1 ดอ อัน ตี อาโยวบา วี กาลาง โฆรห.

2 อัน ต็อห, “โอว แฮะ ดึอม ยึร โฆรห ฌึร ตี แฮะ กืน กาเซา. เบ บอกาเฆลียด แฮะ กาลาง โฆรห, แตห อึณ เหลา น็อห โอว. อึณ ยี วี แตห แว ดูก หณาบ ดี น็อห โอว.

3 เหมา อึณ ปาย ปี ตู จู เบ กาลาง โฆรห ดีโลย ดีลาย อี ตู นับ ดี โตต? โกบ มาเซ เบ กาลาง โฆรห ปาย ตี เซเซ?

4 เซ อึณ มูห เบ อี คัม ดูก ปี โอว, โอว มืร แฮะ ปึอน กาลาง แตห อึณ ปี ปี กาลาง เบ ตี. โอว ดี ปึอน กาลาง โฆรห กืน บอ มาวัด ฆีณ ดี เบ โกบ ปี คัม เบ ตี.

5 โอว ยี นับ ดี ดัว อากยาม อางยาน อี หมึอม, แตห อึณ แบน แฮณ ดี เบ. โฆรห โอว ดี บอ ดาคึย แตห โดง เซา เบ วี แกน.

6 อึณ ยี มูห โอว, โอว ปี บอ กาลาง มืร, ดีม โอว ยี ตู หราย. โอว ปี ซัะ โฆรห มืร, อึณ ตู บลืง มาเซ.

7 แม เฌาพรา แฮะ โบง แตห โปลม เฆ แฮณ โอว กอ โตต. แม เฌา แฮะ แตห อึณโฮม โอว ชึม.

8 อึณ ปี แม เฌา แฮะ เหมต โอว บอ แบน ซักเซ ลอง โอว. อารึบ โอว นี บอ บยัะ ลอง หมาบ แปะ แฮะ โบง กาลึบ โอว.

9 อัน เฌา มืร แฮะ รู ดี โอว. อึณ ปี อัน แฮะ ดืด กายาต กาปยาต โตต โดว โบ็ง โอว. อัน เฌา มืร แฮะ ฌ็อง โอว บอ ซีฆีด หราง อัน ดี โอว. เฆ รันซู โอว มืร แฌด ดี ยอด โอว.

10 เฆ ดูอี กืน มืร กาณัห โอว. เฆ บอ ตัห กาฌูะ โรบ โอว, กาทัะ กาลา โอว บอ พยาก ซาเร โอว.

11 อึณ ปี เฌาพรา แฮะ อาบ โอว ดี เฆ ดูอี ตู หมึอม. แฮะ ฌัต โอว ดี เฆ ดูอี ฮาย ดูอี มืก.

12 โอว ปี บอ แฮะ กอย ดาคึย ฆยามซา มืร, เฌาพรา ยี วี ปยาต โอว. อัน แฮะ ซีเนียะ แมง โอว บอ โบง แตห โอว ชึม. เฌาพรา มืร โบง แตห โอว ปี หมาย โดง ดี บัณ อัน.

13 เฆ ดา กาณา อัะ, เฆ แฮะ บัณ โอว ดอน บลาก. บลา อัะ เฆ แฮะ ล็อะ เฆา เบล ลัม โอว. เฆ มืร ตู กาเว โอว. เฆ แฮะ บลูห หลูห บอ ซ็อง โอว, แฮะ วี แหล แดง กาดาย.

14 แบน เฌณ แบน เฌณ อัน เฌา แฮะ ตัห ตึก โอว. อัน เฌา มืร ปีครัน อัน ต็อห ดี แดบ โอว ปี ดา ซึก ดี แดบ รันซู อัน.

15 โอว มืร แฮะ หงูน แฮะ เหงา, วี ชึบ ดี ตา ครึง จาน. โอว มืร ปี กาปูห, ตู มึห ดี หน็อะ อึณด็อะ มาเซ.

16 โอว มืร แฮะ ยาม, แตห งาย โอว กอ เรณ ดีเรียง. ฮูน งาย โอว มืร แฮะ โอบ, แฮะ อ็อห กาเซา.

17 ปี บอ แฮะ ปาย ตี มืร, โอว ยี ตู โบง นา ตู หมึอม. ปี ซาคึร โอว มืร ยี ซีงา.

18 อึย กาดาย, แกวะ กาบีด แวน หนาม โอว. แกวะ แตห ยาม โอว ฮาว ฆืด ฮ็อะ ดี แม.

19 ดอ ตี นี ซักเซ อี นับ ดี กาลาง ลอง โอว แฮะ กอย แคง ฆางหราว. วี อี กอย บลาก โอว, อัน มูห อี กอย มืง แดง.

20 แคะ กอย ฆึก โอว, เฆ แฮะ วี แนนัะ โอว. อึม งาย โอว เลห แหล ดี อาต เฌาพรา.

21 วี อี แบน ซักเซ บลาก โอว ตี, โอว ซี แตห อัน ซาคึร ดี เฌาพรา ดาง โอว แตห อึณ ปี ดูอี ซาคึร ดาง ฆึก อัน.

22 โคว, อาว ฮู บอ เหลณ โอว มืร ดี ยัม. อึณ ดี ปี ดูอี อี ฮาว โดบ อึณเตณ อี ตู ปึอน วี ตัห.”