1 อาเรโบม แฮะ แบน คูนดีคัม, มาน มืง ปี อึบ อัน มืร แฮะ มัน ซีคยา. อาพูง ดังโคว อัน มืร แฮะ แกร ดี ตาง. แฮะ ฮอต ปาย ตี บอ อัน บอ เฆ ดูอี อีซาเรลัะ^a บอกาเฆลียด วี แวน ดารา เฌาพรา. 2 โกบ แฮะ โบง ลูต เฆ เฌาพรา, คูนดีคัม อาซีซัก อี อึบ มืง แอฆึบ มืร ตัห กาโฆห ดี มืง เยรูซาแลม. ดอ อัน ตี คูนดีคัม อาเรโบม แฮะ อึบ มืง อาดา พัน ซีนัม. 3 คูนดีคัม อาซีซัก บอ แรน ตัห ลักเลา อึณปร็อง ปี ป็อะ ดา ซึก อาดา อู แหรณ ดี อา มาย็อห หลาง, บอ ดา ซึก อี ป็อะ อึณปร็อง อาดา เดา หมึณ วี. แดง ตี บอ มึห บอ ดา ซึก อี แฮะ กืน กาเซา กอ ฮู แป ดี ตีห. อึณ บอ มูห ดา ซึก มืง ลีบียา, ดา ซึก มืง ซูกี บอ ดา ซึก มืง กูซา. เฆ แฮะ กาโพรม ดี โฮะ มืง เยรูซาแลม. 4 เฆ แฮะ ฮอต กาโฆห ปึอน โตต มืง อี มึห แรง อี มัน ซีคยา อี กอย แคง อืง ยูดา. แฮะ ฮอต เฆ วี ฮาว ฌัม มืง เยรูซาแลม.

5 ปัน ตี ดา อี บยาน โฆรห เฌาพรา อี จืร อาเซมายา บอ วี ตัห โดง กอย คูนดีคัม อาเรโบม บอ เฆ ดา กาณา อี อึบ กาดาย มืง ยูดา, อี แฮะ ตัห กอย กาฌูะ แคง มืง เยรูซาแลม โกบ โยว เฆ คูนดีคัม อาซีซัก ตึอน. อัน วี กาลาง ดี เฆ ต็อห, “เฌาพรา แฮะ ต็อห, ‘เบ แฮะ แวน โอว. โคว, ดอ ตี นี, โอว ดี อาบ เบ ดี อาซีซัก.’”

6 แฮะ ฮอต, คูนดีคัม บอ เฆ ดา กาณา อี อึบ ดูอี อีซาเรลัะ, เฆ บอ วี ปีเตียม น็อห เฆ ดี เฌาพรา ต็อห, “แปะ แฮะ คราม เฌาพรา ดี โบง ตี, แฮะ มูห แฮะ หมาน.”

7 ดอ ยึร เฌาพรา ลอง อัน ตี, อัน บอ วี กาลาง ดี อาเซมายา ปอ อู เฌณ ต็อห, “เฆ แฮะ ฮอต วี ปีเตียม น็อห เฆ. โคว, โอว อาว ฮู วี ปยาต แวน โตต เฆ. คูนดีคัม อาซีซัก ปี บอ ตัห กาโฆห ดี เฆ มืร, โอว ตู แตห อัน โบง ดี เฆ ดูอี แคง มืง เยรูซาแลม แคะ ปีรู โอว ดี เฆ. 8 มาแล, อาซีซัก ยี ดี ออง ดี แป เฆ. เฆ ดี แบน หมาย อัน, แตห เฆ นับ ลอง ปี โลว โบง เฆ ฆาน อาดา โอว, บอ ปี โลว โบง เฆ ฆาน อาดา คูนดีคัม แดง กาดาย นี แฮะ ลาย บลืง แคะ เหมา.”

9 ปาย ตี คูนดีคัม อาซีซัก มืร ตัห กาโฆห ดี มืง เยรูซาแลม. อัน บอ ดึห ฮาว โกรวกราม อี กอย แคง โฮว เฌาพรา บอ โกรวกราม อี กอย แคง โฮว คูนดีคัม. อัน บอ ดึห ฮาว โตต ดอน โมยว บอ มัง ฆ็อง ครีว ปี โบง อูน คูนดีคัม อาซาโลวโมว ตึอน. 10 คูนดีคัม อาเรโบม ยี วี โบง มัง ฆ็อง บ็อง เดณ, แตห อึณ วี กาดาง มัง ฆ็อง ครีว, วี อาบ ดี ดา โบว อี อึบ ดา ซึก อี บัร มาโลห แคง โฮว อัน. 11 ดอน เฌณ ดอ ฮาว คูนดีคัม ดี โฮว เฌาพรา, เฆ อี บัร โฮว อัน บอ โฆ็ง มัง ฆ็อง ตี, ฮาว โดบ อัน. แฮะ ฮอต, เฆ ปี วี ตัห อูน แคง โฮง โดง บัร เฆ ตึอน.

12 โกบ คูนดีคัม อาเรโบม แฮะ วี ปีเตียม น็อห อัน ดี เฌาพรา, เฌาพรา มืร อาว ฮู โบง แตห อัน ชึม โตต บอกาเฆลียด โกบ แฮะ รู เฌาพรา ดี อัน. แคง กาดาย มืง ยูดา ซี มึห อี บอด อี หมึอม.

13 คูนดีคัม อาเรโบม มืร แฮะ อึบ มืง เยรูซาแลม, แฮะ มึห อายา, มึห อาพูง ดังโคว บอ แตห มืง อัน แบน มืง อี มัน ซีคยา. ดอ กาจูห อัน ดี อึบ แคง โฮว ตี, อาซาก อัน แฮะ ปึอน พวน ฆึร ดี อู ซีนัม. อัน บอ อึบ แคง มืง เยรูซาแลม อาดา ฆึร ดี บู ซีนัม. มืง ตี บอ มูห มืง ปี ร็อห เฌาพรา กาแต มืง ดูอี อีซาเรลัะ บอกาเฆลียด, แตห อึณ แบน โดง กอย อัน เซเซ. มา อาเรโบม บอ จืร นาง นามา อี มูห ดูอี อาโมยว อัมโมน. 14 อาเรโบม ตี ยี โบง นา ตู หมึอม. โคว, อัน ตู มึห น็อห ซี เหรต ดี โบง ปี อึง เฌาพรา.

15 ลอง ปี โบง อาเรโบม จูห ซีณ ดอ โฆว กอ ฌัม กาแดะ, แฮะ แดม อูน แคง บับ บืน ดา อี บยาน โฆรห เฌาพรา อี จืร อาเซมายา, บอ แคง บับ อาอีตอ อี มูห ดูอี อี นับ ดี ยึร. อาเรโบม อี อึบ มืง ยูดา ฆาย อาเยโรวโบว อี อึบ มืง อีซาเรลัะ บอ ลาย กาโฆห เซเซ. 16 อาเรโบม บอ ยัม ฮาว โดบ ดา ดา อัน. เฆ บอ ดีบ อัน แคง มืง อาดาวีด ตึอน. ฆอน อีมาย อัน อี จืร อาพียัะ บอ วี แบน คูนดีคัม ปลูะ อัน.