1 ดอ อัน ตี อาเอลีพาด อี มูห ดูอี อาโมยว เทมาน วี กาลาง โฆรห.

2 อัน ต็อห, “ดูอี อี มึห อางยาน กืน กาเซา ตู ปึอน โบง แตห อึณ แบน เฆฌู ดี เฌาพรา. ดูอี ตู ปึอน โบง แตห อึณ แบน อาฆยึร ดี อัน เฌา.

3 แม ทาง, เฌาพรา อี อึบ โตต ดอน โมยว ดี บอ โคย โกบ น็อห ซืร น็อห หมาน แม ตี? เซ เฌาพรา ตู ยึร อี ตู หมึอม ลอง แม, แม ทาง, แฮะ แบน อาฆยึร ดี เฌาพรา?

4 อาว มูห, เฌาพรา มาโนว แม บอ พยาก แม โกบ โรวเซ แม ดี อัน.

5 นา ตู หมึอม แปะ แฮะ โบง แม แฮะ ตาง กาเซา. หมาบ แปะ แฮะ โบง แม ตี, อึณ แฮะ กืน. อาว นับ ดี โตต ดี ซืด ปี ดี ปาย ดี กาลาง.

6 แม แฮะ ดึห โกรว ปี ตัห กัม ตัห งาม เฆ บีนอง แม อี ตู กาดาน ดึห. แม แฮะ บูต เลห ครึง ตา เฆ, วี เบลห แตห เฆ กอย โดว ฆลัะ.

7 แม มืร ตู แตห เฆ อี แฮะ นูน เดียง อึม. แม ตู เฮียง เฆ อี แฮะ เอต อี แฮะ กาปราณ, แตห เฆ ปึอน ดี โฮม.

8 แม มูห วี อี มึห โปลม ตาง, ปี ปึอน บึง มาน มืง. แม มูห วี อี มึห ซาเร กืน, อี ปึอน ดี กอย โดง ตี. แม ยี ตู จอย อี.

9 แดง ตู จอย แม เฆ ยา ซีปรัห, แม ปี วี พาด ดึห บอ โกรวกราม ดี เฆ ฆอน อี ตู มึห ฆูณ มา.

10 โกบ ปาย ตี อึณ ปี ยอต เฆ คืม แฮะ โรบ แม ดอน บลาก. อาเพ อาเร อี หมึอม โยว, อึณ ดี บอ ตัห กาจัว ดี แม อู เฌณ.

11 อี บลาง ดี แม แฮะ วี แบน อี อับ ว็อง, แกวะ แตห แม ปึอน วี ยึร มาเซ. อึณ ปี อึม แประ ตาง แฮะ ตัห อึณปูน แม.

12 เฌาพรา ยี กอย นา แดง แคง ฆางหราว, อัน บอ ยอด โลง เฆ ซีมัณ. ซีมัณ ตี ยี แฮะ กอย จา กอ ซืด แคง เบลณ.

13 มาแล, แม ยี วี ดีหมอด ต็อห, เหมา เฌาพรา ดี ปาย ดี นับ? อึณอูะ อี แฮะ เฮต กาเซา แฮะ ฮอต ปลึก โตต ดอน โมยว. เหมา อัน ดี ปาย ดี ซูงพยาด?

14 อัน เฌา ยี ฮาว วีว ฮาว เวณ แคง ฆางหราว. อึณอูะ อี แฮะ เฮต กาเซา ตี ดี บอ ปึอน กอย โรบ อัน เฌา, แกวะ แตห อัน เฌา ยึร เอ.

15 แม ดี วี ซูงพยาด แคง น็อห แม โมยว เหมา? แม ดี วี โดบ อึณเตณ บรีม ปี โดบ เฆ ดูอี อี ตู หมึอม ตึอน?

16 เฆ แฮะ หราย ซีณ อาต เฌะฌูง อาซาก เฆ. อึณ ปี เฆ ดี กาดูห ดี คัม อึม แประ ตาง ตัห ฌูห ฮาว เฆ บอกาเฆลียด.

17 เฆ แฮะ ดึอม กาลาง ดี เฌาพรา ต็อห, ‘แตห แม เลห โดง กอย เย นี.’ เฆ ปี วี กาลาง ปอ อึณ ปัว ต็อห, ‘เฌาพรา อี อึบ โตต ดอน โมยว, อัน ปึอน โบง มาเซ อาดา เอ?’

18 ปี บอ แฮะ ปาย ตี มืร, อึณ ยี มูห อัน เฌา อี แฮะ แตห เฆ มึห, แตห เฆ ครัม. โคว, อากยาม อางยาน ดูอี ตู หมึอม ตี, โอว ตู ซีโพว.

19 เซ เฌาพรา ดัม หมาบ ดี ดูอี ตู หมึอม เฆ ตี, เฆ อี น็อห ซืร น็อห หมาน ดี บอ ยึร บอ โคย. เฆ อี ตู มึห หมาบ, เฆ ดี บอ ปี วาณาก กาณัห เฆ.

20 เฆ ต็อห, ‘รันซู เอ แฮะ กาดูห อี ปยาต แวน โตต เฆ. อี ซี ฆีด ซี กาโลย ดี เฆ มืร, เงา วี กาซึม โตต.’

21 อึย อาโยวบา, แม โลว วี เหรต ดี ลาย กาล็อะ ดี เฌาพรา. แม โลว วี ลาย แบน อู ฆึก ดี อัน เฌา. เซ แม โบง ปาย ตี, อัน เฌา ดี วี ม็องการา ดัว นา หมึอม ดี แม.

22 แตห แม คัม ดี โดง ปี มาโนว อัน เฌา ดี แม. แตห แม อูน โฆรห อัน แคง น็อห แม.

23 เซ แม วี ตัห ณืร อัน เฌา อี อึบ โตต ดอน โมยว, อัน ดี วี แตห แม ดาคึย. เซ แม มืร แวน อี ตู หมึอม, แม ดี วี ดาคึย ปี บรีม.

24 แตห แม ดึห ครีว แม, แวน แคง กาปูห. แตห แม ดึห ครีว แฌด อี ตัห มืง โอวพี, แวน แคง แบลง อึม.

25 แตห เฌาพรา อี อึบ โตต ดอน โมยว, วี แบน ปี คาฆูน ครีว ดี แม. บอ แตห อัน เฌา วี แบน ปี คาฆูน รึอน อี ง็อห ตาง ดี แม.

26 ปัน อัน ตี แม ดี วี โบยว ดาคึย โดบ อัน เฌา อี อึบ โตต ดอน โมยว. แม ดี วี ปึอน ซากึห มางัห ยอด นา กอย เฌาพรา.

27 แม ดี วี ซาคึร ดี เฌาพรา. อัน เฌา มืร ดี วี โทม โฆรห แม บอ โบง โดบ โฆรห ปี กาแซณ แม ดี อัน เฌา.

28 แม ดี บอ วี ปึอน ดี โบง โดบ แคะ ปี ซูงพยาด แม. อึณ ดี บอ มึห บลาง อี ซึอน โดบ อึณเตณ แม.

29 เฌาพรา ดี แตห เฆ ดูอี ปีคึก โจห โลง โดง เตียม. อัน บอ วี คยอด เฆ อี มึห น็อห โฆม น็อห เตียม.

30 อัน เฌา มืร ดี คยอด วี อี มึห หมาบ. เซ แม โบง นา ซืร นา หมาน, อัน เฌา ดี คยอด บอ แม.”