1 ดอ อัน ตี อาโยวบา วี กาลาง โฆรห.

2 อัน ต็อห, “เบ ดี บอ ปยาต โอว บอ กาลาง โฆรห อี วัร น็อห โอว. ปัน เหมา เบ ดี จู?

3 เบ แฮะ แนนัะ โอว, แฮะ โนะ ฆึร เฌณ. เบ มืร ตู นับ ดี วี ซาย ลอง แปะ แฮะ โบง เบ ดี โอว.

4 เซ แฮะ หมาน โอว แฮะ โบง กาลึบ, หมาบ โอว ตี อึณ ตู ลาย บาะ ดี เบ.

5 เบ บอ ทาง เบ แฮะ หมึอม หลึอม โอว. เบ บอ มาด ดูก แปะ แฮะ คัม โอว ตี แตห อึณ ลึห ซีคยา ลอง แฮะ กาลึบ โอว.

6 โอว ยี กาลาง แตห เบ นับ ซีคยา, อึณ มูห เฌาพรา อี โบง แตห โอว ฌัม ดูก. อึณ ปี อัน เฌา แฮะ ดึห อึณรับ ปลึก โอว.

7 โอว ปี บอ แฮะ ดัด แดะ ต็อห, ‘อี เฮา แฮะ ทาง กาลึบ ดี โอว,’ อึณ ยี ตู มึห อาเซ โทม โฆรห โอว. โอว ปี บอ วี หมาณ อี จอย โอว มืร, อาว มึห อาเซ อี ซูงพยาด โดบ ดารา.

8 เฌาพรา แฮะ โดบ ดี แร อึณเตณ โอว, ตู แตห โอว ปึอน ดี ฮาว. อัน เฌา แฮะ แตห อับ ว็อง ปลึก อึณเตณ, ตู แตห โอว ปึอน ยึร.

9 อัน เฌา แฮะ ดึห แวน แคะ มึห โอว อาพูง เฆ ซาเร, แตห อึณ ปี อัน เฌา แฮะ บูต เลห มังฆึม ดี โอว.

10 อัน เฌา บอ ปยาต แตห โอว ชึม โลง ดอน บลาก. อัน แฮะ แตห โอว ชึม บอ หราย โตต ดอน โมยว. อัน เฌา แฮะ ดึห แวน ปี หน็อะ อึณด็อะ โอว, แตห อึณ ปี อี รึต แวน เฮ.

11 อัน เฌา มืร แฮะ ปีรู กาเซา อัน ดี โอว. อัน มาด โอว ปี รันซู อัน.

12 อึณ ปี อัน เฌา แฮะ จัร ดา ซึก อัน ตัห กาโฆห ดี โอว. เฆ มืร แฮะ ตัห กอย โรบ ทึบ โอว.

13 เฌาพรา แฮะ โบง, แตห อีกัด เฆ วา โอว วี ลาย กาย็อห ดี โอว. แตห บอ เฆ ฆึก โอว วี วัห วี แวน โอว.

14 ปาย ตี บีนอง วอแว โอว มืร แฮะ เบลห แวน โอว. เฆ ฆึก กาล็อะ โอว, แฮะ วี ปีว โตต โอว.

15 แคต อี แฮะ ดึอม กอย แคง กาง โอว, เฆ มืร แฮะ วี ปีว โอว. บอ เฆ อีบึณ อี มูห หมาย โอว, เฆ วี มาด โอว ปี แคต ปี ตู ดึอม ยึร เฆ. เฆ บอ ยอด โอว, ปี เฆ ยอด ดูอี อาโมยว เฮา.

16 โอว ปี บอ วี แดะ หมาย โอว มืร, อัน ตู เวียะ ตู ย็อห โฆรห โอว. โอว กอ กาดูห ดี วี ดองบาน อัน.

17 อีบึณ โอว แฮะ กาอีห พึอม โอว. โอว แฮะ วี แบน ปี ฌ็อง เฆ อูกัด อูวา โอว.

18 แคะ กอย เฆ ฆอน ดีรอย บอ กาโพรม ดี กาณัห ปี วาณาก ดี โอว. ดอ ยึร เฆ ดี โอว, เฆ บอ แนนัะ โอว.

19 แคะ กอย เฆ ฆึก กาล็อะ โอว, เฆ แฮะ วี กาอีห โอว. เฆ ดูอี ปี ร็อก โอว, เฆ อาว ฮู กอย เครียะ โอว.

20 โอว แฮะ ฆีด มี ฮูน ฆาย กาอาง. โอว ยี หณัม ยัม, แฮะ ฆีด มี พึอม.

21 อึย เบ ฆึก โอว, โอว หมาณ แตห เบ กาเว โอว, แตห เบ กาเว โอว. โคว, เฌาพรา แฮะ คาหนาบ โอว.

22 เหมา อึณ ปาย ปี คูงครัห เบ ดี โอว ปี เฌาพรา แฮะ คูงครัห? แคะ แปะ แฮะ คาหนาบ เบ ดี โอว กอ ฌัม ดอ ตี นี, แตห อึณ เบระ ดี น็อห เบ.

23 อึร, โอว ซี แตห อึณ มึห อี แดม อูน โฆรห โอว นี. โอว ซี แตห อี แดม อูน โฆรห โอว นี แคง บับ.

24 โอว ซี แตห เฆ ตา กัมลัม ฮีน บอ แดม ดึก โดว แปะ แดง ดีพลัะ มีเจต, แตห อึณ กอย เซเซ. เซ อาว ปาย ตี โอว ซี แตห เฆ ดอก ดึก ดี มาว.

25 โคว, โอว แฮะ นับ ซีคยา, อัน เฌา อี ดี ทูด เลห โอว, อัน ซี กอย ซี อีม. เซ ฮี ฌัม อาคราว ปัน ดี โตต ฌาด นี, อัน ดี วี ตัห กอย แดง กาดาย นี.

26 โดว โบ็ง โอว ปี บอ แฮะ ฮอต ลึร โตต มืร, โอว ยี วี มึห โดว โบ็ง อี ปึอน ยึร เฌาพรา.

27 โอว ดี บอ ยึร อัน เฌา ดี งาย โอว นี. โอว ดี บอ กาตูณ อัน เฌา ปี นับ โอว. แคง น็อห แคง พึอม, โอว ยี แฮะ นูน กาเซา โกบ แฮะ บัร เหลณ โอว.

28 เซ เบ บอ ต็อห ดี โอว, ‘เย แฮะ นับ ซีคยา, อึณ มูห โกบ ปี กาลึบ แม, แม โลว คัม ปาย ตี’ เซ เบ ยี แนะ ซี คาหนาบ โอว, ต็อห อึณ มูห หมาบ โอว, เบ โลว ซาดีก.

29 แตห เบ โยว อาเพ อาเร อี ดี ตัห ดี มาปัวะ ลาง. โคว, เซ เฌาพรา ฮี รู, อัน นับ ดี แตห เฆ อี โฆ็ง มาปัวะ ลาง ตี ดัม หมาบ ดี อี. ปาย ตี บอ เบ ดี บอ นับ, อึณ ซี มึห อัน เฌา อี ดี ซูงพยาด อามู อี.”