1 อาซาโลวโมว แฮะ ซัม โฮว เฌาพรา บอ โฮว อัน กอ โตต อา ฆึร ซีนัม. 2 แฮะ ฮอต, อัน วี อึณปราย เรา แบน เรา แบน เรา แปะ แฮะ อาบ ดัว อาฮีรัม ดี อัน, วี แตห เฆ ดูอี อีซาเรลัะ วี กอย แคง เรา เฆ ตี. 3 อัน วี กาโฆห ปึอน บอ มืง ฮามาดจอพัะ. 4 อัน วี แด มืง ดามอ อี กอย แคง แปร กาฮ็อห, วี อึณปราย บอ มืง โดง อูน อัน โกรวกราม อัน อี กอย แคง กาดาย มืง ฮามาด ตึอน. 5 อัน แฮะ อึณปราย มืง เบดโฮวรูน บลาก นา กัว, บอ มืง เบดโฮวโรน อี กอย บลาก นา เตต. เฆ บอ แบน มืง อี มัน ซีคยา, มึห บอ แรง บอ มาโลห บอ โดง บัร. 6 แฮะ อึณปราย บอ มืง บาลาด บอ มืง โดง อูน อัน โกรวกราม อัน, อูน อึณปร็อง บอ ลักเลา ปี ป็อะ ดา ซึก อัน. แคง มืง ปี อึบ อัน ดอน นา ดอน โปละ บอ มูห มืง เยรูซาแลม บอ นอน เลบานูน. อัน มืร แฮะ โบง แคะ ปี ซี โบง อัน.

7 แคะ กอย เฆ ดูอี อาโมยว เฮา อี ตู มูห ดูอี อีซาเรลัะ, อาซาโลวโมว วี แตห เฆ แบน หมาย อัน กอ ฌัม อาตึร นี. อึณ บอ มูห ดูอี เฮทีด, ดูอี อาโมวรีด, ดูอี เพเรซีด, ดูอี ฮีวีด บอ ดูอี เยบูซีด อี ซี ฆืด ซี กอย. 8 อึณ บอ มูห หลูกหลาน เฆ ดูอี ปี ตู ดึอม โฮว เตา เฆ ดูอี อีซาเรลัะ ดอ มึอน, อาซาโลวโมว วี ดึห เฆ บอกาเฆลียด แบน หมาย อัน. 9 อี มูห ดูอี อีซาเรลัะ, อาซาโลวโมว ตู แตห เฆ แบน หมาย อัน. อัน แตห เฆ แบน ดา ซึก, แตห เฆ แบน แดเจณ อัน, แบน อามู อามาด อัน บอ ดา ตาง อี อึบ ดา ซึก อัน, อี อึบ พึง เฆ อี ป็อะ ลักเลา บอ อึณปร็อง อัน. 10 เฆ อี มูห อามู อามาด อี ตาง, อี อึบ ฆาน ปี โลว โบง ดอน โมยว, เฆ กอย อา มาย็อห ดี พัน ฆึร วี.

11 อี มูห ฆอน อีบึณ คูนดีคัม พาโรว ตึอน, อาซาโลวโมว บอ ดึห เลห อัน แคง มืง อาดาวีด, แตห อัน วี กอย แคง โฮว ปี โบง อูน อาซาโลวโมว อาดา อัน. อาซาโลวโมว วี ต็อห, “อีบึณ โอว นี, อัน ตู กาอาบ กอย แคง โฮว คูนดีคัม อาดาวีด อี แฮะ ดึอม อึบ มืง อีซาเรลัะ นี. อึณ มูห โดง ตัห อูน เฆ ฌีดืก เฌาพรา. โคว, อึณ มูห โดง ซีงา บอด.”

12 แฮะ ฮอต ปาย ตี อาซาโลวโมว มืร หลู ปี ดี หลู แดง กาโช็ง หลู ปี เบลห อูน อัน ดี อาต โฮว เฌาพรา ตึอน. 13 อัน มืร หลู ปี ดี หลู อี โดะ ดี เงา, แตห อึณ โดบ แคะ ปี กาลาง อูน อาโมวแซ อาดา ซีแง ดีเหลา, ซีแง ลืนโมน บอ ซีแง บลอย ปี ดึอม โบง เฆ อู ซีนัม โอย โมยว. อึณ บอ มูห บลอย โฮม คามูน ตู ฮับ ซีนัม บรัห, บลอย หลู โหงว กามาย บอ บลอย กอย แคง ทึบ. 14 อาซาโลวโมว มืร คาน เฆ ดา อี หลู ดี เฌาพรา บอ เฆ ดูอี อาโมยว อาเลวี, แตห เฆ จอย ดา อี หลู ดี เฌาพรา บอ แยต เฆ ต็อห โหมว อี อืบ เฌาพรา. อัน แตห เฆ โบง ฆาน ปี โลว โบง เฆ ดอน ซีแง ราง อาเซ ราง อัน. อัน มืร คาน ดูอี บัร โฮว เฌาพรา, แตห อึณ มึห พึง เหมา พึง อัน, แตห เฆ บัร ดอ แฮะ โจห อาคราว เฆ. อัน โบง แตห อึณ โดบ แปะ แฮะ ดึอม จัร อาดาวีด อี มูห ดูอี ปี อึบ เฌาพรา ตึอน. 15 เฆ มืร ตู วัห ตู แวน แคะ ปี กาลาง อูน คูนดีคัม ดี เฆ ดา อี หลู ดี เฌาพรา บอ เฆ ดูอี อาโมยว อาเลวี ลอง โดง ดี อูน เฆ โกรวกราม บอ ลอง ฆาน ดอน โมยว.

16 ปาย ตี ฆาน ปี โลว โบง อาซาโลวโมว แฮะ ฮอต ฮอต โตต. อู ซีณ ซีแง กาจูห อัน ดี ซัม เจณ ร็อง โฮว เฌาพรา กอ วี ฌัม ซีแง ฮอต โตต. ฆาน ปี โบง อัน ตี แฮะ ออง แฮะ กยัะ โตต ดอน โมยว.

17 วาย อัน ตี, อาซาโลวโมว บอ วี ฮาว ดี มืง เอจาโยนกาบา บอ ดี มืง เอลาด โคบ อึม นัมมูกซารา แคง กาดาย มืง เอโดม. 18 คูนดีคัม อาฮีรัม มืร ตึย รึร ซังโพว อัน บอ ดูอี อัน อี นับ ดี ป็อะ รึร, อี นับ บอ ปี ปาย อึม ตาง, แตห เฆ ป็อะ รึร ซังโพว โดบ ดูอี อาซาโลวโมว เฆ ตี. เฆ บอ ฮาว ดี มืง โอวพี บอ ดึห ตัห ครีว พวน มาย็อห ดี พัน ฆึร ทาเลน, ตัห อาบ ดัว ดี อาซาโลวโมว.