1 อาเรโบม ตึอน บอ ฮาว ดี มืง เซเคม. โคว, เฆ ดูอี อีซาเรลัะ มืร แฮะ ฮาว ดี มืง เซเคม, แตห เฆ ปึอน ดี โจะ อัน แบน คูนดีคัม. 2 ดอ อัน ตี อาเยโรวโบว อี มูห ฆอน อาเนบัด อี แฮะ เตา อาซาโลวโมว, วี ฮาว เครียง แคง มืง แอฆึบ, อัน บอ ยึร ลอง อัน ตี บอ วี เวณ. 3 เฆ บอ แดะ ตัห อัน. บอ อัน บอ เฆ ดูอี อีซาเรลัะ ตัห โดง กอย อาเรโบม. เฆ มืร กาลาง ดี อัน ต็อห,

4 “ฆูณ แม แฮะ แตห อึณ หณาบ กาเซา ดี เย, แฮะ ปี เย แฮะ ชึบ แอะเมา อี จัน กาเซา. เย วี หมาณ ดี แม, แกวะ แตห อึณ หณาบ แคะ ตี ดี เย. เซ แม โบง ปาย ตี เย ดี แบน แดเจณ แม, แตห แม อึบ เย.”

5 อาเรโบม วี ต็อห ดี เฆ, “แตห เบ วี เวณ. ฮี ปึอน โอย ซีแง, เบ บอ วี ตัห. โอว ดี กาลาง แตห เบ นับ.” ปาย ตี ดูอี เฆ ตึอน บอ วี เวณ.

6 วาย อัน ตี, คูนดีคัม อาเรโบม บอ วี กามวน ดี เฆ ดูอี กัด ดูอี แฆ อี แฮะ ดึอม กอย รึม โดบ อาซาโลวโมว อาต ยัม อัน. อัน ดีหมอด เฆ ต็อห, “เบ ดี แตห อากยาม อางยาน ปาย เหมา ดี โอว, แตห โอว ปึอน ดี วี กาลาง ดี ดูอี อีซาเรลัะ เฆ ตึอน?”

7 เฆ วี ต็อห ดี อัน, “เซ แม คัม ดี เฆฌู เฆ อาตึร นี, เซ แม โพรม ปี หมาณ เฆ, กาลาง โฆรห ดาคึย โฆรห หมึอม ดี เฆ, เฆ ดี วี แบน หมาย แม เซเซ.”

8 อัน ยี ตู โดบ อากยาม อางยาน ปี กาลาง ดูอี กัด ดูอี แฆ เฆ ตี. อัน วี ฮาว ซังคยาง กามวน ดี เฆ ดูอี หนึม, อี มูห ฆึก อัน, อี กอย รึม โดบ อัน บอ จอย อัน. 9 อัน ต็อห ดี เฆ, “เบ ดี แตห อากยาม อางยาน ปาย เหมา, แตห โอว ปึอน ดี วี กาลาง ดี เฆ อี แฮะ ต็อห ดี โอว, ‘แกวะ แตห อึณ หณาบ แคะ ปี จัร ฆูณ แม เย โบง?’”

10 ฆึก อัน อี แฮะ กอย รึม โดบ อัน ซีณ ดีแตด, เฆ วี ต็อห ดี อัน, “แตห แม วี กาลาง ดี เฆ ดูอี อี ตัห หมาณ ดี แม ต็อห, ‘ฆูณ แม แฮะ แตห อึณ หณาบ กาเซา ดี เย, แฮะ ปี เย แฮะ ชึบ แอะเมา อี จัน กาเซา. เย วี หมาณ, แตห อึณ วี อึณจึร’. แม โลว วี ต็อห ดี เฆ, ‘อึณ ปี กานู แวด โอว ซี ตาง หลึอม ณอย ฆูณ โอว. 11 ฆูณ โอว แฮะ จัร กาเซา เบ. โอว ดี วี จัร เบ, แตห อึณ กาเซา หลึอม ตี. ฆูณ โอว แฮะ ตา อึณเพียะ ซีเบรียะ เบ. โอว ดี วี แตห ตัม ดี เบ ตา มา แมงเงา, แตห เฆ ดอก เบ.’”

12 วาย แฮะ ปึอน โอย ซีแง, อาเยโรวโบว บอ เฆ ดูอี อีซาเรลัะ ตึอน บอ วี ตัห โดง กอย คูนดีคัม อาเรโบม, โดบ แคะ ปี ดัม อัน ต็อห, ‘โอย ซีแง, แตห เบ วี ตัห.’ 13 คูนดีคัม บอ กาลาง โฆรห กาเซา ดี เฆ, แวน อากยาม อางยาน ปี กาลาง ดูอี กัด ดูอี แฆ เฆ ตึอน. 14 อัน วี โดบ อากยาม อางยาน ปี กาลาง ดูอี หนึม. อัน วี ต็อห ดี เฆ, “ฆูณ โอว แฮะ แตห อึณ หณาบ กาเซา ดี เบ, โอว ยี วี แตห อึณ หณาบ หลึอม ตี. ฆูณ โอว แฮะ ตา อึณเพียะ ซีเบรียะ เบ. โอว ดี วี แตห ตัม ดี เบ ตา มา แมงเงา, แตห เฆ ดอก เบ.” 15 ปาย ตี คูนดีคัม ตู โทม โฆรห ดา ตาง เฆ ตึอน. โคว, เฌาพรา แตห อึณ แบน ปี กาลาง อัน ดี อาฮียา อี กอย มืง ซีโลว, แตห อาฮียา วี กาลาง ดี อาเยโรวโบว อี มูห ฆอน อาเนบัด ตึอน.

16 ดูอี อีซาเรลัะ เฆ บอ นับ, คูนดีคัม อาเรโบม ตู โทม, ตู โดบ โฆรห เฆ, เฆ วี กาลาง ดี อัน ต็อห, “เย นี เย ตู ลาย บาะ ดี อาดาวีด, เย ตู มูห หลูกหลาน อาเยเซ. อึย เบ ดูอี อีซาเรลัะ, แตห เอ ฮาว, วี เวณ โดง กอย ทึบ บีก เอ. อึย เบ ดูอี อาดาวีด, แตห เบ ยอด ลึมลา อาโมยว เบ ราง เบ.” เฆ แฮะ ฮอต ต็อห ปาย ตี เฆ ดูอี อีซาเรลัะ บอ เวณ โดง กอย เฆ. 17 อึณ ยี มูห เฆ ดูอี อีซาเรลัะ อี ซี กอย แคง อืง ยูดา ตึอน, อาเรโบม ซี อึบ เฆ.

18 วาย อัน ตี คูนดีคัม อาเรโบม วี จัร อาฮาโดม อี มูห ดา ตาง อี อึบ หมาย คูนดีคัม, แตห อัน ฮาว โดง กอย เฆ ดูอี อีซาเรลัะ. เฆ ยี วี กาโพรม ดี ดึห มาว วึณ, แตห อัน กอ ยัม. คูนดีคัม อาเรโบม บอ วี ปีครัน ดี ป็อะ ลักเลา อัน, วี เตา เวณ แคง มืง เยรูซาแลม. 19 โกบ ปาย ตี ดูอี อีซาเรลัะ ลาย กาบัห ดี ดูอี อาดาวีด, กอ ฌัม อาตึร นี.