วาย อัน ตี อาเอลีฮู ปี วี กาลาง ฮาว ปัว ต็อห,

2 “อึย เบ ดูอี อี มึห อางยาน, แตห เบ โทม โฆรห โอว. เบ ดูอี อี ทาง เบ แฮะ นับ กืน, แตห เบ โทม ปี ต็อห โอว.

3 โคว, อาโหยะ นับ ดี แฌดเซ โฆรห ปี โมต นับ ดี จีม ปี ดี โฮม.

4 แตห เอ ซูงพยาด ราง เอ อา เหมา แฮะ หมาน, แตห เอ ร็อห กาแต เอ, อา เหมา อี แฮะ หมึอม.

5 อาโยวบา แฮะ ต็อห, ‘โอว ตู มึห ดี โบง หมาบ. มาแล, เฌาพรา ตู ต็อห, โอว แฮะ มึห น็อห ซืร น็อห หมาน.’

6 อัน บอ ต็อห, ‘โอว ปี บอ แฮะ มึห น็อห ซืร น็อห หมาน มืร, อึณ ยี ปี โอว มูห ดูอี อี ซีมา กาโลว. โอว ปี ซัะ มึห หมาบ มืร, โอว ยี วี ด็อะ เซา รอฆา อี ตู นับ ดี หราย.’

7 อาว มึห อี คัม ดี พยาก เฌาพรา คอ อู วี อี ปี อาโยวบา. อัน บอ คัม ดี แนนัะ อี ปี อัน เดียง อึม.

8 อัน บอ กอย รึม โดบ ดูอี อี ตู หมึอม. อัน บอ ฮาว โดบ ดูอี ฮาย ดูอี มืก.

9 โคว, อัน มืร ต็อห, ‘เซ ดูอี ดาคึย ดี โบง ปี อึง เฌาพรา, อาว มึห อาฆยึร มาเซ.’

10 ปาย ตี เบ อี มึห อางยาน หมึอม, แตห เบ โทม โฆรห โอว. เฌาพรา ตู โบง นา ตู หมึอม ดอ เหมา. เฌาพรา อี อึบ โตต ดอน โมยว ตู นับ ดี โบง กาลึบ.

11 อัน เฌา วี โบง เวียะ แคะ ปี โบง เอ ดูอี. อัน เฌา แตห ดูอี ดอน อี วี คัม แคะ กาดาน ปี โบง เฆ.

12 อึณ แฮะ หมาน อาคาคัร, เฌาพรา ตู โบง นา ตู หมึอม. เฌาพรา อี อึบ โตต ดอน โมยว, อัน ตู ซูงพยาด อี ตู โดบ ดารา.

13 อาว มึห อาเซ อี แฮะ ดัว อาพูง ดังโคว ดี เฌาพรา. อาว มึห อาเซ อี แฮะ ดัว ปวน แตห อัน เฌา อึบ กาดาย.

14 เซ เฌาพรา อูน น็อห ดี ดึห วีว น็อห พึอม อัน, 15 ดูอี บอกาเฆลียด ดี บอ ยัม โตต, วี แบน กาดาย ปี บรีม.

16 เซ เบ มึห อางยาน อี แตห อึณ กาหลูห ดี น็อห เบ, แตห เบ โทม โฆรห โอว.

17 ดูอี อี ฌ็อง ดารา อี มูห อี หมาน, อาว กาอาบ แตห อัน อึบ ดูอี. อึณ มืร ตู มึห อาเซ อี ยัะ วี ดัม หมาบ ดี เฌาพรา อี แฮะ มึห น็อห ซืร น็อห หมาน บอ มึห อาพูง ดังโคว ตาง.

18 อัน เฌา นับ ดี กาลาง ดี คูนดีคัม ต็อห, ‘แม ตู มึห ดีโคว มาเซ.’ อัน บอ นับ ดี กาลาง ดี เฆ ดา กาณา อี อึบ มืง ต็อห, ‘เบ มูห ดูอี ฮาย.’

19 อัน เฌา มืร ตู วาง โฆรห ดี ฆอน คูนดีคัม. อัน มืร ตู ร็อก ตู ฌ็อง อาเซ. อัน มืร ตู ร็อก ดูอี ครัม หลึอม ดูอี ดูก ดูอี ฆีน. โคว, อึณ บอ มูห อัน เฌา อี พาน เบลห เฆ ดอน อี.

20 ดูอี ดอน อี เฆ กอย อู กาจัน อู กาบรึห, แฮะ วี ยัม ดอ กาแต ซึอม. ดูอี บอกาเฆลียด ดียูห ดีเยณ บอ ยัม ฮาว. เฆ อี แฮะ มึห โปลม ตาง, มึห แฮณ กืน, เฆ มืร ยัม, ยี ตู มูห ดูอี อี ง็อห ยัม เฆ.

21 อัน เฌา บอ ยอด อึณเตณ ปี โดบ เฆ ดูอี. อัน บอ ยอด โดง แณต โดง ฌาบ เฆ ดอน ปัน.

22 อึณ มืร ตู มึห โดง อับ ว็อง กาเซา อี มูห โดง ดี ปึอน ฮาว เครียง เฆ ดูอี มึห หมาบ.

23 เฌาพรา ตู โลว แฌดเซ ปี ปาย ดูอี บอ ตู โลว ป็อก อาคราว ดี ซูงพยาด อามู เฆ.

24 อัน เฌา บอ โบง แตห เฆ อี มึห ปวน ตาง โจห เตียม, ปี วี ดาง วี เฮา, แตห อึณ วี ปลูะ เฆ. อัน เฌา มืร ตู โลว ดีหมอด อาเซ ลอง อัน ตี.

25 อัน แฮะ ฮอต นับ ปี โบง เฆ. แคง หมึร อัน มืร ซาฆึบ แวน เฆ, แตห เฆ กอ ลึร ชึม โตต.

26 อัน เฌา มืร ซูงพยาด อามู เฆ อี มึห หมาบ, แตห อึณ ลึห ซีคยา บอ ดี เฆ ดูอี กืน.

27 โคว, เฆ แฮะ แวน ดารา อัน เฌา. เฆ มืร ตู ซี โดบ ปี จัร อัน เฆ โบง.

28 โกบ โบง เฆ ปาย ตี ปี ดัด ปี ยาม เฆ ดูอี อี ตู มึห โปลม เฆ แฮณ, อึณ บอ ลึห ฌัม โดง กอย อัน เฌา. อัน เฌา มืร แฮะ โทม ปี ยาม เฆ ดูอี อี แฮะ คัม ปี คาหนาบ อี เฮา.

29 เซ อัน เฌา ยี กอย หนีม หนีม, อาว มึห อาเซ อี ปึอน ดัม หมาบ ดี อัน. เซ อัน เฌา แฮะ เครียง อัน, อาว มึห อาเซ อี ปึอน ยึร อัน. อัน เฌา อี อึบ โตต ดูอี บอ มูห ดูอี วี เหมา อาว ต็อห, ดูอี โมยว เหมา อาว ต็อห, อัน เฌา อึบ โตต เฆ.

30 อัน เฌา มืร ตู แตห เฆ ดูอี อี ตู หมึอม ปึอน ดี อึบ ดี บึง มืง. แกวะ แตห เฆ ปึอน ดี ดีณ ยอต เฆ อาดา อี เฮา.

31 เซ อึณ มึห ดูอี อี กาลาง ดี เฌาพรา ต็อห, ‘โอว แฮะ ฮอต โบง หมาบ. วาย นี โอว มืร อาว ฮู โบง กาลึบ, อาว ฮู โบง บลืง ปัว.

32 หมาณ, แตห แม เฌา มาโนว ปี ตู นับ ปี ตู ยึร โอว. เซ โอว แฮะ โบง อี ตู หมึอม มืร, วาย นี โอว อาว ฮู โบง ปอ อึณปัว.’

33 เซ เฌาพรา ซูงพยาด ลอง อัน ตี, อึณ ตู ปึอน แตห อึณ โดบ ปี อึง แม. อึณ ปี แม ตู ซี แวน หมาบ แม ตี. อึณ มูห แม อี โลว ซูงพยาด แคง น็อห แม. อาว มูห โอว. แคะ ปี นับ แม, แตห แม กาลาง โตต ดี โอว.

34 เฆ อี นับ แบน โมยว แบน โมยว อี กาหลูห ดี น็อห เฆ, เฆ นับ ดี มาโนว อี. เฆ อี มึห อางยาน หมึอม ฮี ยึร โฆรห ปี กาลาง โอว ตี, เฆ ดี บอ ต็อห,

35 ‘อาโยวบา นี, อัน กาลาง ปี ดูอี อี ตู นับ มาเซ. โฆรห ปี กาลาง อัน, อาว มูห โฆรห อี มึห อางยาน.’

36 อัน แฮะ วี เวียะ โฆรห ปี ดูอี ตู หมึอม. โคว, อึณ กาอาบ อี เทว น็อห อัน, แตห อี กอ นับ โตต ปี ปาย น็อห อัน.

37 แดง แฮะ โบง อัน หมาบ อี ตู หมึอม ตี, อัน วี กาบัห บอ ดี เฌาพรา. อัน มืร ลาย กาแคณ บอ ดี เย. อัน มืร แฮะ กาลาง กืน นา ตู หมึอม ลอง เฌาพรา.”