อึย อาโยวบา, ดอ ตี นี แตห แม โทม ซีคยา โฆรห ปี กาลาง โอว, แตห แม โนว โตต ดอน โมยว โฆรห ปี กาลาง โอว.

2 โอว มืร แฮะ ซี กาลาง กาเซา โฆรห. โฆรห ปี ซี กาลาง โอว มืร, แฮะ ซี เลห กาเซา แคง โมต โอว.

3 โฆรห ปี กาลาง โอว ตี, อึณ บอ มูห โฆรห ซืร ซืร หมาน หมาน ดอน แด. โอว มืร ดี กาลาง มี โฆรห อี มูห อี หมาน แคะ ปี นับ โอว.

4 น็อห พึอม เฌาพรา แฮะ พาน เบลห โอว. เฌาพรา อี อึบ โตต ดอน โมยว แฮะ ฮับ พึอม อัน แคง โดว โบ็ง โอว, แตห โอว มึห อาซาก.

5 เซ แม นับ ดี วี เวียะ โฆรห โอว ตี, แตห แม เวียะ. แตห แม แรน อูน โฆรห ปี ดี กาลาง แม, แตห แม กาลาง ซืร ดี โอว.

6 โอว บอ ปี แม ดี อาต เฌาพรา. อัน เฌา แฮะ ดึห กาดาย, พาน เบลห บอ แม บอ โอว.

7 ปาย ตี แม ตู โลว โยว โอว. โอว มืร ตู กาอาบ โบง แตห อึณ ดูก หณาบ ดี น็อห แม.

8 โอว แฮะ ยึร ซีคยา โฆรห ปี กาลาง แม. แม แฮะ ต็อห,

9 ‘โอว ตู มึห ดี โบง อี ตู หมึอม, ตู มึห ดี โบง ลูต ดอ เหมา. น็อห โอว แฮะ ซีงา ตู มึห หมาบ มาเซ.

10 อึณ ยี มูห เฌาพรา อี ตู อึง โอว, มาด โอว มูห รันซู อัน.

11 อัน เฌา แฮะ ดึห ทาง ชึบ ดี เปลา โอว บอ บัร โดบ อึณเตณ โดง ว็อะ โอว ดอน โปละ.’

12 อึย อาโยวบา, โอว กาลาง ดี แม, ปี กาพา แม ตี, อึณ ตู หมาน. โคว, เฌาพรา แฮะ บอด แฮะ มยาด หลึอม ดูอี.

13 เหมา อึณ ปาย ปี ปึณ แม ดี เฌาพรา บอ ต็อห, ‘อัน เฌา ตู โทม โฆรห โอว คอ อู แด.’

14 เฌาพรา ยี แฮะ เวียะ โฆรห อี. อู จึบ อัน แฮะ กาลาง อู โมยว. ปอ อู จึบ อัน ปี วี กาลาง ปอ อู โมยว. อึณ ยี มูห ดูอี อี ตู นับ ดี โทม.

15 แคง หมึร ดอ แฮะ ปึอน เฆ ดี อีด ดาคึย ดาคึย แดง กาโช็ง อีด เฆ, เฌาพรา บอ นับ ดี กาลาง โฆรห ดี เฆ ดอ อึณบาว เฆ บอ บยัะ นีมีก ดี เฆ.

16 อัน เฌา แตห เฆ โทม โฆรห อัน, แตห เฆ บอ วี กาจัว ลอง โฆรห ปี มาโนว อัน ตี.

17 อัน ซี แตห เฆ แวน ปี โบง เฆ อี ตู หมึอม, แตห เฆ แวน บอ น็อห ปีคึก เฆ.

18 อัน เฌา มืร คยอด เฆ, แกวะ แตห เฆ ฌัม แคง กาเดา บาเรว. บอ แกวะ แตห อาซาก เฆ ชึม ดี มาปัวะ ลาง อี เฮา.

19 เฌาพรา มืร มาโนว เฆ ดูอี, แตห เฆ มึห เซา รอฆา, อาว ปึอน ยีต แดง กาโช็ง อีด เฆ. อึณ บอ เซา ฌัม แคง กาอาง เฆ ดอน โปละ.

20 อึณ แตห อัน กอ ปึร ปี ดี โฮม. แกวะ แตห อัน มึห น็อห ซี โฮม มาเซ อี ซีแงห กาเซา.

21 ยัง อัน มืร แกร ดี โยม โลง, แตห อึณ กอ ฆีด มี ฮูน ฆาย กาอาง.

22 อัน มืร แฮะ รีน ดี ยัม ฮาว กอย แคง บาเรว. เฌา มารานัะ มืร แฮะ บัร ดี รวห อัน.

23 เซ อึณ ยี มึห อามู อามาด เฌาพรา อู กาดัง อี กอย แคง พึง แบน แหรณ แบน แหรณ, อัน บอ นับ ดี กาลาง นา มูห นา หมาน ดี ดูอี, แบน ดูอี ดี กาแต. เซ อัน บอ มึห น็อห ซี จอย ดูอี วี ตี,

24 เซ อัน บอ วี กาลาง ดี เฌาพรา ต็อห, ‘แกวะ แตห อัน ยัม. แฮะ ฮอต มึห อี ดี ทูด เลห อัน.’

25 เซ อึณ มึห อามู อามาด เฌาพรา อู กาดัง อี โบง ปาย ตี ดูอี อี แฮะ รีน ดี ยัม ตึอน, อัน ดี แกน, วี มึห โปลม มึห แฮณ ปี ดอ ซี หนึม อัน.

26 ดอ ซาคึร ดูอี ตี, เฌาพรา ดี วี โทม โฆรห ปี ซาคึร อัน. อัน มืร ดี โคย ดาคึย, วี อืบ มยูก เฌาพรา. โคว, เฌาพรา แฮะ วี ดัว น็อห ซืร น็อห หมาน ดี อัน บอ ตู แตห อัน ยัม.

27 อัน ดี วี ต็อห โหมว นา อาต เฆ ดูอี กืน ต็อห, ‘โอว แฮะ ฮอต กาลึบ. โอว แฮะ วี กาเบลียะ แตห อี มูห อี หมาน, วี แบน อี ตู หมาน. โอว ยี ตู โลว วี คัม หมาบ ปี กาอาบ โอว คัม.

28 อัน เฌา มืร แฮะ คยอด โอว, ตู แตห โอว โลง ฌัม มืง มารานัะ. โอว มืร ดี วี โบยว ดาคึย, วี กอย แคง บลาง.’

29 เฌาพรา บอ โบง นา หมึอม ปาย ตี ดี ดูอี, แตห อึณ กอ โนะ อา จึบ, โอย จึบ.

30 อัน เฌา โบง แตห ดูอี ลอด โจห มืง มารานัะ, แตห เฆ วี กอย แคง บลาง.

31 อึย อาโยวบา, แตห แม ซาดีก บอ โทม โฆรห โอว นี. แตห แม กอย หนีม หนีม, แตห โอว ปึอน ดี กาลาง ฮาว ปัว.

32 ปี บอ แฮะ ปาย ตี มืร, เซ แม ยี มึห ปี ดี กาลาง, แตห แม กาลาง. โอว ซี แตห อึณ แบน นา มูห นา หมาน ดี แม.

33 เซ แม ยี ตู มึห ปี ดี กาลาง, แตห แม กอย หนีม หนีม, โทม โฆรห โอว. โอว ดี มาโนว ดัว อางยาน ดี แม.