อาโยวบา บอ กาลาง ฮาว ปัว. อัน ต็อห, “อาซาก โอว ดี โตต. อาคราว โอว มืร แฮะ ฮอต โตต. กาเดา บาเรว แฮะ บัร ปัน ดี ตัห โอว.

2 เฆ อี บัร ดี กาณัห ปี วาณาก ดี โอว, เฆ แฮะ กอย โรบ โอว ดอน บลาก. โอว ดืน ดี โลว คัม ปี โบง กาเซา เฆ ดี โอว.

3 โอว หมาณ, แตห แม เฌาพรา ดัว แคะ ปี โลว แม, แตห อึณ ทูด เลห โอว. โคว, ยี ตู มึห อาเซ อี ดี โบง กาดาง โอว.

4 แม เฌา แฮะ กาบีด น็อห เฆ, แกวะ แตห เฆ นับ ดี เฌณฌา. ปาย ตี แม เฌา ตู แตห เฆ แป โอว.

5 เซ ดูอี กาลาง จาว ลอง ฆึก อัน, โบง แตห อึณ แบน อาฆยึร ดี อัน, งาย หลูกหลาน อัน เฆ ดี บอ โมว บอ อับ ว็อง.

6 ดอ ตี นี อัน เฌา แฮะ แตห โอว แบน ปี แนนัะ อี เฮา ดอน อี. เฆ มืร ปัต นา โอว.

7 โกบ แฮะ ดูก กาเซา ดี น็อห โอว, งาย โอว มืร แฮะ กาปยอย แฮะ โมว. โดว โบ็ง โอว มืร แฮะ ปี กามึก.

8 เฆ ดูอี อี มึห น็อห ซืร น็อห หมาน, เฆ ดี บอ ฆว็อง ลอง อามู ตี. เฆ ดูอี อี ตู มึห หมาบ, เฆ ดี บอ ลาย กาบัห ดี เฆ ดูอี อี ตู หมึอม.

9 ปี บอ แฮะ ปาย ตี มืร, ดูอี อี มึห น็อห ซืร น็อห หมาน อัน มึห น็อห มัน ซีคยา. ดูอี อี แตห แด อัน ซีงา, โปลม อัน แกร ดี กาปัว.

10 แตห เบ ดอน อี วี ตัห กาลาง ดี โอว ปอ อู เฌณ. โอว หณัม กาตูณ ดูอี อี มึห อางยาน กาแต เบ.

11 อาคราว โอว แฮะ โตต. ปี คราม โอว มืร แฮะ หราย. บอ ปี กาปรา โอว แคง น็อห โอว มืร, อาว ฮู มึห.

12 ดูอี เฆ ตี, เฆ ยี โบง แตห หมึร วี ปี กาแต ซีแง. เซ อึณ ซี อับ ว็อง แคง หมึร, เฆ ต็อห อู กาจัน อึณ ดี บลาง.

13 เซ ปี หน็อะ อึณด็อะ โอว มูห มี มืง มารานัะ, เซ โอว บอ อีด แคง อับ ว็อง ตี,

14 เซ โอว ดี บอ แดะ กาเดา บาเรว ต็อห, ‘แม มูห ฆูณ โอว,’ เซ โอว บอ ต็อห ดี มังปรัต อี โฮม ยัง โอว, ‘แม มูห มา โอว เฆ วา โอว,’

15 เซ โอว ต็อห ปาย ตี, โอว อาว ฮู มึห ปี หน็อะ อึณด็อะ. อาว มึห อาเซ อี มึห ปี หน็อะ อึณด็อะ อาดา โอว.

16 ปี หน็อะ อึณด็อะ ตี ตู โลง มืง มารานัะ โดบ โอว. อึณ มืร ตู กอย แคง กาปูห.”