1 ปาย ตี เฆ โอย วี อาว ฮู มึห ปี ดี ต็อห มาเซ ดี อาโยวบา. โคว, อาโยวบา ยึร มี นา ซืร นา หมาน ปี โบง อัน.

2 มาแล, อาเอลีฮู อี มูห ฆอน อาบาราคีลา บอ ดูอี อาโมยว บูจา, อึณกรึห อาราม ตึอน, อัน บอ รู กาเซา ดี อาโยวบา โกบ อาโยวบา แฮะ ทาง, อัน แฮะ หมาน ดี อาต เฌาพรา.

3 อาเอลีฮู ตี บอ วี รู บอ ดี เฆ ฆึก อาโยวบา โอย วี ตึอน โกบ ตู มึห เฆ ดี บยัะ หมาบ ปี โบง อาโยวบา. มาแล, เฆ ยี ต็อห อาโยวบา แฮะ กาลึบ.

4 อาเอลีฮู แฮะ กอย บัร, แตห อัน ปึอน ดี กาลาง ดี อาโยวบา วาย แฮะ ฮอต กาลาง เฆ โอย วี ตี. โคว, อาซาก เฆ แฮะ กืน หลึอม อาซาก อัน.

5 ดอ วี ยึร อัน เฆ โอย วี ตี, เฆ อาว ฮู มึห ปี ดี กาลาง เฆ ดี อาโยวบา อัน บอ รู.

6 โคว, อาเอลีฮู อี มูห ฆอน อาบาราคีลา บอ ดูอี อาโมยว บูจา วี ต็อห, “โอว นี, อาซาก โอว ยี ซี เปรต, อาซาก เบ ยี แฮะ กืน. โคว, โอว แฮะ โยว, ตู ยัะ กาลาง แคะ ปี นับ โอว.

7 โอว ต็อห, ‘อึณ กาอาบ ดูอี กัด ดูอี แฆ กาลาง โฆรห. ดูอี อาซาก อี แฮะ กืน, แฮะ กาอาบ มาโนว อางยาน ดี อี.’

8 ดูอี เอ นี, เอ มึห น็อห พึอม ปี ดัว เฌาพรา ดี เอ. น็อห พึอม ตี แตห เอ มึห อางยาน.

9 อาว มูห มี ดูอี กัด ดูอี แฆ มึห อางยาน. อาว มูห มี ดูอี อาซาก อี แฮะ กืน นับ อี มูห อี หมาน.

10 โกบ อึณ ปาย ตี โอว ต็อห, ‘แตห เบ โทม โฆรห โอว, แตห โอว ปึอน ดี กาลาง แหน ดี เบ แคะ ปี นับ โอว.’

11 โอว แฮะ บัร ดี โทม โฆรห แปะ แฮะ กาลาง เบ. โอว บอ โทม ปี ปาย อางยาน เบ.

12 โอว แฮะ อูน น็อห ดี โทม ซีคยา ซีคยา โฆรห เบ. โอว ยี ตู ยึร คอ อู วี อี ปึอน กาลาง บยัะ ลอง หมาบ อาโยวบา. อึณ มืร ตู มึห คอ อู วี อี แป ดี เวียะ โฆรห อัน.

13 เซ ฮี ปาย ตี เบ ตู ปึอน ต็อห, เบ แฮะ มึห อางยาน. แตห อึณ มูห เฌาพรา กาลาง อี มูห อี หมาน ดี อาโยวบา. แกวะ แตห อึณ มูห ดูอี.

14 อาว มูห อาโยวบา แฮะ กาลาง โฆรห อัน ดี โอว. โอว มืร ตู กาลาง ดี อัน ปี แปะ แฮะ กาลาง เบ.

15 อึย อาโยวบา, ดูอี เฆ นี แฮะ ฮอต ฆว็อง แคง น็อห เฆ. เฆ อาว ฮู มึห โฆรห ปี ดี วี เวียะ เฆ ดี แม.

16 โคว, เฆ มืร อาว ฮู โฆรห. เฆ บอ ฮาว จ็อง ฆืด ดี ตี. เฆ มืร อาว ฮู ต็อห มาเซ. ปาย ตี โอว มืร ตู ซี บัร ดี กาลาง โฆรห ปอ อึณ ปัว.

17 โอว อาว ฮู คัม ดี บัร. โอว ดี กาลาง แหน โฆรห โอว แคะ ปี นับ โอว.

18 โคว, แคง น็อห โอว แฮะ มึห กืน ลอง ปี ดี โลว กาลาง. น็อห พึอม อี กอย แคง น็อห โอว แฮะ วี กาซูห โอว.

19 เซ โอว ตู ปึอน ดี กาลาง, อึณ ปี โดว โบ็ง โอว ดี กายาต มาตูห ปี ฮู ฮูน บรีม แปะ แฮะ ฮับ อี อึม มางูน กามาย.

20 โอว บอ โลว กาลาง เลห แคง โมต โอว, แตห อึณ วี ดาคึย ดี โอว.

21 โอว มืร ตู วาง โฆรห ดี อี ดอ เหมา. โอว มืร ตู วอน ตู เงยา อาเซ.

22 เซ โอว ฮี โบง ปาย ตี อัน เฌา อี แฮะ พาน เบลห โอว ดี เจว ดึห แวน โอว.”