วาย อัน ตี อาเอลีฮู วี กาลาง ฮาว ปัว ต็อห,

2 “อึย อาโยวบา, แม แฮะ ต็อห, ‘โอว แฮะ มึห น็อห ซืร น็อห หมาน ดี อาต เฌาพรา.’ แม ทาง โฆรห ตี แฮะ หมาน?

3 แม มืร แฮะ วี ดีหมอด เฌาพรา ต็อห, ‘เซ โอว ตู โบง หมาบ, อึณ ดี แบน อาฆยึร มาเซ ดี โอว?’

4 โอว ซี กาลาง ลอง อัน ตี ดี แม บอ ดี เฆ ฆึก แม อี กอย รึม โดบ แม.

5 แตห แม ซากึห ยอด ฆางหราว, แตห แม ยอด อึณอูะ อี แฮะ กอย จา กาเซา.

6 เซ แม โบง อี ตู หมึอม, อึณ ตู ปาย เหมา ดี เฌาพรา. แม ปี บอ แฮะ โบง ลูต แบน เฌณ แบน เฌณ มืร, อึณ ตู ปาย มาเซ ดี อัน เฌา.

7 เซ แม มึห น็อห ซืร น็อห หมาน, แม ดี ดัว อาฆยึร มาเซ ดี อัน เฌา? อัน เฌา ดี ปึอน ดึห มาเซ ดี แม?

8 อี ตู หมึอม ปี โบง แม มืร, อึณ แบน อาเพ อาเร มี ดี แม. นา ซืร นา หมาน มืร อึณ แบน อาฆยึร มี ดี เฆ ดูอี กืน.

9 ดูอี บอ ดัด ยาม ตาง โกบ แฮะ มึห กืน กาเซา อี คาหนาบ เฆ. เฆ บอ ยาม แดะ แตห อึณ มึห อี ตัห จอย เฆ โกบ เฆ ดูอี อี มึห โปลม ตาง แฮะ คาหนาบ เฆ.

10 มาแล, อึณ ตู ดึอม มึห อี ดีหมอด ต็อห, ‘เฌาพรา อี พาน เบลห โอว, อัน กอย ดี เหมา?’ อัน เฌา บอ มูห เฌาพรา อี แตห โอว ปึอน ดี ต็อห โหมว แคง หมึร.

11 อัน แฮะ มาโนว เอ ดูอี หลึอม มาโนว อัน โดว ซัดดาวา. อัน เฌา แฮะ แตห เอ มึห อางยาน หลึอม มาซีม อี บึณ แคง เบลณ.

12 ดูอี ปี บอ ดัด แดะ อี ตัห จอย เฆ มืร, เฌาพรา ยี ตู โทม โฆรห เฆ โกบ ปีคึก เฆ น็อห เฆ.

13 แฮะ หมาน อาคาคัร, เฌาพรา ตู โทม เซ ดูอี กาลาง โฆรห ปีเยณ, โฆรห ดีโลย ดีลาย. อัน เฌา อี อึบ โตต ดอน โมยว ตู ณึงราง ยึร โฆรห ฌึร ตี.

14 แดง ตี, อัน เฌา แฮะ แว ตู แตห อัน โนว อัน นับ เซ แม ต็อห, แม ตู ยึร อัน เฌา. อามู แม ยี แฮะ กอย ดี อาต อัน เฌา. แม มืร โลว บัร อัน.

15 อัน เฌา มืร ตู โนว เซ แม ต็อห, อัน ตู ดัม หมาบ โกบ แฮะ รู กาเซา อัน.

16 ปาย ตี อาโยวบา นับ ดี กาลาง โฆรห ดีโลย ดีลาย, โฆรห ปีเยณ. อัน ปี บอ ตู นับ มาเซ, อัน ยี กาลาง โฆรห กืน.”