คาน 10
อาโยวบา วี กาลาง ต็อห, “โอว แฮะ ปึร กาเซา อาซาก โอว นี. โอว อาว ฮู แป คัม ดี ยืน. โอว มืร ดี กาลาง เลห โตต อี ดูก อี ซ็อง ดี น็อห โอว.
2 โอว ดี กาลาง ดี เฌาพรา ต็อห, ‘โอว หมาณ, แกวะ แตห แม เฌา ดัม หมาบ ดี โอว. โอว มึห อาแบรด มาเซ, หมาณ แตห แม กาลาง ดี โอว.
3 เซ แม เฌา คาหนาบ อี, อึณ ดาคึย ดี แม? เหมา อึณ ปาย ปี ลูกตาย แม เฌา ดี ดูอี ปี พาน เบลห แม, บอ ดัว นา หมึอม ดี ดูอี ฮาย ดูอี มืก?
4 งาย แม เฌา บอ ปี งาย ดูอี? แม เฌา มืร ปึอน ยึร ปี ปี ยึร ดูอี?
5 ซีแง แม เฌา มืร แฮะ เปรต ปี ซีแง ดูอี? บอ ซีนัม แม เฌา ดี เจว โตต ปี ซีนัม ดูอี?
6 แตห แม เฌา วี เหรต ปี ลูต โอว แฮ แฮ, บอ แฌด ดี ยอด หมาบ โอว ครัน ครัน?
7 แม เฌา ยี แฮะ นับ, โอว ตู มูห ดูอี ฮาย. แม มืร แฮะ นับ, อาว มึห อาเซ อี ปึอน จอย แตห โอว ลอด เลห ตัะ แม เฌา.
8 แม เฌา แฮะ ตา แด แม โบง เบลห โอว. ดอ ตี นี, อึณ ปี แม เฌา ดี วี ปยาต แวน โอว.
9 แตห แม เฌา วี โหลห ดอ แฮะ ดึห แม กาดาย กาปีด โบง อารึบ โอว. ดอ ตี นี แม เฌา ปี ดี วี แตห โอว แบน กาปูห?
10 แม เฌา แฮะ ฮูห โอว แคง วัต มา โอว ปี อี ฮูห อึม ปู. แตห โอว แกร ดี แบน ปี อี โบง อึม ปู โปลม.
11 แม เฌา แฮะ วี ดึห ฮูน เฆ ยัง วี กาบัน โดว โบ็ง โอว. วี ดึห บอ กาอาง เฆ ซีนัะ, วี โบง แตห โดว โอว มึห โปลม.
12 แม เฌา แฮะ แตห โอว มึห อาซาก อีม บอ เฆฌู โอว. แปะ แฮะ ยอด แมน ลึมลา แม เฌา ตี, อึณ บอ แตห น็อห พึอม โอว ดาคึย ฆยามซา.
13 อี แฮะ แบน ดี โอว ดอ ตี นี, อึณ บอ มูห แปะ แฮะ เครียง อูน แม เฌา แคง น็อห แม. โอว แฮะ นับ, อึณ ดี โดบ อากยาม อางยาน แม.
14 แม เฌา แฮะ บัร ดี ยอด, แตห แม ยึร ปี กาลึบ โอว. แม มืร ตู แตห โอว ลอด คัม หมาบ โอว.
15 แม เฌา ยึร ปี กาลึบ โอว อี แจก, แม วี แตห โอว คัม ดูก กืน. โอว ปี ซัะ มึห หมาบ มืร, โอว ยี ตู ปึอน ดี งึห ฆีณ โอว. โคว, ดูก ตาง แปะ แฮะ คัม โอว, อึณ แตห โอว หมึอม ซาย กาเซา.
16 เซ โอว ดี งึห ฆีณ โอว, แม เฌา บอ วีน ดีแล แลบ ดี ยอด โอว ปี มาครังซี. แม เฌา บอ บยัะ ปวน แม อี หมึอม โยว บอ อี หมึอม อาม กาเซา, แตห โอว แว คัม ดูก ตาง.
17 แม เฌา บอ ดึห ซักเซ กามาย, แตห เฆ วี พยาก โอว, แตห น็อห รู แม ดี โอว แว กืน. อึณ บอ ปี ดา ซึก ตัห ตึก โอว แบน พึง แบน พึง.
18 เหมา อึณ ปาย แม เฌา กอ โลว แตห โอว ฆึอด ตัห? ปาย ตี เซ พึอม โอว แฮะ โตต ซีณ อาต มึห ดูอี คอ อู วี อี ยึร โอว, อึณ แฮะ ดาคึย ดี โอว.
19 เซ โอว ยัม อาต ฆึอด แบน โอว ดูอี, อึณ หมึอม กาเซา ดี โอว. โอว บอ อึง เซ โอว เลห แคง วัต มา โอว, วี ฮาว ลึบ แคง กาเดา บาเรว อู เฌณ.
20 โจว อาซาก โอว นี แฮะ รีน ดี โตต. โอว หมาณ, แตห แม วัห โอว, แตห โอว ปึอน ดี กอย โอว อู วี, แตห อึณ ดาคึย ดี น็อห โอว คอ อู กาจัน.
21 แตห แม โบง ปาย ตี ดี โอว อาต ฮาว โอว มืง อี ตู ปึอน วี ตัห, อี มูห มืง อี อับ ว็อง, มึห มี กามึก, โดง กอย กาเปรา ดูอี ยัม.
22 อึณ บอ มูห มืง อี มึห มี แคง หมึร บอ อับ ว็อง กาเซา. ปี ทาง เฆ แฮะ มูห บลาง, ยี วี มูห มี อี อับ ว็อง ดีโลย.’”