1 ดอ อัน ตี อาจอพัะ อี มูห ดูอี อาโมยว เนมาด วี กาลาง โฆรห.

2 อัน ต็อห, “โฆรห กืน ปี กาลาง ดูอี ตี, แฮะ กาอาบ มึห อี วี เวียะ. ดูอี โฆรห กืน โมต กืน ปาย ตี อัน ตู ปึอน ลอด คัม หมาบ อัน.

3 อึย อาโยวบา, แม ทาง โกบ โฆรห ปี กาลาง แม ตี, อึณ ดี บอ แตห ดูอี เฮา กอย หนีม กอย เยน? แม ทาง แปะ แฮะ พยาก แฮะ แนนัะ แม ตี, อึณ ตู กาอาบ โบง แตห แม หมึอม ซาย?

4 แม แฮะ ปีคึก ปีพูง แม ต็อห, ปี หณึม แม บอ โฆรห ปี กาลาง แม แฮะ มูห แฮะ หมาน. แม มืร แฮะ ต็อห แม มูห ดูอี อี ซีงา บอด ดี อาต เฌาพรา.

5 โอว บอ ซี แตห กาเซา เฌาพรา กาลาง ดี แม. โอว บอ ซี แตห เฌาพรา กาลาง อี ตู หมึอม ลอง แม.

6 แตห อัน เฌา บยัะ อางยาน อัน อี ลึก กาเซา ดี แม. โคว, อางยาน อัน เฌา แฮะ มึห แบน หนาง โมยว. แตห แม นับ, เฌาพรา ยี ตู โนว หมาบ แม มัง โมยว, ตู แตห แม คัม แคะ กาอาบ แม คัม.

7 แม ทาง แม ดี บอ ปึอน แฌด ดี ยอด, แตห แม นับ โตต ลอง เฌาพรา? แม ทาง แม ดี บอ ปึอน นับ โตต แคะ ตาง อาพูง ดังโคว เฌาพรา?

8 อาพูง ดังโคว อัน เฌา ยี แฮะ จา หลึอม เบลณ เฆ ฆางหราว. โคว, แม ดี บอ ปึอน โบง มาเซ ดี อัน เฌา? อัน เฌา ปี วี ฌัม โดง ลึก หลึอม มืง มารานัะ. โคว, เหมา แม ดี ปาย ดี นับ โตต ลอง อัน ตี?

9 เซ อี ต็อห ดี เฆา ดี ยอด ปี ปาย อาพูง ดังโคว เฌาพรา, อึณ บอ โต็ง หลึอม กาดาย. อึณ บอ กาว็อห หลึอม อึม นัมมูกซารา.

10 เซ เฌาพรา ต็อห ดี เหมต บอ โบง อามู ฮับ ดี แม, อาว มึห อาเซ อี ปึอน แคร ปึอน แร อัน เฌา.

11 โคว, แฮะ หมาน อาคาคัร. อัน เฌา แฮะ นับ วี อี ฮาย อี มืก. อัน บอ นับ โตต อี ตู หมึอม ปี โบง เฆ.

12 เซ ดูอี แฮะ รึร, เฆ ตู นับ ดี วี แบน ดูอี อี มึห อางยาน. อึณ บอ ปาย ตี บอ ฆอน มาลา แปร ตู นับ ดี วี ฆึอด แบน ฆอน ดูอี.

13 แตห แม ยี อึณปราย น็อห แม, แตห อึณ ซืร ซืร หมาน หมาน, วี ตัห ณืร เฌาพรา.

14 แตห แม แวน นา ตู หมึอม ปี โบง แม, แกวะ แตห อึณ ซี มึห อี ตู หมึอม แคง กาง แม.

15 เซ แม โบง ปาย ตี อึณ ปี แม ดี บอ วี ปึอน ดี งึห ฆีณ แม. อาว ฮู มึห อี หมึอม ซาย ดี แม. แม มืร อาว ฮู มึห ดี โลว โยว บอ ปึอน กอย ดาคึย.

16 แม ดี บอ วี ปีว ดูก ตาง ดอน โมยว อี กอย แคง น็อห แคง พึอม แม. เซ แม บอ วี โหลห, อึณ ดี ปี อึม อี แฮะ แหล อี แฮะ ปวน ฮาว.

17 โจว อาซาก แม ดี บอ วี ซาบลาง ปี ดอ กาแต ซีแง. อึณ ปี บอ แฮะ อับ ว็อง มืร, อึณ ดี บอ วี บลาง ปี แปร วัห.

18 แม ดี บอ วี ปึอน ดี กอย ดาคึย กอย ซีคยา โกบ มึห แม ปี หน็อะ อึณด็อะ. แม ปี บอ วี ยอด โรบ แม, แม ฮู ยึร อี หมึอม โยว. แม ดี บอ วี ปึอน ดี อีด ดาคึย, อีด ซีคยา.

19 ดอ อีด แม, แม มืร ตู โลว โยว รันซู แม. อึณ ดี บอ มึห ดูอี กืน ดี ตัห เงยา แม บอ หมาณ, แตห แม จอย เฆ.

20 เซ อึณ มูห ดูอี ฮาย ดูอี มืก, งาย เฆ ดี กาปยอย. อึณเตณ อี ดี แตห เฆ ลอด, อึณ ดี หราย ดี โบยห. ปี หน็อะ อึณด็อะ เฆ มึห มี อู โมยว, อึณ แตห เฆ ยัม.”