อาโยวบา บอ กาลาง ฮาว ปัว ต็อห, “ดูอี อี ฆึอด ตัห ดี อีบึณ, เฆ ตู กอย เหลณ แคะ เหมา. เฆ มึห มี อี ดูก อี หณาบ ดีโลย.

2 เอ ยี นับ ดี เหรห ดี ตาง, บอ วี ครัน ดี เฮียะ กาฮ็อห ปี กาโย็ง โบห. เอ บอ ปี กามึก อี ตู กอย เหลณ. อู กาจัน แฮะ หราย.

3 อึย แม เฌาพรา, แม เฌา ดี แฌด ดี ยอด ดูอี วี ตี? เซ อาว ปาย ตี มืร, แม ดี ซูงพยาด ดารา ดี โอว?

4 อาเซ ดี ปึอน โบง แตห อี ซีงา เลห แคง อี ตู ซีงา? อาว มึห อาเซ อี ปึอน โบง.

5 โคว, แม เฌา แฮะ ฮอต ป็อก อูน อาซาก ดูอี. แม บอ นับ อัน ดี กอย หนาง มาเฆียน. แม แฮะ ฮอต เบลห อูน อาคราว อัน, ตู ปึอน แตห อึณ ปวน.

6 หมาณ, แกวะ แตห แม เฌา ยอด อัน, แตห อัน ปึอน ดี กอย โบยว ดาคึย, แตห อึณ กอ โตต ซีแง อัน, ปี ดูอี อี วีน ดี ฌาง.

7 เซ อึณ มูห เฮ ปี ฆัร เกห อี, อึณ ดี มึห ปี หน็อะ อึณด็อะ. อัน ดี วี มึห อึณโลห กามาย. แฮะ นับ ซีคยา ดี มึห บอ รา กามาย อี ดี วี เลห.

8 เรียห อัน ปี บอ แฮะ แฆ, โงย อัน แดง กาดาย ปี บอ แฮะ ยัม มืร,

9 เซ ยี มึห อึม มี อี แจก, อัน บอ นับ ดี วี อึณโลห, มึห กาปลูย กามาย, วี ปี เฮ อี ซี หนึม.

10 เซ อึณ ยี มูห ดูอี, เซ อัน แฮะ ยัม, อัน ดี อัม ลาต หราย โตต. เอ ตู นับ ปี ดี ปาย อัน.

11 อึม นับ ดี หราย แคง อึม ดึง. อึม แคง แบลง มืร นับ ดี ฮีด เฮณ.

12 ปาย ตี เซ ดูอี แฮะ ฮอต ยัม, อาว ปึอน วี อีม. เฆ ดืน ตู วี อึณซึห ดอ เหมา กอ ฌัม ปัน ดี หราย โตต เบลณ เฆ ฆางหราว. ปี บอ ฮาว บยีต ยีต เฆ มืร, เฆ ตู นับ ดี วี อึณซึห.

13 โอว แฮะ ซี แตห กาเซา แม เฌา ดึห ฮาว เครียง โอว แคง บาเรว. แตห โอว กอย ดี ตี, แตห อึณ กอ ฌัม ปัน ดี หราย น็อห รู แม เฌา. โอว ซี แตห แม เฌา ป็อก อาคราว อัน ดี โอว. แฮะ ฮอต, แตห แม บอ วี นัมโหลห โอว.

14 เซ ดูอี แฮะ ฮอต ยัม, อัน ดี บอ นับ ดี วี ยีต วี อีม? ดอ ซี โลว โบง โอว ฆาน โอว นี, โอว ดี บัร แตห อึณ กอ ฌัม อาคราว ปัน ดี ลอด โอว.

15 แม เฌา ดี แดะ โอว, โอว มืร ดี อึร โฆรห แม. แม เฌา มืร ดี วี ดีเกน โอว อี มูห ดูอี แปะ แฮะ พาน เบลห แม เฌา.

16 แม เฌา มืร ตีห ดี ยอด ปัน โดง ฌาบ โอว ดอน อึณ ฌาบ. แม เฌา ยี ตู บัร ดี ยอด ปี กาลึบ โอว.

17 อึณ ปี แม เฌา แฮะ ดึห ปี กาลึบ ปี ลูต โอว ตี, วี ฮับ อูน แคง ฮู, วี ดอก ฌึม. อึณ บอ ปี แม เฌา แฮะ ซีบลึก อูน หมาบ ปี กาลึบ โอว ตี.

18 นอน ฮี ดีฆล็อห, อึณ บอ นับ ดี หราย โตต. มาว เฆ ดาอาง บอ นับ ดี กาโทะ โดง กอย เฆ.

19 อึม อี แหล บอ นับ ดี ฌูห กาโทะ มาว. อึม แประ บอ นับ ดี ฌูห ฮาว กาดาย. ปาย ตี แม เฌา บอ นับ ดี ปยาต แวน ปี หน็อะ อึณด็อะ ดูอี.

20 แม เฌา บอ ออง บอ แป ดูอี, แตห อัน บอ ยัม อู เฌณ. แม เฌา บอ บยอง นา อัน ดอ ยัม อัน.

21 ฆอน อัน ปี บอ มึห ซาเร มืร, อัน ยี ตู นับ ลอง อัน ตี. เฆ ปี บอ โจห เตียม มืร, อัน ยี ตู วี ยึร ลอง อัน ตี.

22 อัน วี นับ โดว โบ็ง อัน มี ดอ แฮะ เซา กาเซา อัน. อัน วี หงูน วี เหงา มี ลอง โดว บรีม อัน.”