อาเรโบม แฮะ ฮอต วี ตัห ฌัม แคง มืง เยรูซาแลม, อัน วี ร็อห ดา ซึก แคง ครึร ยูดา บอ แคง ครึร อาเบนยาม อาดา อู แซน ดี ดา หมึณ วี, แตห เฆ ฮาว กาโฆห ดี ดูอี อีซาเรลัะ, แตห อัน วี ปึอน ดี อึบ เฆ.

2 มาแล, เฌาพรา ยี วี กาลาง ดี ดา อี บยาน โฆรห เฌาพรา อี จืร อาเซมายา. 3 อัน โลว วี ฮาว กาลาง โฆรห ดี คูนดีคัม อาเรโบม บอ ดี เฆ ดูอี ครึร ยูดา บอ ครึร อาเบนยาม. 4 เฌาพรา แตห อัน ต็อห, “อาว โลว แตห เบ ฮาว กาโฆห ดี ดูอี อีซาเรลัะ อี มูห บีนอง วอแว เบ. แตห เบ วี เวณ ดี กาง เบ ราง อาเซ ราง อัน. โคว, อึณ มูห โอว อี แฮะ โบง แตห อึณ แบน ปาย ตี.” เฌาพรา แฮะ ฮอต กาลาง ปาย ตี เฆ มืร โทม โฆรห เฌาพรา ตี, อาว ฮู ฮาว กาโฆห. เฆ บอ วี เวณ ดี กาง เฆ.

5 อาเรโบม บอ กอย แคง มืง เยรูซาแลม บอ วี อึณปราย มาน มืง, แตห อึณ มัน ซีคยา. อึณ บอ มูห แคง กาดาย มืง ยูดา บอ แคง กาดาย มืง อาเบนยาม. 6 มืง ปี วี โฆว วี อึณปราย อัน บอ มูห มืง เบดแลม, มืง เอทาม, มืง เดกอ. 7 อึณ มูห บอ มืง เบดฌูรา, มืง เซคอ, มืง อาตูลัม, 8 มืง อาฆัะทัะ, มืง มาเรซา, มืง จีพัะ, 9 มืง อาตอรัม, มืง ลาคีด บอ มืง อาเจกา, 10 มืง โฌวรา, มืง อาจาลูน บอ มืง เฮโบรว. 11 อัน แฮะ ฮอต โบง แตห มืง เฆ ตี มัน ซีคยา, อัน วี ดาง แตห อึณ มึห ดา ตาง อี อึบ แคง มืง เฆ ตี. อัน วี อูน ปี ดี โฮม บอ นามัน บอ อึม มางูน. 12 อัน วี ดึห มัง ฆ็อง บอ บลา เลียห, วี อูน แคง มืง เฆ ตี ดอน มืง, แตห อึณ มัน ซีคยา. ปาย ตี อัน มืร อึบ เฆ ดูอี อายูดา บอ ดูอี อาเบนยาม.

13 เฆ ดา อี หลู ดี เฌาพรา บอ เฆ ดูอี แคง ครึร อาเลวี วี เลห แคง มืง อีซาเรลัะ ดอน นา ดอน โปละ, วี ตัห โดง กอย อาเรโบม. 14 เฆ ดูอี อาโมยว อาเลวี แวน กาดาย โดง กอย เฆ บอ โอ็ง เปต อี กอย นา เรต มืง เฆ ตี, วี เตา ฮาว แคง กาดาย มืง ยูดา บอ แคง มืง เยรูซาแลม. โคว, คูนดีคัม อาเยโรวโบว บอ ฆอน อัน, เฆ แฮะ บลัวะ แวน ดา อี หลู ดี เฌาพรา, อาว ฮู แตห เฆ หลู ดี เฌาพรา. 15 อาเยโรวโบว วี ดาง เฆ ดูอี อี มูห ดูอี ปี ร็อห อัน, แตห เฆ วี โบง ฆาน ดา อี หลู ดี เฌา ปี กรึบ อี เฮา ดี โดง จา. อัน แตห เฆ ลึมลา บอ อารึบ มัก เฆ มาแป แปะ แฮะ โบง อูน อัน. 16 แคะ กอย เฆ ดูอี อีซาเรลัะ ดอน ครึร, เฆ อี มึห น็อห ซี เหรต เฌาพรา ปี กรึบ เฆ ดูอี อีซาเรลัะ, เฆ บอ วี กาโพรม ดี ฮาว มืง เยรูซาแลม โดบ เฆ ดูอี อาเลวี, แตห เฆ ปึอน ดี หลู ดี เฌาพรา อี มูห เฌาพรา ปี กรึบ ฆูณ ดัง เฆ. 17 ปาย ตี อึณ วี แตห มาน มืง เฆ ดูอี อายูดา แว มึห โปลม เฆ แฮณ. เฆ มืร วี จอย อาเรโบม อี มูห ฆอน อาซาโลวโมว ตึอน กอ โนะ โอย ซีนัม. โคว, เฆ มืร โดบ ซีคยา ปี ดัม อูน อาดาวีด บอ อาซาโลวโมว ดอ มูห โจว เฆ ตี.

18 อาเรโบม บอ คัด ดึห นาง มาฮาลาด. นาง มาฮาลาด มูห ฆอน ดีบยา อาเยรีมูด. อาเยรีมูด วี มูห ฆอน อาดาวีด ตึอน. มา อัน บอ จืร นาง เอพีเฮลา อี มูห ฆอน ดีบยา อาเอลีอาบ. อาเอลีอาบ วี มูห ฆอน อาเยเซ. 19 อาเรโบม บอ มึห ฆอน อีมาย โอย วี บอ จืร อาเยอูด, อาเซมารี บอ อาจาฮัม. 20 วาย อัน ตี อัน ปี วี คัด ดึห นาง มาคา อี มูห ฆอน อาบาซาโลม. อัน วี มึห ฆอน อีมาย อี จืร อาพียัะ, อาทัย, อาฌีซา บอ อาเซลอมีด. 21 อีบึณ อาเรโบม ตี บอกาเฆลียด กอย ฆึร ดี ดา วี. เฆ อี มูห ฌืง นาง อัน กอย เดา ฆึร วี. ฆอน อีมาย อัน บอกาเฆลียด กอย อา ฆึร ดี ดา วี. ฆอน อีบึณ อัน กอย เดา ฆึร วี. แคะ กอย อีบึณ อัน บอ เฆ ฌืง นาง อัน บอกาเฆลียด, ปี ร็อก กาเซา อัน หลึอม วี เฮา แฮะ มูห นาง มาคา ตึอน. 22 อาเรโบม บอ โจะ มยูก อาพียัะ อี มูห ฆอน นาง มาคา, แตห อัน ตาง หลึอม เฆ อีกัด วา อัน ดอน อี, แตห อัน แบน คูนดีคัม. 23 อาเรโบม มืร มึห อางยาน บอ หล็อก กาเซา ดี จัร ฆอน อัน. อัน บอ แตห เฆ กอย กาย็อห แคง มืง อี มัน ซีคยา แคง กาดาย มืง ยูดา บอ แคง กาดาย มืง อาเบนยาม. อัน แตห เฆ กอย แคง มืง ดอน มืง อี มึห แรง. อัน มืร ดัว ปี ดี โฮม ปี ดี ตา กืน กาเซา ดี เฆ, วี เหรต บอ อีบึณ, ดัว ดี เฆ แบน วี แบน วี.