1 ดอ อัน ตี อาโยวบา วี กาลาง โฆรห.

2 อัน ต็อห, “เบ ปี บอ แฮะ ต็อห ปาย ตี มืร, อึณ แฮะ ซ็อง กาเซา ดี น็อห โอว อาตึร นี. โอว ปี บอ แฮะ หงูน แฮะ ปึณ มืร, อึณ ยี ตู จอย แตห ดูก ปี คัม โอว หราย.

3 โอว แฮะ ซี นับ, ดี เหมา โอว ดี ปึอน ลาย กาตูณ ดี อัน เฌา. โอว บอ ซี นับ อึณเตณ เหมา ดี ปึอน ฮาว ฌัม โดง กอย อัน เฌา.

4 เซ ฮี นับ, โอว ดี บอ ฮาว กาลาง อามู โอว นี ดี อัน เฌา. โฆรห ปี ดี ฮาว กาลาง ฮาว ดาง โอว ลอง ตู ลูต โอว, อึณ ดี กืน กาเซา.

5 อึณ ดี บอ กาหลูห ดี น็อห โอว, โฆรห ปี วี กาลาง อัน เฌา ดี โอว. โอว ดี บอ นับ บอ โนว โฆรห อัน เฌา.

6 เบ ทาง อัน เฌา ดี บอ ตา อาพูง ดังโคว อัน วี กาแทณ ดี โอว? อัน เฌา ตู โบง ปาย ตี. อัน ตู พยาก โอว.

7 ดอ อัน ตี ดูอี อี มึห น็อห ซืร น็อห หมาน, อัน ดี ปึอน กาลาง แหน ลอง อามู อัน ดี อัน เฌา. เฌาพรา อี ดี ซูงพยาด ดารา ดี โอว ตี, อัน ดี ฆ็อห แวน หมาบ โอว บอ แตห โอว ลอด คัม หมาบ เซเซ.

8 เซ โอว บอ ฮาว นา เลห ซีแง, โอว ยี ตู กาตูณ อัน เฌา. เซ โอว บอ ฮาว นา เฆต ซีแง, โอว ตู ยึร อัน เฌา.

9 โอว ปี บอ โฮะ บลาก นา กัว โดง โบง อัน เฌา ฆาน อัน, โอว ยี ตู ยึร ตู กาตูณ อัน เฌา. โอว ปี บอ โลง บลาก นา เตต มืร, อัน เฌา บอ เครียง อัน ตู แตห โอว ยึร อัน.

10 ปี บอ แฮะ ปาย ตี มืร, อัน เฌา ยี แฮะ นับ อึณเตณ ปี โดบ โอว. ดอ ตี นี โอว บอ กาดูห ดี คัม อัน เฌา แฌดเซ ซีคยา โอว. แฮะ ฮอต, โอว บอ วี เลห ตัห ปี ครีว.

11 อึณ มืร แฮะ ปี โอว ฌาบ ฮาว โดบ ปัน เปลา อัน เฌา ตู วัห ดอ เหมา. โอว มืร ฮาว โดบ อึณเตณ ปี ฮาว อัน เฌา.

12 โอว มืร ตู วัห ตู แวน ดารา ปี กาลาง อัน เฌา. โฆรห ปี กาลาง อัน เฌา, โอว มืร แฆบ อูน แคง น็อห โอว, แกวะ แตห โอว ปีว.

13 ปี คราม ปี เฌณฌา อัน เฌา ตู บยอง ตู บลืง ดอ เหมา. อาว มึห อาเซ อี ปึอน โบง แตห อัน เฌา บยอง. อัน เฌา มืร โบง โดบ ปี อึง อัน เซเซ.

14 แปะ แฮะ คราม, แฮะ แรน อูน อัน เฌา ดี โบง อาดา โอว, อัน เฌา ดี โบง แตห อึณ กอ เฌะฌูง โตต ดอน โมยว. แปะ แฮะ คราม อัน เฌา ดี โบง ดี โอว, อึณ ซี กืน กาเซา.

15 โกบ ปาย ตี อึณ บอ แบน โยว ดียูห ดีเยณ ดอ กอย โอว ดี อาต อัน เฌา. ดอ วี โหลห วี เฌณฌา โอว ลอง อัน ตี, โอว บอ โยว กาเซา อัน เฌา.

16 เฌาพรา มืร แฮะ โบง แตห อึณ แบน ดีหลัห, แบน น็อห เตียะ ดี โอว. อัน เฌา อี อึบ โตต ดอน โมยว แฮะ โบง แตห โอว โยว กาเซา.

17 ปี บอ แฮะ อับ ว็อง ดี โอว มืร, อัน ยี ตู แตห โอว กอย ซีต็อง ตู โฆรห. อัน เฌา มืร ตู ดึห แวน อับ ว็อง อี แฮะ เฮต กาเซา อี ปลึก นา โอว.