1 ดอ อัน ตี อาโยวบา วี เวียะ โฆรห ตี.

2 อัน ต็อห, “โอว ซี แตห อึณ ปึอน ดึห ลอง แปะ แฮะ กาลูต โอว น็อห บอ ลอง แฮะ รู แฮะ ลึร น็อห โอว, วี ซัะ แดง ลัะจู.

3 อึณ แฮะ กืน หลึอม กาฮาต ดี อึม นัมมูกซารา. โคว, โฆรห แปะ แฮะ กาลาง โอว แฮะ ปวน, แฮะ หลึอม.

4 อึณ ปี เฌาพรา อี อึบ โตต ดอน โมยว แฮะ ดึห บลา อัะ, บัณ ลึบ แคง โดว โอว. อาย อัน ตี แฮะ งยา แบร ฮาว กาลัต แคง น็อห พึอม โอว. อึณ ปี อี หมึอม โยว, หมึอม กาฮีว ปี โบง เฌาพรา แฮะ บัร ดี กาโฆห ดี โอว.

5 มาลา แปร มืร ตู ฮัม, เซ อัน ปึอน ดี โฮม แพ โฮม กืน ดอ แฮะ มึห เปต กืน. มัก ดีโซว มืร ตู อูดอัว ดอ แฮะ มึห เหรียง.

6 ปี ดี โฮม อี เปล อี ตู ฮับ ซัยะ, อึณ ตู ปึอน โฮม. บอ เคาลูย ปึอน เอียน อาว นับ ดี แฌม.

7 ปี ดี โฮม โมยว ตี, โอว มืร ตู ดึร ตู ปา. อึณ บอ มูห ปี กาอีห ปี ปึร กาเซา โอว.

8 โอว บอ กาปรา กาเซา, แตห โอว ปึอน ปี หมาณ โอว. แตห เฌาพรา บอ กาเว ดัว ปี ซี ปึอน โอว.

9 โอว บอ มอง กาเซา, แตห เฌาพรา ปยาต แวน โอว. แตห อัน เฌา โบง แตห โอว ลึร ชึม.

10 เซ อัน เฌา โบง ปาย ตี โอว ดี บอ โคย. โอว ปี บอ แฮะ ดีม แฮะ เซา เซเซ, โอว ยี โคย ดาคึย โกบ ตู แทณ ตู หลึร โอว โฆรห เฌาพรา อี ซีงา บอด.

11 โอว อาว มึห แฮณ ดี บัร ปี หน็อะ อึณด็อะ โอว ปอ อึณปัว. อาว มึห ดีโคว มาเซ ดี หน็อะ ดี ยืน โอว ปอ อึณปัว.

12 แฮณ โอว ตู แหนน มาว. บอ ยัง โอว ตู ปี บ็อง เดณ.

13 โอว ตู มึห แฮณ ดี วี จอย โดว บรีม โอว. นา ดี ซีแกน โอว, อาว ฮู แหนน ดี มึห. อึณ ปี แฮะ ฮอต โฮว เตา โตต.

14 ดูอี อี ตู มึห น็อห กาเว ฆึก อัน, อึณ ปี อัน โบง อี หมึอม ซาย. อัน มืร ตู โรวเซ อัน เฌา อี อึบ โตต ดอน โมยว.

15 เบ บีนอง โอว, เบ ตู กาซืร ดี โอว, แตห อึณ ปี อึม แประ อี แหล โดบ แบลง โดบ ดีลัยะ อี แฮะ ฮีด ดอ ตู มึห ฆลาย.

16 เซ อึณ มึห อึม โฆระ เฆียด บอ กาบีด อึม อี แหล นา ครึม, แกวะ แตห อึณ ลึห. บอ เซ อึม ดาด แฮะ ลาต, อึณ บอ แตห อึม ตาง.

17 มาแล, เซ ซีแง ฮี ซึอน ดอ ฌัม อาคราว ซอดาด, อึม บอ นับ ดี หราย โดง ตี.

18 พึง เฆ ดูอี อี กาจึห กาย็อง, เฆ วัห อึณเตณ โคบ อึม ตี, วี ฮาว โดง กาฆลัะ, แตห เฆ ชึม.

19 พึง เฆ ดูอี อาโมยว เทมา อี ฮาว โดบ อึณเตณ ตี, เฆ วี เหรต อึม. บอ เฆ ดูอี อี ย็อง โกรว อี กอย มืง เซบา วี ฮาว โดบ อึณเตณ บอ เหรต อึม ตี.

20 มาแล, ปี หน็อะ อึณด็อะ เฆ ตี, ยี วี บยอง, วี แบน อี กาลูต น็อห. เฆ แฮะ ดึอม นับ อึณ มึห อึม ดี ตี, เฆ บอ ตัห ฌัม ยี ตู วี ยึร มาเซ.

21 เบ มืร แฮะ ปี อึม แบลง ตี ดี โอว. เบ บอ ยึร อี หมึอม โยว, เบ บอ วี กาจัว.

22 โอว มืร ตู ดึอม ต็อห, ‘ดึห อู โมยว อู โมยว ดัว ดี โอว. ดึห โกรวกราม เบ กาโพรม ดี ทูด เลห โอว.

23 แตห เบ กาโพรม ดี ทูด เลห โอว ดี รันซู โอว. แตห เบ ทูด เลห โอว ดี เฆ อี คาหนาบ โอว.’ เบ แฮะ ดึอม ยึร โอว ต็อห ปาย ตี?

24 แตห เบ มาโนว โอว. โอว มืร ดี กอย หนีม หนีม, ตู ต็อห มาเซ. แตห เบ กาลาง ปี ลูต โอว, โอว ดี โทม.

25 โฆรห มูห โฆรห หมาน บอ มึห อาพูง ดังโคว. มาแล, เซ อึณ มูห โฆรห ปี ตู ลาย ซีโพว เบ, อึณ ตู มึห ดีโคว มาเซ.

26 เหมา อึณ ปาย ปี ซี แน เบ ดี โอว โกบ โฆรห ปี กาลาง โอว นี? เซ ดูอี ฮู มึห ปี คราม ปี มาง กาลาง โฆรห, เบ ทาง อาว มึห ดีโคว? เบ ทาง อึณ ดี แบน โตต ฮึต เฆ คูน ดีโลย?

27 เบ นับ ดี กาตาม, แตห เบ ปึอน ดี จัร, ปึอน ดี อึบ ฆอน ซีปรัห. เบ บอ ดึห ดี โฮม นัมเลห นัมมยาด อัน ดี ฆึก เบ.

28 ดอ ตี นี, แตห เบ ยอด โอว. โอว มืร ตู กาโลว เบ.

29 แตห เบ โอด น็อห คอ อี แจก. แกวะ แตห เบ ซูงพยาด อี ตู โดบ ดารา. แตห เบ วี เฌณฌา ลอง ดูก โอว ปอ อู เฌณ. โอว ตู ซี แตห โอว ชึม ซาเร.

30 เบ ทาง โอว กาโลว เบ? เบ ทาง โอว ฮู นับ ดี กาย็อห อี หมึอม อี ตู หมึอม?”