คูนดีคัม อาซาโลวโมว แฮะ ฮอต โบง โตต ดอน โมยว อาดา โฮว เฌาพรา ตึอน, อัน วี ดึห บอ โกรว แปะ แฮะ ดึอม หลู อูน ฆูณ อัน อี มูห อาดาวีด ดี เฌาพรา. บอ มูห ครีว, รึอน บอ ครึง ตา แบน โมยว แบน โมยว อัน วี ฮับ โตต แคง โฮง ปี อูน เฆ โกรวกราม แคง โฮว เฌาพรา.

2 ปัน ตี คูนดีคัม อาซาโลวโมว วี แดะ แคะ กอย เฆ ดา ตาง อี อึบ อี แยต เฆ ดูอี อีซาเรลัะ, อี มูห ดา ตาง อี อึบ แคง อึณกรึห เฆ. อัน มืร แดะ บอ เฆ อี มูห ฆีณ อึณโฮม แตห เฆ ตัห กาฌูะ โดง กอย อัน แคง มืง เยรูซาแลม, แตห เฆ ฮาว ดึห ฌีดืก เฌาพรา อี กอย ดี มืง อาดาวีด อี บอ จืร มืง ฌีโอน. อัน ซี แตห เฆ วี ตัห อูน ฌีดืก ตี แคง โฮว เฌาพรา. 3 เฆ ดูอี อีซาเรลัะ บอกาเฆลียด มืร ตัห กาฌูะ โดง กอย คูนดีคัม อาซาโลวโมว. ดอ อัน ตี อึณ มูห มาเฆียน อึณบู, อาคราว โบง เฆ บลอย.

4 เฆ ดา ตาง แฮะ ฮอต ตัห กาฌูะ โตต, เฆ อี มูห ดูอี อาโมยว อาเลวี, เฆ บอ โจะ กาโย็ง ฌีดืก เฌาพรา ตี. 5 เฆ วี ฮาว โดง กอย โฮว เฌาพรา ตึอน. เฆ ดา อี หลู ดี เฌาพรา บอ เฆ ดูอี อาโมยว อาเลวี เฆ บอ ดึห บอ ทึบ บีก บอด บอ โกรวกราม ดอน โมยว อี บอด อี กอย แคง ทึบ บีก บอด ตี. 6 คูนดีคัม อาซาโลวโมว บอ เฆ ดูอี อีซาเรลัะ อี ตัห กาฌูะ โดง กอย อัน ตึอน, เฆ บอกาเฆลียด มืร ตัห กอย นา อาต ฌีดืก เฌาพรา ตี. เฆ บอ หลู มาบู เฆ มามัก กืน กาเซา, กอ ฮู แป ดี ตีห.

7 แฮะ ฮอต, เฆ ดา อี หลู ดี เฌาพรา, เฆ บอ ดึห ฌีดืก เฌาพรา ตี, ฮาว อูน แคง โฮง อี กอย นา แคง โฮว เฌาพรา อี มูห โดง ซีงา บอด หลึอม โตต. เฆ บอ เบลห อูน ฌีดืก ตี, แตห อัน กอย ครึม เพียง ราง อามู อามาด เฌาพรา อี จืร เครูบ ตึอน. 8 อารึบ เครูบ อา กาดัง ตี ฆาย แฮะ บลัห เพียง ฆาย นา แดง ฌีดืก ตึอน, แตห อึณ ซีบลึก โตต ฌีดืก บอ มัง ฆอด อัน. 9 มัง ฆอด ตี แฮะ โต็ง กาเซา. เซ ฮี กอย ซืร นา อาต โดง บอด หลึอม โตต, แฮะ ปึอน ยึร. เซ ยี กอย นา เรต, อาว ปึอน ยึร. มัง ฆอด เฆ ตี, เฆ บอ อูน ปาย ตี กอ ฌัม อาตึร นี. 10 แคง ฌีดืก ตี, อึณ มึห มี มาว อา ดีพลัะ ปี ฮับ อูน อาโมวแซ ดอ กอย อัน แดง นอน ซีนาย ตึอน. วาย แฮะ เลห เฆ แคง มืง แอฆึบ, ดอ อัน ตี เฌาพรา บอ เฆ ดูอี อีซาเรลัะ แฮะ ลาย กาแซณ. แดง ตี, อาว มึห มาเซ อี กอย นา แคง.

11 เฆ แฮะ ฮอต เบลห อูน ฌีดืก ตี แคง โฮง ตึอน, เฆ ดา อี หลู ดี เฌาพรา วี เลห แคง โดง ซีงา บอด ตี. แคะ กอย เฆ ดา อี หลู ดี เฌาพรา อี ตัห กาฌูะ ดี ตี, เฆ บอกาเฆลียด แฮะ ฮอต โบง แตห โดว เฆ ซีงา. เฆ มืร ตู กาพา โยว อึณ มูห พึง เฆ ตู มูห พึง เฆ อี โลว โบง ฆาน. 12 แคะ กอย เฆ ดูอี อาโมยว อาเลวี อี นับ ดี ต็อห โหมว บอกาเฆลียด บอ มูห อาซาบ, อาเฮมาน, อาเยดูทูน บอ หลูกหลาน เฆ บอ บีนอง วอแว เฆ บอกาเฆลียด, เฆ แฮะ ชึบ ดี ตา บีก กาตัม ลูย. เฆ วี จ็อง นา เลห ซีแง กาโช็ง หลู บอ บัห ดีง, โชห แชณ, กรีด ดีง ดีเรา. เฆ กอย โคบ เฆ ดา อี หลู ดี เฌาพรา อู มาย็อห ดี อา ฆึร วี อี แฮะ บูด เวา นึง แป ตึอน. 13 เฆ อี บูด เวา บอ เฆ อี ต็อห โหมว, เฆ มืร ต็อห โพรม รึม, แตห แมง เฆ มูห อู โมยว. เฆ อี บูด เวา บอ เฆ อี โชห แชณ บอ บัห ดีง แบน โมยว แบน โมยว, เฆ อืบ มยูก เฌาพรา. เฆ มืร กาโพรม ดี ต็อห โหมว ตาง ตาง. เฆ ต็อห, “แตห เอ อืบ มยูก เฌาพรา โกบ แฮะ บอด มยาด กาเซา อัน เฌา. อัน เฌา มืร มึห น็อห ร็อก กาเว เซเซ.” แฮะ ฮอต ปาย ตี อึณอูะ มืร ตัห โนะ แคง โฮว เฌาพรา ตี. 14 โกบ อึณอูะ ตี เฆ ดา อี หลู ดี เฌาพรา กอ ฮู ปึอน ดี หลู ดี กรึบ เฌาพรา. โคว, อาพูง ดังโคว เฌาพรา แฮะ โนะ แคง โฮว เฌาพรา ตี.