อาเอลีพาด ต็อห ฮาว, “เซ แม ซี ดัด แดะ ปาย ตี แฮะ ปึอน. อึณ ยี ตู มึห อี โทม โฆรห แม. กาแต เฆ ดา ซารา อี ซีงา บอด, แม ดี บึง อาเซ, แตห เฆ จอย แม?

2 น็อห รู นับ ดี ปยาต แวน ดูอี อี ตู มึห อางยาน. น็อห หลัยะ อี นับ ดี ง็อห ยัม ดูอี อี ตู หล็อก.

3 โอว แฮะ ดึอม ยึร ดูอี ตู หล็อก อี ทาง อัน แฮะ ปึอน กอย ซีคยา ปี เฮ อี มึห เรียห. มาแล, ดอ อัน ตี อู เฌณ เฆ ปี วี ดืง วี เอห โดง กอย อัน ตี.

4 เฆ ฆอน อัน, อาว มึห อี ลอด คัม อาเพ อาเร. เฆ บอ กาดูห ดี คัม ปี คาหนาบ อี เฮา ดอ ซูงพยาด อี อามู เฆ ดี บาง มาโลห มืง. อึณ ตู มึห คอ อู วี อี ดี จอย เฆ.

5 เฆ ดูอี อี แฮะ เอต แฮะ กาปราณ, เฆ บอ นับ ดี พาด ดึห ปี ดี โฮม ดี ดูอี อี ตู หล็อก เฆ ตี. โหงว ปี บอ แฮะ กอย กาแต เฮ มาอาต มืร, เฆ ยี แนะ ปึอน ดี ดึห. เฆ ดูอี อี แฮะ เอต อี แฮะ กาปราณ เฆ วี หลัยะ โกรวกราม ดูอี อี ตู หล็อก เฆ ตี.

6 โคว, กลึร เฆ เหงา อาว นับ ดี เลห ตัห ดี กาปูห. บอ อี ดูก หณาบ ดี น็อห, อาว นับ ดี เลห ตัห ดี กาดาย.

7 อึณ แฮะ หมาน อาคาคัร, ดูอี ฆึอด ตัห บอ โลว คัม ดูก. อึณ บอ ปี กาโชต เงา อี กูห โฮะ นา แดง.

8 มาแล, เซ อึณ มูห โอว, โอว ดี ฮาว กาลาง ลอง อาเร โอว ดี เฌาพรา. โอว ดี แค โตต ดอน โมยว, แตห อัน เฌา นับ.

9 อี หมึอม อาม ปี โบง อัน เฌา อาว นับ ดี กาหลูห โตต ดี น็อห. บอ นา หมึอม ปี โบง อัน เฌา, อาว ฮู แป นับ ดี ตีห.

10 อัน เฌา โบง แตห ฆลาย โจห แดง กาดาย, แตห อึณ บอ มึห อึม แคง โดง นา.

11 อัน เฌา บอ นับ ดี มยูก โจะ วี อี แฮะ คย็อะ กาเซา, แตห อัน วี ปึอน ดี กอย โดง จา. เฆ อี แฮะ หงูน แฮะ กลึร, อัน บอ แตห เฆ ลอด อาเพ อาเร.

12 ดูอี อี ออน ดี ปีหล็อก ดี อี เฮา, อัน เฌา ดี ปยาต แวน อากยาม อางยาน เฆ, แกวะ แตห เฆ ปึอน ดี โบง แคะ ปี คราม เฆ.

13 เซ เฆ อี มึห อางยาน ปีหล็อก ดี อี เฮา, เฌาพรา ดี วี เหมต เฆ. อัน วี โบง แตห ปี คราม เฆ ลึร ชึม โตต.

14 เฌาพรา ดี โบง แตห อับ ว็อง ตัห ปลึก เฆ ดอ กาแต ซีแง. เฆ บอ โลว ฮาว มาบูน มาบูน ปี แคง หมึร.

15 อัน เฌา ยี คยอด เฆ ดูอี ฆีน ดูอี พลาน, แตห เฆ ลอด ยัม. อัน เฌา วี จอย เฆ อี ตู มึห มาเซ, แตห เฆ ลอด ดี ดูอี อี ออน ดี คาหนาบ เฆ.

16 โกบ ปาย ตี เฆ ดูอี ดูก ดูอี ฆีน มึห ปี หน็อะ อึณด็อะ. เฆ อี ฮาย อี มืก, เฆ ตู ปึอน โบง มาเซ. อึณ ปี เฌาพรา แฮะ กาบีด โมต เฆ.

17 ดูอี แปะ แฮะ มาโนว แฮะ อึณปราย เฌาพรา น็อห อัน, อัน แฮะ ดาคึย. โคว, เซ เฌาพรา อี อึบ โตต ดอน โมยว แฮะ มัห แฮะ มาโนว แม, แกวะ แตห แม ลูกตาย ลอง อัน ตี.

18 อัน เฌา แฮะ แตห เอ มึห ดีม มึห เซา, อัน ปี ดี วี กาบัน, วี ปัก กาซืร ดีม ตี. อัน เฌา แฮะ แตห เอ คัม ดูก, อัน เฌา ปี ดี วี แตห อึณ หราย.

19 อัน เฌา ตู วัน ดี จอย แตห แม ลอด แคง ดูก เดา โมยว, บอ ดูก โมยว อึณบู อัน ดี จอย แตห แม ลอด, ตู แตห อึณ ดึร แม.

20 เซ แม ฌัม ดูก ตาง โกบ เอต ปี ดี โฮม, อัน เฌา ดี ทูด เลห แม, ตู แตห แม ยัม. เซ อึณ มึห ดา ซึก อี ลาย กาโฆห, อัน ดี แร ดี ฆ็อง แม, แตห แม ลอด ยัม ดี มาปัวะ ลาง.

21 เฌาพรา ดี คยอด แตห แม ลอด บอ แคง ดูก อี ลาย กาย็อง. แม มืร ตู โลว โยว อาเพ อาเร อี นับ ดี ปยาต ลึร แบน โมยว แบน โมยว.

22 แม ดี บอ วี กาณัห บอ ลังฆลึอน ดี อาเพ อาเร อี นับ ดี ปยาต ลึร บอ ดูก อี เอต ปี ดี โฮม ตี. แม มืร ตู โลว โยว เฆ มาโดว แปร อี ฮาย กาเซา.

23 โคว, อึณ ปี มาว อี กอย แคง มาน เฆ โดง นา แม, แฮะ วี แบน ฆึก แม. อึณ บอ ปี เฆ มาโดว แปร ฮาย ดี วี กาล็อะ ดี แม.

24 แม ดี บอ ปึอน กอย ดาคึย กอย ฆยามซา แคง ทึบ แม. เซ แม วี แฌด ดี ยอด พึง มาบู เฆ พึง มามัก แม มืร, อึณ ตู มึห อี โบยห อี หราย คอ อู โดว.

25 แม ดี วี นับ วี ยึร แคะ กืน เฆ ฆอน แม. บอ หลูกหลาน แม ดี แบร กืน กาเซา, แตห อึณ กอ ปี เปต อี ลัต แดง กาดาย นี.

26 แม มืร ดี ปึอน ดี กัด ดี แฆ, แฮะ ฮอต บอ ยัม ฮาว. อึณ ดี บอ ปี อี ดึห เบลห ซีบัยะ โหงว ดอ แฮะ ฌัม อาคราว อัน.

27 อึย อาโยวบา, โอว แฮะ ฮอต แฌดเซ ดี ยอด ซีคยา ซีคยา, กอ นับ อี มูห อี หมาน อี แฮะ กาฌี.” ปาย ตี แตห แม โทม บอ แตห อึณ ลึบ แคง น็อห แม.