1 วาย อัน ตี อาโยวบา วี กาลาง ดี เฌาพรา ต็อห,

2 “โอว แฮะ ฮอต นับ, แม เฌา ปึอน โบง โตต ดอน โมยว. อึณ มืร ตู มึห อาเซ อี ปึอน แคร ปี คราม แม เฌา ดี โบง.

3 แม เฌา มืร แฮะ ดีหมอด ต็อห, ‘ดูอี อี ตู มึห อางยาน ยี ต็อห, อากยาม อางยาน โอว ตู หมึอม, อึณ มูห อาเซ?’ อึณ มูห โอว อี แฮะ กาลาง แบน โมยว แบน โมยว ปี ตู นับ โอว. โอว มืร แฮะ กาลาง ลอง อี หมึอม อาม แบน โมยว แบน โมยว อี ตู กาหลูห ดี น็อห โอว.

4 แม เฌา มืร แฮะ ต็อห, ‘แตห แม โทม โฆรห ปี กาลาง โอว. โอว ดี ดีหมอด แม, แฮะ ฮอต แตห แม วี กาลาง เวียะ โฆรห โอว.’

5 อาต นี โอว นับ มี แคะ ปี กาลาง อี เฮา ลอง แม เฌา. ดอ ตี นี อึณ ปี โอว แฮะ ยึร แม เฌา ดี งาย โอว.

6 โกบ อึณ ปาย ตี โอว แฮะ วี ซาย โกบ โฆรห แปะ แฮะ ฮอต โอว กาลาง. โอว วี ตูต แคง กาปูห บอ แคง กาฟาง, วี โหลห หมาบ แปะ แฮะ ลูต โอว ตี.”

7 วาย แฮะ ฮอต เฌาพรา กาลาง โฆรห ดี อาโยวบา อัน วี กาลาง ดี อาเอลีพาด อี มูห ดูอี มืง เทมาน ต็อห, “โอว แฮะ รู ดี แม บอ ดี ฆึก แม. โคว, เบ ตู กาลาง ลอง โอว อี มูห อี หมาน ปี ปี กาลาง แดเจณ โอว อี จืร อาโยวบา นี.

8 โคว อัน ตี, แตห เบ ดึห มัก อาโล็ง บู โดว, บอ มาบู อาโล็ง บู โดว, ฮาว โดง กอย อาโยวบา อี มูห แดเจณ โอว, แตห อัน หลู ปี ดี หลู อี โดะ ดี เงา อาดา เบ. แดเจณ โอว อี จืร อาโยวบา, อัน บอ โลว ซาคึร ดาง เบ. โอว มืร ดี โทม โฆรห ปี ซาคึร อัน, ตู ดัม หมาบ แปะ แฮะ กาอาบ เบ คัม. โคว, เบ ตู กาลาง ลอง โอว อี มูห อี หมาน ปี ปี กาลาง อัน.”

9 ปาย ตี อาเอลีพาด อี มูห ดูอี มืง เทมาน, อาบีลาดัด อี มูห ดูอี มืง ซูฮีด บอ อาจอพัะ อี มูห ดูอี มืง เนมาด, เฆ มืร โบง โดบ แคะ ปี ดัม เฌาพรา เฆ โบง. เฌาพรา มืร โทม โฆรห ปี ซาคึร อาโยวบา.

10 อาโยวบา แฮะ ฮอต ซาคึร ดาง เฆ ฆึก อัน ตี, เฌาพรา วี แตห อัน มึห โกรวกราม กืน หลึอม แคะ ปี ดึอม มึห อัน อาต นี, แตห อึณ วี แบน อา บูน.

11 ปาย ตี เฆ บีนอง อูกัด อูวา อัน บอ อีบึณ อีมาย, เฆ บอกาเฆลียด บอ เฆ ฆึก อัน อี แฮะ ลาย ดึอม ดี อัน อาต นี, เฆ ดอน อี วี ตัห จัร ตัห แล ดี อัน. เฆ มืร วี ตัห โฮม เกยา โฮม แพ ดี กาง อัน. เฆ วี บยัะ ลอง ร็อก กาเว เฆ ดี อัน. เฆ มืร กาลาง โฆรห แตห อึณ แบน โปลม แบน แฮณ ดี น็อห อัน โกบ ดูก แปะ แฮะ แตห เฌาพรา อัน คัม. เฆ มืร ดัว รึอน ดี อัน, อู วี อู โบ็ง. เฆ ดัว บอ ซีกานู ครีว อู วี อู โบ็ง ดี อัน.

12 ปาย ตี เฌาพรา วี ม็องการา ดัว นา หมึอม ดี อาโยวบา, แตห อึณ กืน หลึอม แคะ ปี ดึอม มึห อัน อาต นี. อัน วี มึห มาบู อู หมึณ ดี พวน แหรณ โดว, มังปร็อง กาฮาต เดา แหรณ โดว, มามัก อู แหรณ ฆู. มาลา อาหยาง อู แหรณ โดว.

13 อัน ปี วี มึห ฆอน อีมาย ปอ บู วี, ฆอน อีบึณ ปอ โอย วี.

14 อัน มืร แตห ฆอน อีบึณ อัน วี ตาง จืร นาง เยมีมา. ฆอน อีบึณ วี กาแต บอ จืร นาง เกจียา บอ ฆอน อีบึณ วี เตียะ จืร นาง เกรฮาพูด.

15 แคง มืง ตี บอ มืง, อาว มึห ฆอน อีบึณ อี ชีด ปี ฆอน อีบึณ อาโยวบา เฆ ตี. ฆูณ เฆ มืร กาซาง คาฆูน ดี เฆ, แตห อึณ การัม ฆอน อีมาย, แตห อึณ มูห อู โมยว ดอน อี.

16 วาย อัน ตี อาโยวบา วี กอย ปอ อู มาย็อห ดี พวน ฆึร ซีนัม. อัน วี ปึอน ดี ยึร หลาน อัน บอ แหลน อัน, กอ วี โนะ พวน โจว.

17 วาย อัน ตี อัน มืร แฮะ กัด กาเซา บอ ยัม.