แบน โมยว ดอ กาโฆห เฆ.

21 แตห แม ซาดีก, แกวะ แตห แม วี โบง หมาบ. ดูก ตาง ปี กาดูห แม ตี, อึณ แฮะ แคร แม, แตห แม แป ดี วัห หมาบ ตี.

22 อาพูง ดังโคว เฌาพรา ยี แฮะ ตาง กาเซา. อาว มึห อาเซ อี แฮะ ปึอน มาโนว แม ปี อัน เฌา.

23 อาว มึห อาเซ อี แฮะ ปึอน จัร เฌาพรา โบง ฆาน อัน. อาว มึห อาเซ แฮะ ปึอน ต็อห, ‘แม เฌา แฮะ โบง กาลึบ.’

24 ดูอี แฮะ ต็อห โหมว อี อืบ มยูก ลอง แปะ แฮะ โบง อัน เฌา. แตห บอ แม วี อืบ มยูก อัน เฌา ปาย ตี. แกวะ แตห แม ปีว.

25 แคะ กอย ดูอี บอกาเฆลียด แดง กาดาย, เฆ แฮะ ยึร แปะ แฮะ โบง อัน เฌา ตี. เฆ ยี กอย กาโต็ง ยอด.

26 เอ ตู ปึอน นับ แคะ ตาง เฌาพรา. อาซาก อัน เฌา มืร ตู ปึอน ตีห.

27 อัน เฌา บอ โบง แตห อึม แดง กาดาย วี โฮะ นา แดง, แตห อึณ วี แบน ฆลาย.

28 แฮะ ฮอต, อึม ฆลาย วี โจห โลง แคง อึณอูะ, วี แบน ฆลาย ตาง อาดา ดูอี บอกาเฆลียด.

29 อาว มึห อาเซ อี แฮะ ปึอน นับ ลอง อึณอูะ อี กาย็อห ฮาว ดอน โปละ. อึณ มืร ตู มึห อาเซ อี นับ ลอง ฮัม กานัม อี แฮะ เลห ตัห โดง กอย อัน เฌา.

30 อัน เฌา มืร เบลห ปลัะ อึณเปลต อัน, แตห อึณ กอ กาลัต แคง เบลณ. อัน เฌา ปี วี ดึห อับ ว็อง, วี ซีบลึก อูน กาดัม อึม นัมมูกซารา โดง ลึก กาเซา.

31 อัน เฌา มืร ดึห ปวน อัน ตี, วี ซูงพยาด ดารา ดี ดูอี บอกาเฆลียด. อัน วี ดัว ปี ดี โฮม ดี เฆ, แตห อึณ กอ วี กาโลย กาหลึอม.

32 อึณ ปี อัน เฌา แฮะ กาเนียม โนะ ปลัะ อึณเปลต แคง แด อัน, วี เบลห อามีง ดี ปลัะ อึณเปลต ตี, แตห อัน ฮาว โดง แฮะ เยง อูน อัน เฌา.

33 ฮัม กานัม ปี เบลห อัน เฌา, อึณ บอ บยัะ ลอง คูน ตาง บอ ฆลาย ตาง ดี ตัห. บอ พึง มาบู เฆ พึง มามัก นับ ลอง คูน ตาง เฆ ฆลาย ตาง ดี ตัห.”