1 ดอ อัน ตี อาบีลาดัด อี มูห ดูอี อาโมยว ซูฮีด วี กาลาง โฆรห.

2 อัน ต็อห, “ปัน เหมา แม ดี จู กาลาง โฆรห ตี? แตห แม เฌณฌา ซีคยา. แฮะ ฮอต โอว ดี กาลาง ดี แม.

3 เหมา อึณ ปาย ปี ซอ มาด แม ดี เย ปี โดว ซัด? เหมา อึณ ปาย ปี ซอ มาด แม ดี เย ปี ดูอี รึร?

4 แม แฮะ ปีรู แม, แตห อึณ ปี แม วี ก็อะ กาดัด โดว บรีม แม. แม ทาง อี ดี แวน กาดาย นี โกบ ตู อึง แม? เซ อาว ปาย ตี มืร, แม ทาง อี เฮา ดี บอ ดึห กาโทะ มาว ตาง โกบ ตู โลว แม?

5 บลาง ดูอี ฮาย ดูอี มืก แฮะ หราย อาคัร หมาน. แปละ เงา อัน มืร อาว ฮู กูห, อาว ฮู บลาง ดอ เหมา.

6 อี บลาง แคง ทึบ อัน ดี บยอง แบน อี อับ ว็อง. เงา ออม อี กอย โคบ อัน มืร แฮะ ยัด.

7 อัน ปี บอ แฮะ ฌาบ ฮาว ซีคยา ซีคยา มืร, ดอ ตี นี อัน วี ดีปลาด เกห. อากยาม อางยาน อัน โบง แตห อัน ลึร ชึม.

8 เปลา อัน บอ นับ ดี แยต ฮาว อัน แคง อึณรับ. อัน วี ฮาว ลึบ บอ แคง ยอต เฆ แคง คืม.

9 เซ ยอต ฮี ลูด, อึณ บอ ครอด กาหนูต อัน. ยอต เฆ คืม มืร บอ เหมต ซีคยา อัน.

10 วัน มืร แฮะ ดีณ อูน แคง กาดาย. ยอต เฆ คืม แฮะ ดีณ อูน โดบ อึณเตณ อัน.

11 ลอง อี หมึอม โยว แฮะ กอย โรบ อัน ดอน บลาก. อึณ บอ คูงครัห โดบ ปัน เปลา อัน ดอน อึณฌาบ.

12 แฮณ อัน เฆ โปลม อัน มืร แฮะ แกร ดี โยม โกบ แฮะ กาปราณ อัน ปี ดี โฮม. อาเพ อาเร อี ดี โบง แตห อัน ลึร ชึม มืร, แฮะ บัร โคบ อัน.

13 อาเพ อาเร อี แตห อัน เซา, แตห อัน ยัม, อึณ แฮะ กาลัต ดี โดว โบ็ง อัน บอ โดว. อาเพ อาเร ตี, อึณ ปี แฮะ ครูงครัห ครับ อัน.

14 อึณ ปี เฆ แฮะ รึต เลห อัน แคง ทึบ บีก โดง กอย อัน. เฆ แฮะ วี ตึย อัน ดี คูนดีคัม อี อึบ อาเพ อาเร อี นับ ดี โบง แตห อัน ลึร ชึม.

15 อี เฮา แฮะ ปึอน ฮาว กอย แคง ทึบ บีก อี แฮะ ราม แปะ แฮะ แวน อัน. เฆ มืร ดึห ฆันดืก บรัด ฮาว แดง กาตูะ ทึบ อัน ตี.

16 ดูอี วี ตี แฮะ ปี เฮ. เรียห อัน อี กอย นา ครึม แฮะ ฮอต เฮียะ. บอ รา อัน อี กอย นา แดง แฮะ ฮอต กาฮ็อห ยัม.

17 อาว ฮู มึห อาเซ อี วี นัมโหลห อัน แดง กาดาย นี. เฆ อี ฮาว โดบ อึณเตณ มืร, เฆ ตู กาลาง ลอง อัน.

18 อัน โลว คัม อี เฮา โฮว เลห อัน แคง โดง บลาง, แตห อัน วี ฮาว ลึบ แคง อับ ว็อง. อัน อาว ฮู ปึอน กอย แดง กาดาย นี.

19 กาแต เฆ ดูอี อาโมยว อัน มืร, อาว ฮู มึห หลูกหลาน อัน. ดูอี แคง อึณโฮม อัน มืร, อาว ฮู มึห คอ อู วี.

20 เฆ ดูอี อี กอย บลาก นา เฆต ซีแง, เฆ ดี บอ กาจัว โกบ อี แฮะ โบว แบน ดี อัน ตี. เฆ ดูอี อี กอย นา เลห ซีแง, เฆ กอ ดี โยว โกบ อัน ตี.

21 แฮะ หมาน อาคาคัร, ดูอี ฮาย ดูอี มืก, เฆ โลว คัม ปาย ตี. เฆ อี ตู นับ เฌาพรา, เฆ มืร โลว คัม อู โมยว ปาย ตี.”