1 ดอ อัน ตี อาเอลีพาด อี มูห ดูอี อาโมยว เทมาน วี กาลาง โฆรห.

2 อัน ต็อห, “อึย อาโยวบา, ดูอี อี มึห อางยาน ปี แม อึณ ตู กาอาบ อัน กาลาง โฆรห ดีโลย ดีลาย อี ปี ฮึต เฆ คูน. อึณ มืร ตู กาอาบ แตห โฆรห อัน ปี คูน กาฮัวะ อี ตัห นา เลห ซีแง.

3 อัน มืร ตู ลาย ซังคยาง โฆรห อี ตู แบน อาฆยึร, อี ตู แบน เฆฌู. อัน มืร ตู กามวน ฮืง โฆรห อี ตู มึห ดีโคว.

4 อึณ ยี มูห แม, โฆรห ปี กาลาง แม, แฮะ ปี แม ตู โรวเซ เฌาพรา, แฮะ ปี แม ตู หณึม เฌาพรา.

5 อึณ มูห หมาบ แม อี แตห แม กาลาง ปาย ตี. อึณ บอ แตห แม กาลาง ปี ดูอี ฮาย ดูอี มืก.

6 โฆรห ปี กาลาง แม ตี, แฮะ วี ดัม หมาบ ดี แม. อาว มูห โอว อี กาลาง เลห ปี ลูต แม.

7 แม ทาง แม มูห อี ฆึอด ตัห ดี อาต อี เฮา? แม ทาง แม แฮะ ฆึอด ซีณ อาต มึห นอน เฆ นี?

8 ดอ ลาย กามวน ซังคยาง เฆ อามู อามาด เฌาพรา ดี อัน เฌา, แม มืร แฮะ กาดูห ดี โทม? แม ทาง แม อู วี มึห อางยาน?

9 แปะ แฮะ นับ แม ปี ตู นับ เย, อึณ มึห มาเซ? อี แฮะ กาหลูห ดี น็อห แม ปี ตู กาหลูห ดี น็อห เย, อึณ มึห มาเซ?

10 เฆ ดูอี กัด ดูอี แฆ ฆีณ อี แฮะ ลูย, อาซาก อี แฮะ กืน หลึอม ฆูณ แม, เฆ บอ กอย บลาก เย.

11 เฌาพรา ปี บอ เหลา น็อห แม, แม ดี ทาง อึณ ตู ฆลึม? เฌาพรา ปี บอ กาลาง โฆรห อึณจูะ อึณจัม ดี แม, แม ดี ทาง อาว มึห ดีโคว?

12 เหมา อึณ ปาย ปี โบง โดบ แม น็อห กาฮัวะ น็อห แหม แม? เหมา อึณ ปาย ปี วี ปีเรณ แม นา แม ดี เย?

13 ปี โบง แม ตี, อึณ แตห แม กาแคณ ดี เฌาพรา บอ กาลาง โฆรห อี ตู หมึอม ดี อัน เฌา.

14 ดูอี เอ นี, อาว มึห อาเซ อี ซีงา. ดูอี อี ฆึอด ตัห ดี อีบึณ, อาว มึห อาเซ อี ดี มึห น็อห ซืร น็อห หมาน.

15 เฌาพรา มืร ตู น็อห น็อห ตาง ดี เฆ อี ซีงา บอด. อัน มืร ตู มาด ฆางหราว มูห โดง ซีงา บอด.

16 เซ ยี มูห ดูอี อี โบง หมาบ, โบง นา ตู หมึอม กอ ปี เฆ เดียง อึม, เฆ บอ ฮาย กาเซา บอ หมึอม กาอีห กาเซา. อาว ฮู นับ ปี ดี ปาย ดี กาลาง ลอง ตู หมึอม เฆ.

17 อึย อาโยวบา, แตห แม โทม. แคะ ปี นับ โอว, โอว ดี กาลาง ดี แม. แคะ ปี ยึร โอว, โอว ดี บยัะ ดี แม.

18 อึณ มูห ลอง ปี กาลาง อูน เฆ ดูอี อี มึห อางยาน อี แฮะ คัม ปี มาโนว ฆูณ มา ดา ยา เฆ, อี ตู เครียง ตู กาบีด ลอง อัน ตี.

19 เฆ ตี, เฆ ตู กอย กาซู กาวัร ดี ดูอี อาโมยว เฮา. อึณ มูห มี เฆ อี ปึอน มืง ปี ดัว เฌาพรา ดี เฆ.

20 เฆ แฮะ กาลาง ลอง ดูอี ฮาย ดูอี มืก อี วีน ดี คาหนาบ อี เฮา. อัน ดี โลว คัม ดูก บอ โจว อัน. เฌาพรา แฮะ ฮอต ป็อก อูน หนาง ซีนัม อัน ดี โลว คัม.

21 โฆรห อี หมึอม โยว ดี บอ ซีนัน แคง โหยะ อัน. ดอ ซีงยา กอย ซีคยา อัน, ดูอี เฮา ดี ตัห พาด ตัห ดึห โกรวกราม อัน ดอ ตู ทาง อัน.

22 อัน มืร อาว ฮู ทาง อัน ดี ลอด อาเพ อาเร แคง อับ ว็อง กาเซา. โคว, เฆ อี โฆ็ง มาปัวะ ลาง แฮะ บัร ดี ง็อห ยัม อัน.

23 อัน บอ ฮาว วีว ฮาว เวณ, เหรต ปี ดี โฮม อัน บอ ต็อห, ‘อึณ กอย ดี เหมา?’ อัน แฮะ นับ, ซีแง อับ ว็อง แฮะ เครียะ ดี ตัห.

24 อี ดูก อี เซา กาเซา ดี น็อห, อึณ บอ แบน น็อห โยว เซเซ. อึณ บอ ปี คูนดีคัม แฮะ แรน ซึก ดี ฮาว กาโฆห ดี รันซู อัน.

25 โคว, อึณ ปี อัน แฮะ ครึง ดี ลาย ดีห ดี เฌาพรา, บอ กาแคณ ดี อัน เฌา อี อึบ โตต ดอน โมยว.

26 อัน บอ มึห น็อห ซี โบง กาบัห บอ ดืร กาเซา. อึณ ปี อัน แฮะ โฆ็ง ครึง กาโฆห บอ กาแบลบ ฮาว, แตห อัน ปึอน ดี กาโฆห ดี เฌาพรา.

27 อัน มืร แฮะ ฆลัณ กาเซา. นา อัน มืร แฮะ โอบ โตต. วัต อัน มืร แฮะ ฆึห.

28 ปี บอ ปาย ตี มืร, อัน ยี กาดูห ดี กอย แคง มืง อี แฮะ ราม, แคง กาง อี ตู มึห ดูอี. อึณ บอ มูห มืง อี แฮะ รีน ดี ดีฆล็อห กาปยาต ลึร โตต.

29 อัน มืร ตู ครัม เซเซ. โกรวกราม อัน มืร ตู กอย ซีคยา. บอ โดว ซัดดาวา ปี เฮียง อัน มืร, ตู ปึอน ดี แบร กืน แคง มืง โดง กอย อัน.

30 อัน มืร ตู ลอด อาเพ อาเร แคง อับ ว็อง. อัน ดี บอ ปี รา เฮ แปะ แฮะ ฮึห เงา. พึอม ปี ฮึห เฌาพรา, อึณ ดี ปี คูน ตัห บูด เตา โบห อัน.

31 แกวะ แตห อัน วี กาโลว โดว บรีม อัน บอ บึง อี ตู มึห ดีโคว. โคว, อาว แบน อาฆยึร มาเซ ดี อัน.

32 อัน ดี บอ ปี เฮ อี เฮียะ กาฮ็อห อาต ฌัม อาคราว อัน. อัน ตู นับ ดี วี อีม วี เงียน.

33 อัน ดี บอ ปี เฮ มางูน อี มึห เบล อี วี ซีฆลูห โจห อาต แฆ อาต ซีน อัน. อัน ดี ปี บอ เฮ นามัน ดอ แฮะ ดึม โบห อัน บอ วี ซีฆลูห โจห โตต.

34 โคว, พึง ดูอี อี ตู โรวเซ เฌาพรา, เฆ ตู มึห หลูกหลาน. เงา ดี กาซึม โดง กอย เฆ ดูอี อี ดึห ดี โฮม ปี ปรา อี ดี ดัว.

35 ดูอี ฌึร ตี, เฆ มูห ดูอี อี คราม ดี โบง มี นา ตู หมึอม, แตห อึณ ปี เฆ แฮะ แด บาดีก ซันเท, อึณ ดี ฆึอด เลห มี อี ฮาย อี มืก. แคง น็อห เฆ มืร, แฮะ มูห โตต อี กาโลว อี ตู หมาน ปี ฆอน อี กอย แคง วัต มา อัน.”