1 วาย อัน ตี อาโยวบา วี กาลาง โฆรห.

2 อัน ต็อห, “แตห เบ โทม ซีคยา โฆรห โอว. อึณ ดี ปี เบ ดัว อี เหลา น็อห โอว.

3 แตห เบ โอด น็อห, คัม ดี โทม, แตห โอว ปึอน ดี กาลาง โตต. เซ โอว แฮะ ฮอต กาลาง, เบ ซี กาณัห, ซี ปี วาณาก ดี โอว, แฮะ ปึอน.

4 อี แบน รู แบน จาว ดี โอว อาว มูห โอว ลาย กาแทณ ดี ดูอี. เซ โอว โอด น็อห, อาว มึห ดีโคว.

5 แตห เบ ยอด โอว นี, แตห อึณ แตห เบ กอย ซีต็อง. แตห เบ วี ดึห แด เบ วี กาบีด โมต เบ, แกวะ แตห โฆรห เลห.

6 เซ โอว ฮี วี กาพา โหลห ลอง ปี กาลาง โอว, โอว บอ วี กาจัว, บอ แบน ดียูห ดีเยณ ดี โอว.

7 เหมา อึณ ปาย ปี อูน เฌาพรา อาซาก ดูอี ฮาย, แตห เฆ กอย กอ ฌัม ปัน กัด เฆ บอ แตห เฆ มึห อาพูง มึห โปลม เฆ แฮณ กาปัว?

8 เฆ บอ ยึร ฆอน เฆ แฮะ ดาคึย ฆยามซา กอย โคบ เฆ. เฆ บอ ยึร หลูกหลาน เฆ แฮะ โปลม คัะ, กอย ซีคยา.

9 เฌาพรา ตู แตห กาง เฆ ฌัม ดูก. เฆ มืร ลอด เฌาพรา ดัม หมาบ ดี เฆ.

10 มัก ดีโซว เฆ มืร โดบ มามัก บอ ดึก ดอน เฌณ. มามัก เฆ มืร โรม มึห ฆอน, อาว มึห อี ลึร อี ชึม.

11 ฆอน เฆ มืร, กาแบลบ วีว กาแบลบ เวณ ปี พึง ฆอน มาบู. หลูกหลาน เฆ มืร โคย ฆา ซีณ ดีแตด เฆ.

12 เฆ บอ ฆา โดบ ฮัม ฆรึง เฆ ฮัม ดีง. เฆ บอ โคย โดบ ฮัม เวา.

13 เฆ บอ โบยว ดาคึย บอ โจว บอ ฌาด เฆ. แฮะ ฮอต, เฆ มืร ปึอน ดี ยัม ดาคึย.

14 เฆ ยี นับ ดี วี กาลาง ดี เฌาพรา ต็อห, ‘แตห แม เลห โดง กอย เย. เย ตู ซี นับ อึณเตณ ปี แหน แม.

15 เฌาพรา อี อึบ โตต ดอน โมยว, อัน ปาย เหมา, เอ กอ โลว กรึบ อัน? เซ เอ ฮี ซาคึร ดี อัน, เอ ดี ปึอน อาฆยึร มาเซ?’

16 เฆ บอ นับ ดี ปีพูง เฆ ต็อห, แคะ มึห เฆ ดอน โมยว, อึณ มูห โตต เฆ อี โบง อี รัณ. โคว, โอว ตู ซีเพา อากยาม อางยาน เฆ ดูอี อี ตู โดบ ดารา.

17 หนาง เฌณ เบ แฮะ ดึอม ยึร ดูอี ฮาย ดูอี มืก แฮะ ยัม ดอ ตู ทาง เฆ? หนาง เฌณ เบ แฮะ ยึร เฆ โลว คัม อาเพ อาเร โกบ แฮะ รู เฌาพรา ดี เฆ?

18 หนาง เฌณ คูน แฮะ ดึอม บูด แวน เฆ, แตห อึณ ปี คูน บูด เหรียง กาฮ็อห เฆ เดียบ โหงว?

19 ดูอี บอ นับ ดี ต็อห, ‘เฌาพรา แฮะ ดัม หมาบ ดี หลูกหลาน, แตห อึณ กาดาง หมาบ ฆูณ เฆ.’ โอว ยี ต็อห, แตห เฌาพรา โบง เวียะ ดี ดูอี ฮาย ดูอี มืก, แตห อัน วี คัม ราง อัน แปะ แฮะ โบง อัน.

20 แตห โดว อัน วี ยึร ปัน ดี ลึร ชึม อัน. แตห อัน คัม ปี ปีรู เฌาพรา ดี อัน.

21 โคว, เซ ฮี ฌัม ปัน ดี โตต อาซาก ดูอี, อัน ตู นับ ดี มึห น็อห แหม ดาง ฆอน อัน โยว เฆ ดี ปาย เหมา.

22 อึณ ตู มึห อาเซ อี วี ปึอน มาโนว ดัว อากยาม อางยาน ดี เฌาพรา. อัน เฌา มูห อี อึบ บอ เฆ อามู อามาด อัน แคง มืง แดง.

23 ดูอี อู วี อัน ยัม ดอ ซี ครัม อัน บอ ดอ ซี โปลม คัะ อัน.

24 โดว โบ็ง อัน บอ ฆลัณ บอ เฮต, กาแหงต แคง กาอาง อัน บอ ณัะ บอ อัม ซีคยา.

25 ปี วี มึห ปอ อู วี, อัน ยี ยัม ดอ คัม อัน ดูก กาเซา ดี น็อห ดี พึอม อัน. อัน มืร ตู ดึอม ยึร อี หมึอม อี ดาคึย.

26 ฆาย อา วี ตี บอ ยัม, ยี โลว ฮาว ดีบ ฆาย แคง กาดาย มูห อู โมยว. มังปรัต บอ โฮม ฆาย บอ อา วี.

27 โอว แฮะ นับ ปี กาดัวะ กาพา เบ บอ ปี คราม เบ ดี โบง อี ตู หมึอม, แตห เบ ปึอน ดี ปยาต โอว.

28 เบ บอ ดีหมอด ต็อห, ‘กาง ดา กาณา ตึอน กอย ดี เหมา? เฆ อี ตู บอด ตู หมึอม ตึอน กอย ดี เหมา?’

29 มาแล, อึณ ปี เบ ตู ดึอม ดีหมอด เฆ อี ฮาว โดบ อึณเตณ โต็ง. เบ ตู ดึอม โทม โฆรห แปะ แฮะ แค แฮะ กาลาง เฆ.

30 เฆ แฮะ ต็อห, ‘เซ ฮี ฌัม ซีแง ดี แตห เฌาพรา อาเพ อาเร, เฆ ดูอี ฮาย ดูอี มืก ดี บอ ลอด.’ เซ ฮี ฌัม ซีแง ดี บยัะ เฌาพรา น็อห รู อัน, ดูอี วี ตี ตู โลว คัม.

31 อาว มึห อาเซ อี ดี ยัะ กาลาง ซืร ดี ดูอี ตู หมึอม ลอง แปะ แฮะ โบง อัน. อาว มึห อาเซ อี ยัะ วี โบง เวียะ ดี อัน.

32 เฆ บอ กาฆอด ฮาว อัน แคง บาเรว. แฮะ ฮอต, เฆ วี บัร โดง ดีบ เฆ ดี อัน.

33 กาปูห เฆ กาดาย บอ อึณปูน แดง โดว อัน แฮะ อึณ จึร ดี อัน. แคะ กอย ดูอี อี ฮาว ตึย โดว ยัม อัน, เฆ แฮะ กืน กาเซา กอ ฮู นับ ดี ตีห. เฆ บอ โดบ ดี ปัน อัน บอ แยต ดี อาต อัน.

34 เหมา อึณ ปาย ปี ดึห เบ โฆรห ปีเยณ, โฆรห ดีโลย ดีลาย, ต็อห แตห อึณ เหลา น็อห โอว? โฆรห ปี วี เวียะ เบ ตี, อึณ มูห โตต โฆรห กาโลว.”