1 ปาย ตี อึณ วี มึห นาง ฮอคัม อี อึบ มืง เซบา. อัน แฮะ ยึร อี หมึอม อาม กาเซา ลอง อาซาโลวโมว. อัน บอ ตัห โดง กอย อาซาโลวโมว, แตห อัน ปึอน ดี เทว อางยาน อาซาโลวโมว บอ ดีหมอด อี หณาบ อี คึกคัม กาเซา. อึณ บอ มึห ดูอี กืน ตัห โดบ อัน. อัน ดึห ตัห บอ อึณปร็อง กาฮาต อี ดาง อึณกรึห อูห หงูน บอ ครีว บอ แซณ อี ง็อห ตาง กาเซา. นาง ตึอน บอ ยึร อาซาโลวโมว, อัน บอ ดีหมอด ดอน โมยว ลอง ปี ซี ดีหมอด ปี ซี กามวน อัน. 2 อาซาโลวโมว บอ นับ ดี กาลาง ลอง ปี ดีหมอด อัน ตี ดอน โมยว. อาว มึห คอ อู โมยว ปี ตู นับ อาซาโลวโมว ดี กาลาง ดี บยาด. 3 นาง ฮอคัม อี ตัห มืง เซบา ตี บอ ยึร ปี ปาย อางยาน อาซาโลวโมว, ยึร บอ โฮว แปะ แฮะ โบง อัน. 4 อัน ยึร บอ ปี ดี โฮม ปี เบลห เฆ แคง โฮว อัน, ยึร บอ ปี ปาย เฆ อามู อามาด อัน ดี ตูต ดี กอย. อัน ยึร บอ เฆ แดเจณ อัน อี แฮะ ชึบ ครึง ชีด, ลึมลา เฆ ดูอี อี โฮม รึม บอ เฆ อี ดัว ปี ดี เดียง ดี อัน. อัน ยึร บอ ครึง ตา ปี ชึบ เฆ, บอ ปี หลู อี โดะ ดี เงา แคง โฮว เฌาพรา. อึณ บอ แตห อัน อาม กาเซา กอ ฮู นับ ปี บอ ปาย.

5 อัน วี กาลาง ดี คูนดีคัม ต็อห, “ดอ กอย โอว มืง โอว, โฆรห แปะ แฮะ ยึร โอว ลอง แปะ แฮะ โบง แม บอ ลอง อางยาน แม, อึณ แฮะ มูห แฮะ หมาน โตต ดอน โมยว. 6 มาแล, อาต ตัห ฌัม โอว, อาต ยึร โอว ดี งาย โอว, โอว ตู หณึม โฆรห ตี. ปี แค อี ดี โอว อาว มูห คอ อู กาแต. อาพูง ดังโคว แม บอ อางยาน แม แฮะ วี หลึอม แคะ ปี แค เฆ ดี โอว. 7 เฆ อามู อามาด แม อี กอย รึม โดบ แม บอ เฆ อี แฮะ ปึอน ดี โทม อางยาน แม เซเซ เฆ แฮะ ดาคึย อาคัร หมาน. 8 โอว อืบ เฌาพรา อี มูห เฌาพรา ปี กรึบ แม. โคว, แม แฮะ ล็อะ น็อห อัน, แตห อัน แตห แม แบน คูนดีคัม อี อึบ ดูอี อีซาเรลัะ อาดา อัน เฌา. โกบ ร็อก เฌาพรา ดี ดูอี อีซาเรลัะ บอ มึห น็อห ซี เฆฌู เฆ เซเซ, อัน แฮะ แตห แม แบน คูนดีคัม, แตห แม ซูงพยาด อามู เฆ ซืร ซืร หมาน หมาน ดอน โมยว.”

9 นาง ฮอคัม ตึอน แฮะ ฮอต กาลาง ปาย ตี อัน วี ดึห ครีว อู มาย็อห ดี อา ฆึร ทาเลน, อึณกรึห อูห หงูน กืน กาเซา บอ แซณ บอด อี ง็อห ตาง, วี อาบ ดัว ดี อาซาโลวโมว. อึณกรึห อูห หงูน อี ซี ดี บอด ดี หมึอม หลึอม อึณกรึห อูห หงูน ปี ดึห ตัห ดัว นาง อี อึบ มืง เซบา ดี อาซาโลวโมว ตี ตู ดึอม มึห.

10 เฆ แดเจณ คูนดีคัม อาฮีรัม บอ แดเจณ คูนดีคัม อาซาโลวโมว อี ฮาว ดึห ตัห ครีว ดี มืง โอวพี ตึอน, เฆ บอ ดึห ตัห บอ เฮ นัมซา บอ แซณ บอด กืน กาเซา. 11 คูนดีคัม อาซาโลวโมว บอ ดึห เฮ นัมซา ตี, วี โบง แบน บล็อะ อึณแตง แคง โฮว เฌาพรา บอ แคง โฮว อัน. อัน โบง บอ ดีง บอ ดีง ดีเรา, ดัว ดี เฆ อี ต็อห โหมว. โกรว ฌึร ตี ตู ดึอม ยึร แคง มืง ยูดา ดอ เหมา.

12 คูนดีคัม มืร วี ดัว แคะ ปี ซี ปึอน แคะ ปี หมาณ นาง ฮอคัม ตึอน ดี อัน. ปี วี ดัว คูนดีคัม ดี นาง อี อึบ มืง เซบา ตี แฮะ วี กืน หลึอม ปี ดึห ตัห ดัว อัน ดี คูนดีคัม อาซาโลวโมว. แฮะ ฮอต, นาง ฮอคัม บอ เฆ อี โดบ ตัห อัน, เฆ บอ วี วีว ดี มืง โดง กอย เฆ.

13 อู ซีนัม คูนดีคัม อาซาโลวโมว บอ ปึอน ครีว อาดา เดา มาย็อห ดี เดา ฆึร ดี เดา ทาเลน. 14 แดง ตี, ปี วี มึห ครีว จึง ปี โลว ดัว เฆ ดูอี อี กาจึห กาย็อง. บอ เฆ คูนดีคัม อาโมยว เฮา บอ เฆ ดา ตาง อี อึบ มืง เฮา ปี วี ดัว ครีว เฆ รึอน ดี อาซาโลวโมว.

15 คูนดีคัม อาซาโลวโมว บอ ดึห ครีว ตี, จึม แบน มัง ฆ็อง อี ตาง อาดา อา มาย็อห โบ็ง. อู โบ็ง อัน ดึห ครีว เดา มาย็อห เซเคน. 16 มัง ฆ็อง อี ดีแตด, อัน บอ โบง โอย มาย็อห โบ็ง. อู โบ็ง อัน ตา ครีว โอย มาย็อห เซเคน. คูนดีคัม บอ อูน โกรว ตี แคง โฮว อัน อี จืร แปร เลบานูน.

17 คูนดีคัม วี โบง บอ มาลาง. อัน ดึห แปละ มาซาง, ฮับ แตห อึณ ชีด. อัน วี ดึห ครีว แฌด, ปีด นา เรต. 18 มาลาง ตี มึห อึณแตง เดา บล็อะ, มึห บอ กาโช็ง ดี แณต อี มูห ครีว, อี แฮะ กาดึก ดี มาลาง ตี. ดี อา บลาก โดง ดี ตูต วี มึห โดง ดี เบลห แด, มึห บอ อารึบ มาครังซี อี จ็อง โคบ โดง ดี เบลห แด บอ อา บลาก. 19 อึณ วี มึห ราง มาครังซี ฆึร ดี อา โดว วี จ็อง ดี อึณแตง ตึอน ดอน บล็อะ, อู บล็อะ อา โดว. แคง มาน มืง อี เฮา, อึณ ตู มึห มาลาง อี ปี มาลาง ตี. 20 ก็อก ปี เดียง คูนดีคัม อาซาโลวโมว บอ ซีลัยะ ปี ตา อัน แคง โฮว อัน อี จืร แปร เลบานูน ตึอน, อึณ มูห โตต ครีว ดีโลย, อาว มึห โกรว อี มูห รึอน. โคว, ดอ มูห โจว บาน คูนดีคัม อาซาโลวโมว ตี, รึอน ตู โกบ มึห ดีง็อห ดีคัน. 21 อาซาโลวโมว บอ มึห บอ รึร ซังโพว แบน หลาง แบน หลาง อี กอย ดี บาง อึม นัมมูกซารา. เฆ แดเจณ อาฮีรัม บอ แบน อี บัด รึร ตี. โอย ซีนัม อู เฌณ เฆ ดึห ตัห ครีว เฆ รึอน, แปละ มาซาง บอ มาฟา บอ มาปรัะ.

22 คูนดีคัม อาซาโลวโมว ตี, อัน แฮะ มึห โกรวกราม เฆ อางยาน กืน หลึอม คูนดีคัม ดอน กาดัง แดง กาดาย นี. 23 แคะ กอย คูนดีคัม บอ กาดาย นี, เฆ บอ ตัห โดง กอย คูนดีคัม อาซาโลวโมว, แตห เฆ โทม อางยาน แปะ แฮะ ดัว เฌาพรา ดี อัน. 24 ดอน ซีนัม ดอน ซีนัม เฆ ดูอี อี ตัห ตี, เฆ บอ ดึห ตัห คอซอง. อึณ มูห ซีลัยะ ครีว, ซีลัยะ รึอน, ครึง ตา, ครึง กาโฆห ดา ซึก, อึณกรึห อูห หงูน บอ อึณปร็อง เฆ มาโลว. เฆ บอ อาบ โกรว ตี ดี คูนดีคัม อาซาโลวโมว.

25 คูนดีคัม อาซาโลวโมว บอ มึห ทึบ พวน แหรณ ทึบ อาดา มังปร็อง บอ ลักเลา อัน. อัน มึห อึณปร็อง อู หมึณ ดี อา แหรณ โดว. อัน แตห เฆ กอย แคง มืง อี โลว ยอด ลึมลา อัน บอ โดง กอย กาตัด อัน แคง มืง เยรูซาแลม. 26 อัน บอ อึบ เฆ คูนดีคัม บอกาเฆลียด, จูห ดี แบลง อึม กอ วี ฌัม มืง พีลีที, ฌัม บอ ดี กาอูน กาดาย มืง แอฆึบ. 27 คูนดีคัม อาซาโลวโมว ตู แตห รึอน มึห ดีง็อห ดีคัน. แคง มืง เยรูซาแลม รึอน บอ เคร ปี มาว. เฮ อารีด มืร แฮะ กืน กาเซา บอ เคร ปี เฮ ดีปู แปร อี กอย ดี ดัง นอน. 28 อาซาโลวโมว บอ จึห อึณปร็อง แคง มืง แอฆึบ บอ แคง มืง เฮา ดอน นา ดอน โปละ.

29 ลอง ปี ปาย โจว บาน อาซาโลวโมว อี หณัม ดึอม กาลาง, จูห ซีณ ดอ โฆว กอ ฌัม กาแดะ, แฮะ แดม อูน แคง บับ ปอ โมยว. อึณ แฮะ แดม แคง บับ อี กาลาง ลอง ดา อี หลู ดี เฌาพรา อี จืร อานาทาน บอ แคง บับ ดา อี หลู ดี เฌาพรา อี จืร อาฮียา อี ตัห มืง ซีโลว. อึณ แฮะ แดม บอ แคง บับ ลอง ปี บยัะ เฌาพรา ดี อาอีตอ อี มูห ดูอี อี ยึร, อี กาลาง ลอง อาเยโรวโบว อี มูห ฆอน อาเนบัด. 30 อาซาโลวโมว กอย แคง มืง เยรูซาแลม, อึบ บึง มืง ดูอี อีซาเรลัะ บอกาเฆลียด อาดา พวน ฆึร ซีนัม. 31 อัน บอ ยัม ฮาว ปี ดา ดา อัน. เฆ บอ ดีบ อัน แคง มืง อาดาวีด อี มูห มืง ฆูณ อัน. ฆอน อัน อี จืร อาเรโบม บอ วี ปลูะ อัน.