เฌาพรา อี อึบ โตต ดอน โมยว, เหมา อึณ ปาย ปี ตู ป็อก อูน อัน อาคราว ดี ซูงพยาด อัน ดารา ดี เฆ ดูอี? เฆ อี โบง ฆาน อัน, เหมา อึณ ปาย ปี ตู ยึร เฆ อัน เฌา ดัม หมาบ ดี อี?

2 เฆ ดูอี มัง อี แฮะ กาโทะ หล็อก กาอูน กาดาย. เฆ แฮะ ปรา พึง มาบู อี เฮา, วี เฮียง แบน โกรว เฆ.

3 เฆ แฮะ พาด ดึห มาลา ฆอน ซีปรัห. เซ ยา ซีปรัห ตัห หมาณ ดี การ็อห กาวาย ดี เฆ อี จี อี แจก, เฆ บอ วี ดึห มัก ดีโซว ยา ซีปรัห ตี, แตห อึณ แบน โกรว ปี งาม ปี กัม อัน.

4 เฆ มืร ฆีห เลห ณอน เลห ดูอี ฆีน ดูอี พลาน โดบ อึณเตณ โดง ซี ฮาว เฆ. โคว, แคะ กอย ดูอี ฆีน ดูอี พลาน บอ กาดูห ดี เตา เครียง เฆ.

5 ปาย ตี เฆ ดูอี ฆีน ดูอี พลาน บอ โลว โฆยวฆยา ดี โบง ฆาน แคง แปร กาฮ็อห. เฆ บอ โลว เหรต ปี ดี โฮม อาดา ฆอน เฆ ปี มาลา แปร.

6 เฆ มืร วี ฮาว โซะ โหงว อี ซี ฆีด แคง มาน บอ แคง โดง นา อี เฮา. เฆ มืร วี ฮาว เบต เบล มางูน อี ซี ฆีด ซี กาโลย แคง มาน เฆ ดูอี ฮาย ดูอี มืก.

7 เฆ มืร ตู มึห ดี ตา ครึง. เฆ บอ อีด ฆลัะ บอ ดอง คืน. อาคราว ฆัด เฆียด เฆ มืร ตู มึห ฮึบ ดี ปลึก ดี เฆ.

8 ดอ กอย เฆ แดง นอน, เฆ บอ กาดูห ดี อัม ณัะ แคง ฆลาย ตู มึห โดง ดี ครูด โดง ดี บึง. เฆ บอ กาดูห ดี เครียง กาดัห มาว บอ ยาบ ดาอาง.

9 อึณ บอ มึห ดูอี อี พาด ดึห ฆอน งัะ อี ตู มึห ฆูณ, แตห อัน กาฆ็อห ดี มา อัน. เฆ บอ ดึห ฆอน ดีแตด อี มูห ฆอน ดูอี ดูก ดูอี ฆีน, แตห อึณ กาลัวะ นี เฆ.

10 ดูอี ฆีน ดูอี พลาน เฆ ตี ตู มึห ดี ตา ครึง, เฆ บอ กาดูห ดี ฮาว วีว ฮาว เวณ อาฆลัะ ปาย ตี. เฆ บอ กาดูห ดี ฆอด ดี โตว ซีบัยะ โหงว ดัว ดี อี เฮา, ยี ตู ปึอน ดี โฮม แพ.

11 เฆ ปี บอ แฮะ กรีด เบล นามัน, แตห อึม นามัน เลห บอ แณต เบล มางูน, แตห เฆ ปึอน อึม มางูน มืร, เฆ ยี วี กาปราณ กาเซา ปี ดี โฮม.

12 เฆ ดูอี อี แฮะ รีน ดี ยัม มืร แฮะ หงูน แฮะ แดะ แคง มืง. เฆ อี แฮะ เซา แฮะ ดีม มืร แฮะ แดะ แฮะ หมาณ, แตห อึณ มึห อี ตัห จอย เฆ. มาแล, เฌาพรา ยี ตู โทม โฆรห ปี ซาคึร เฆ.

13 อึณ ยี มึห ดูอี อี กาบัห อี ฌ็อง บลาง ดอ กาแต ซีแง. เฆ มืร ตู นับ อึณเตณ อี ปึอน ฮาว ดอ บลาง ซีแง. เฆ มืร ตู ซี ฮาว ตู ซี โดบ อึณเตณ ตี.

14 ดูอี อี ง็อห ยัม อาซาก อี เฮา, อัน บอ นับ ดี ยีต บา ดี อับ บอ ง็อห ยัม ดูอี ดูก ดูอี ฆีน. แคง หมึร อัน บอ วีน ดี คยอง ปี ดา โฌน เฆ ดา ปรา.

15 งาย ดูอี อี ซี ลูต อีบึณ อี เฮา, อัน บอ กาปรา แตห อึณ ฌัม บา ดี อับ. อัน บอ กาโหมะ นา อัน บอ ต็อห แคง น็อห อัน, ‘อาว มึห อาเซ ยึร โอว.’

16 แคง หมึร ดูอี อี ซีมา ปรา, อัน บอ นับ ดี วึห กาเดา แรง, แตห อัน ปึอน ดี ลึบ แคง กาง อี เฮา. กาแต ซีแง อัน บอ กาบีด มาโลห, เครียง อัน แคง กาง อัน, ตู ยัะ กอย แคง บลาง.

17 เฆ ดูอี ฌึร ตี โยว บลาง ซีแง. เซ อึณ มูห แคง อับ ว็อง, เฆ มืร แฮะ ดึอม, ตู โยว มาเซ.

18 ดูอี ฮาย ดูอี มืก ตี, เฆ ดี บอ อึณจึร ปี ปูห บรึย ฮาว แดง กางีว อึม. โดง กอย เฆ, แฮะ แบน ปี เอห ปี ดืง เฌาพรา. เฆ มืร ตู ปึอน วี ฮาว รัณ มาน มางูน เฆ.

19 มืง มารานัะ ดี บอ ดึห แวน ดูอี ตู หมึอม เฆ ตี, แตห อึณ ปี ซอดาด เฆ กาฮัวะ โบง แตห อึม ดาด ลาต หราย.

20 มา อี ฆึอด เลห อัน มืร แฮะ วี ปีว อัน. มังปรัต บอ โฮม โดว อัน. วาย อัน ตี อาว มึห อาเซ อี ซี วี นัมโหลห อัน. อัน มืร ดี กาบัก ลึร ปี เฮ อี แฮะ เกห.

21 อึณ แบน ปาย ตี ดี ดูอี ฮาย ดูอี มืก โกบ แฮะ โบง อัน นา ตู หมึอม ดี ยา ซีปรัห บอ คาหนาบ ลูกตาย เฆ อีบึณ อี ตู มึห ฆอน.

22 เฌาพรา บอ ตา อาพูง ดังโคว อัน ปยาต เฆ ดูอี อี มึห โปลม ตาง. ดอ โบง อัน เฌา ปาย ตี เฆ ดูอี อี ตู หมึอม เฆ บอ เกห ยัม อู เฌณ.

23 เฌาพรา แฮะ ควาง แตห เฆ กอย ดาคึย กอย ทังฮาง. มาแล, อัน ยี ยอด ปี ปาย เฆ.

24 ดูอี ฮาย ดูอี มืก ปี อืบ มยูก อี, อู กาจัน เฆ แฮะ วี หราย. อาซาก เฆ มืร ลึร ชึม ปี อี เฮา. เฆ บอ โลว คัม อี แดบ แวน เฆ ปี อี โซะ กาโย็ง โหงว.

25 เซ เบ ต็อห, โฆรห โอว นี ตู หมาน, อาเซ แฮะ ปึอน วี เวียะ ดี โอว, แตห อึณ บยัะ โฆรห โอว ตี ตู หมาน?”