1 วาย อัน ตี อาจอพัะ อี มูห ดูอี อาโมยว เนมาด วี กาลาง โฆรห.

2 อัน ต็อห, “ลอง แปะ แฮะ กาลาง แม ตี, อึณ แฮะ กาซูห น็อห โอว, แตห โอว วี กาลาง เวียะ. น็อห โอว มืร แฮะ แหม บอ ซี กาลาง กาเซา.

3 โฆรห ปี กาลาง แม, อึณ มูห โฆรห อี แนนัะ แตห โอว ชึม ซาเร. แคะ กาหลูห ดี น็อห โอว, โอว วี กาลาง ดี แม.

4 ซีณ โจว บาน ดอ มึอน, ซีณ ดอ โฆว ดอ กาจูห เฌาพรา ดี พาน เบลห ดูอี แดง กาดาย นี,

5 ดูอี ฮาย ดูอี มืก แฮะ ปึอน ดี ปีพูง อัน อาดา อู กาจัน. ดูอี อี ตู โรวเซ เฌาพรา แฮะ ปึอน ดี โบยว ดาคึย อาดา อี แจก. แม มืร แฮะ นับ ลอง อัน ตี.

6 น็อห ปีคึก อัน ปี บอ ตาง บอ จา กอ ดูห เบลณ, ดูห อึณอูะ มืร, อัน ตู ปึอน กอย เหลณ.

7 อัน ดี วี ลึร ชึม ปี เอียง โดว บรีม อัน. เฆ อี แฮะ ดึอม ยึร อัน ดี บอ วี ดีหมอด ต็อห, ‘เหมา อัน กอย?’

8 อัน ดี บอ หราย ปี อึณบาว. วาย อัน ตี มืร อาว ฮู มึห อี วี ยึร อัน. อัน ดี บอ หราย ว็อง ปี ปี ยึร ดอ อีด เฆ แคง หมึร.

9 เฆ ฆึก บอ ดูอี แคง อึณโฮม อัน อาว ฮู วี ยึร อัน ดอ เหมา. โดง ดึอม กอย อัน อัน อาว ฮู วี กอย.

10 หลูกหลาน อัน กาดูห ดี ฮาว หมาณ, แตห เฆ ดูอี ดูก ดูอี ฆีน จอย เฆ. อัน ดี กาดูห ดี วี เวียะ โกรวกราม ปี ดึอม ดึห อัน ดี เฆ ดอ ตู โดบ อัน นา มูห นา หมาน.

11 อัน ปี บอ ซี หนึม มืร, กาอาง อัน ดี วี กอย แคง กาปูห.

12 อี ตู หมึอม ปี โบง อัน อึณ ปี ปี ดี โฮม อี ซีแงห ดี อัน. อัน มืร แตห อึณ กอย ลาต ครึม ซีดัะ อัน.

13 อัน บอ อึง ดี แตห อัน งัม อูน เหลณ แคง โมต อัน.

14 มาแล, อึณ ปี ปี ดี โฮม อัน ตี อึณ ดี วี บยอง แบน อี ปราง แคง วัต อัน. อึณ ดี ปี อาย มาฮัณ กอย แคง โดว อัน.

15 อึณ บอ ปี อัน แฮะ แมง บลึอบ โกรวกราม อี เฮา, อัน ปี วี กาดูห ดี ฮึร เลห. เฌาพรา ดี วี โบง แกวะ แตห อึณ กอย แคง วัต อัน.

16 อึณ ดี บอ ปี อัน โฮม อาย มาฮัณ ฮาย. อาย มาฮัณ เงียน บอ โบง แตห อัน ยัม.

17 อัน ตู ปึอน ดี โฮม ลึง ตา ลึง. อึม ปู เฆ งาม มาเพียน ปี บอ แฮะ กืน มืร, อัน ตู ปึอน โฮม.

18 โกรวกราม แปะ แฮะ โฆยวฆยา อัน ดี เหรต ตัห อัน ยี ตู ปึอน ดี วี จัร. อัน โลว วี เวียะ วีว ดี อี. โกรวกราม อัน ตี, อึณ ยี ตู แตห อัน ยึร ดาคึย.

19 โคว, อัน แฮะ คาหนาบ บอ โบง แตห ดูอี ฆีน บอ พลาน. อัน บอ พาด ดึห กาง แปะ แฮะ ซัม อูน อี เฮา.

20 โกบ น็อห ลอพัะ อัน ตู มึห แคะ ซืด. โกรว ปี แฆบ อูน อัน อี ล็อะ น็อห อัน, อาว มึห คอ อู โมยว ดี อัน.

21 ดอ โฮม อัน, อัน มืร ตู แตห อึณ ฆีด อึณ กาโลย มาเซ. โคว, ครัม อัน ตู กอย เซเซ.

22 ดอ ซีงยา ครัม อัน, อัน ดี กาดูห ดูก, กาดูห ฆีน อู เฌณ. อี ดูก อี หณาบ ดี ตัห แตห อัน ชึม.

23 ดอ ซีงยา โฮม อัน, เฌาพรา ดี รู กาเซา ดี อัน, แตห อึณ ปี เฌาพรา ตา มัง มัห ฆลอก อัน แบน เฌณ แบน เฌณ.

24 อัน ปี บอ แฮะ แป ดี วัห ครึง กาโฆห อี มูห ฮีน, บลา บ็อง ยี ดี วี ล็อะ กาหลัน โดว อัน.

25 กาแดะ บลา ตี ดี บอ ล็อะ กาตูะ อัน. บลา อัะ อี แฮะ กาลัะ ราว ตี อัน ดี บอ ดืด เลห แคง กาโดม อัน. อี หมึอม โยว กาเซา ดี ตัห โดง กอย อัน.

26 อี อับ ว็อง ดี ตัห ปลึก โกรวกราม แปะ แฮะ อูน อัน. เงา ปี ตู กาดูห ดูอี ดี บูด ดี ปีด็อะ, อึณ ดี บอ กาซึม บอ อัน บอ แคะ กอย แคง กาง อัน.

27 อึณ ปี ฆางหราว ดี บอ อึณ วึห บยัะ หมาบ อัน. กาดาย ดี แบน ซักเซ อี พยาก อัน.

28 แคะ มึห อัน โกรวกราม, อึณ ดี ลึร หราย โตต. อึณ ดี บอ แหล ฮาว โดบ อึม แประ ดอ แฮะ รู กาเซา เฌาพรา ดี อัน.

29 อาตี อึณ บอ มูห รูห ปี ดี ดัว เฌาพรา ดี ดูอี ฮาย ดูอี มืก. อึณ บอ มูห ปี แรน อูน เฌาพรา ดี อัน, แตห อึณ แบน คาฆูน อาดา อัน.”