1 แฮะ ฮอต, อาซาโลวโมว วี ซาคึร ต็อห, “แม เฌาพรา แฮะ ต็อห, แม ดี กอย แคง อึณอูะ เฮต อี อับ ว็อง ดีตีณ. 2 ดอ ตี นี โอว แฮะ โบง กาง โดง ดี กอย แม เฌา อี มูห โดง ดี กอย แม เฌา เซเซ.”

3 เฆ ดูอี อีซาเรลัะ บอกาเฆลียด, ดอ กอย เฆ ดี ตี, โดง ดี กอย คูนดีคัม มืร วี มางัห นา กอย เฆ ดูอี กืน ตี, วี ม็องการา ดัว ดี เฆ. 4 อัน วี ต็อห ดี เฆ, “แตห เอ อืบ เฌาพรา อี มูห เฌาพรา ปี กรึบ เอ ดูอี อีซาเรลัะ. อัน เฌา แฮะ โบง โดบ โฆรห แปะ แฮะ กาแซณ อัน ดี อาดาวีด อี มูห ฆูณ โอว. 5 อัน แฮะ ต็อห, ‘อู ซีณ ซีแง ดอ ทูด เลห โอว เฆ ดูอี ปี อึบ โอว แคง มืง แอฆึบ กอ ฌัม ดอ ตี นี โอว ตู ร็อห โดง ดี กอย โอว แคง มืง อีซาเรลัะ, แตห เฆ ปึอน ดี โบง กาง โดง ดี กอย โอว, แตห เฆ ปึอน ดี กรึบ โอว. โอว มืร ตู ดึอม ร็อห วี อี ดี อึบ เฆ ดูอี ปี อึบ โอว, อี มูห ดูอี อีซาเรลัะ ตี. 6 มาแล ดอ ตี นี โอว แฮะ วี ร็อห ดี กอย แคง มืง เยรูซาแลม, แตห อึณ แบน โดง ดี ตัห กรึบ อี ดี โอว. โอว มืร แฮะ ร็อห อาดาวีด, แตห อัน อึบ เฆ ดูอี ปี อึบ โอว อี มูห เฆ ดูอี อีซาเรลัะ.’”

7 แฮะ ฮอต อาซาโลวโมว วี ต็อห, “อาดาวีด อี มูห ฆูณ โอว ตี แฮะ คราม ดี ซัม โฮว เฌาพรา, แตห อึณ แบน โดง ดี กรึบ เฆ ดูอี ดี เฌาพรา อี มูห เฌาพรา ปี กรึบ เอ ดูอี อีซาเรลัะ. 8 เฌาพรา ยี แฮะ วี ต็อห ดี อัน, ‘แปะ แฮะ คราม แม ดี ซัม ดี โบง โฮว อาดา โอว ตี แฮะ มูห นา บอด นา หมึอม. 9 มาแล, แม ยี ตู ปึอน โบง ดอ เหมา. ฆอน อาราง แม อี ดี ซัม โฮว ตี อาดา โอว.’

10 ดอ ตี นี, เฌาพรา แฮะ โบง โดบ กาดีก ซัดฌา แปะ แฮะ ดัว อัน ตี. โอว มืร แฮะ ฮอต ปลูะ ฆูณ โอว, วี กอย แคง โฮว อัน. เฌาพรา แฮะ แตห โอว แบน คูนดีคัม อี อึบ ดูอี อีซาเรลัะ. โอว มืร แฮะ ปึอน ดี ซัม โฮว เฌาพรา, แตห อึณ แบน โดง กรึบ เฆ ดูอี ดี เฌาพรา อี มูห เฌาพรา อี อึบ เฆ ดูอี อีซาเรลัะ. 11 แคง โฮว เฌาพรา ตี, โอว แฮะ วี ฮับ อูน บอ ฌีดืก เฌาพรา อี มึห ดีแคลบ มาว อี แฮะ แดม อูน โฆรห แปะ แฮะ ลาย กาแซณ เฌาพรา บอ เฆ ดูอี อีซาเรลัะ.”

12 อาซาโลวโมว แฮะ ฮอต กาลาง โฆรห ตี, อัน บอ ตัห จ็อง นา อาต กาโช็ง หลู, แตห เฆ ดูอี อีซาเรลัะ บอกาเฆลียด ยึร อัน. อัน มืร โจะ โซ็ง แด อัน บอ อา บลาก. 13 อาซาโลวโมว แฮะ โบง อูน กาโช็ง บ็อง เดณ อี โต็ง พัน กานีห บอ ตาง พัน กานีห. นา จา อัน โอย กานีห. อัน แฮะ โบง อูน แคง แวง โฮว เฌาพรา ตี. อัน มืร ครึบเครา แดง กาโช็ง ตี, แตห ดูอี ดอน อี ปึอน ดี ยึร อัน. อัน มืร โจะ โซ็ง แด อัน โฮะ แคง ฆางหราว บอ ซาคึร ต็อห,

14 “อึย แม เฌาพรา อี มูห เฌาพรา อี อึบ ดูอี อีซาเรลัะ. บอ แคง ฆางหราว บอ แดง กาดาย อาว มึห เฌาพรา ปอ อู กาดัง อี คัม ดี โดบ กาดีก ซัดฌา ปี กาแซณ อัน, อี มึห น็อห ร็อก กาเว เฆ ดูอี อี โดบ ซีคยา อัน. 15 อาดาวีด อี มูห ฆูณ โอว, แม เฌา มืร แฮะ โบง โดบ ปี กาแซณ แม ดี อัน. อึณ แฮะ แบน, แฮะ เฌะฌูง โตต ดอน แด ดอ ตี นี.

16 อึย แม เฌาพรา อี มูห เฌาพรา อี อึบ ดูอี อีซาเรลัะ, อาตึร นี มืร โอว หมาณ, แตห อึณ แบน ปี ปี ดึอม ดัว แม กาดีก ซัดฌา ดี ฆูณ โอว. แม แฮะ ต็อห, ‘เซ เฆ หลูกหลาน แม บอ โบง โดบ ซีคยา ซีคยา ปี อึง โอว, เฆ ดี ปึอน ดี แบน คูนดีคัม อี อึบ ดูอี อีซาเรลัะ เซเซ.’ 17 โคว อัน ตี, แม เฌาพรา อี มูห เฌาพรา อี อึบ ดูอี อีซาเรลัะ, โอว หมาณ, โฆรห กาดีก ซัดฌา ปี กาลาง แม ดี อาดาวีด อี มูห แดเจณ แม เฌา, แตห อึณ โบว แบน โตต ดอน โมยว.

18 มาแล, แม แฮะ ดึอม ต็อห ดี ฆูณ โอว, ‘แม ทาง แฮะ หมาน โอว ดี กอย รึม โดบ ดูอี แดง กาดาย นี?’ โอว ยี แฮะ นับ, เบลณ เฆ ฆางหราว แฮะ จา กาเซา, ยี ตู ฆลึม แตห แม เฌา กอย. โฮว แปะ แฮะ ซัม แฮะ โบง โอว นี, อึณ แฮะ แว ตู ฆลึม, แตห แม เฌา กอย. 19 อึย แม เฌาพรา อี มูห เฌาพรา อี อึบ โอว, โอว อี มูห แดเจณ แม เฌา, โอว หมาณ, แตห แม เฌา โทม โฆรห ปี ซาคึร โอว, แตห แม กาเว โอว บอ ดัว แคะ ปี หมาณ โอว. 20 แตห แม เฌา บอ บัร ยอด แมน โฮว แม เฌาพรา ดอน หมึร ดอน หณา. แม เฌา มืร แฮะ ฮอต กาลาง อูน ลอง โดง ตี, อึณ ดี แบน โดง กอย แม เฌา. ดอ ซาคึร มางัห ยอด โอว นา กอย โฮว แม เฌา ตี, หมาณ แตห แม เฌา โทม โฆรห โอว. 21 โอว แดเจณ แม เฌา บอ เฆ ดูอี อีซาเรลัะ อี มูห ดูอี ปี อึบ แม, ดอ วี มางัห ยอด เย ดี โฮว นี บอ ซาคึร หมาณ ดี แม เฌา, แตห แม โทม โฆรห ปี ซาคึร เย แดเจณ แม เฌา. แม เฌา อี กอย แคง ฆางหราว, แตห แม โทม โฆรห เย บอ ฆ็อห แวน หมาบ เย.

22 เซ อึณ มึห ดูอี อี แฮะ ลาย กาลูต ดี ฆึก อัน, เซ อัน บอ ตัห ดี กาโช็ง หลู อี กอย แคง โฮว นี บอ ตัห ดืง ลอง ตู มึห อัน หมาบ, 23 หมาณ, แตห แม เฌาพรา อี กอย แคง ฆางหราว บอ โทม โฆรห อัน, แตห แม เฌา ซูงพยาด อามู เฆ ตี. แตห แม เฌา บอ ดัม หมาบ ดี วี อี มึห หมาบ ตี. แตห โดว อัน วี คัม แคะ ปี โบง อัน ดี อี เฮา. วี อี ตู มึห หมาบ, แตห แม เฌา ซูงพยาด, แตห ดอน อี กอ นับ ลอง ตู มึห อัน หมาบ.

24 เซ เฆ ดูอี อีซาเรลัะ อี มูห ดูอี ปี อึบ แม เฌา แฮะ ชึม ดี รันซู เฆ โกบ แฮะ กาลึบ เฆ ดี แวน แม เฌา, เซ เฆ บอ วี ตัห ดี โฮว นี บอ มึห น็อห โฆม น็อห เตียม ดี อาต แม, วี ซาคึร หมาณ, แตห แม เฌา ฆ็อห แวน หมาบ เฆ ตี, 25 โอว หมาณ, แม เฌา อี กอย แคง ฆางหราว, แตห แม เฌา โทม โฆรห เฆ. แตห แม เฌา บอ ฆ็อห แวน หมาบ เฆ ดูอี ปี อึบ แม ตี บอ วี ดึห ตัห เฆ แคง มืง เฆ อี มูห มืง แปะ แฮะ ดัว แม ดี เฆ บอ ดี ฆูณ ดัง เฆ.

26 เซ แม เฌา ตู แตห ฆลาย โจห แคง ฆางหราว โกบ หมาบ ปี ลูต เฆ ดี แม เฌา, เซ เฆ บอ แวน หมาบ แปะ แฮะ กาลึบ เฆ ตี, วี ตัห ดี โฮว แม เฌาพรา นี บอ วี มึห น็อห โฆม น็อห เตียม, วี ซาคึร ดี แม เฌา, 27 แม เฌาพรา อี กอย ฆางหราว, หมาณ แตห แม วี โทม โฆรห เฆ บอ ฆ็อห แวน หมาบ เฆ แดเจณ แม อี มูห ดูอี อีซาเรลัะ. แตห แม วี มาโนว เฆ, แตห เฆ วี นับ ดี โบง นา บอด นา หมึอม. แตห ฆลาย มืร วี โจห แดง กาดาย แปะ แฮะ อาบ แม ดี แบน คาฆูน ดี เฆ ดูอี ปี อึบ แม เฌา เฆ ตี.

28 แคง มืง แปะ แฮะ ดัว แม เฌา ดี เฆ ตี, เซ บอ มึห อาคราว เอต ปี ดี โฮม, มึห แลง โจห, เฆา โหงว เฆ กาโย็ง โหงว มืร แฮะ ลึร ชึม, บอ มาวัะ เฆ มาอาโม็ง แฮะ โฮม, เซ เฆ ดูอี ปี อึบ แม เฌา ตี มืร แฮะ กาดูห อาเพ อาเร โกบ แฮะ ตัห กาโฆห รันซู เฆ ดี เฆ บอ มูห เซา รอฆา โมยว เหมา, 29 โอว หมาณ, แตห แม เฌา โทม โฆรห ปี ซาคึร เฆ. เซ เฆ ดูอี อีซาเรลัะ อี มูห ดูอี ปี อึบ แม เฌา ตี บอ โหลห ดูก แปะ แฮะ คัม เฆ ราง อาเซ ราง อัน, เซ เฆ บอ วี ตัห ซาคึร ซาโดง แคง โฮว แม เฌาพรา นี, 30 โอว หมาณ, แตห แม เฌา โทม โฆรห ปี ซาคึร เฆ. แม เฌา อี กอย แคง ฆางหราว อี มูห โดง กอย แม, แตห แม วี โทม โฆรห เฆ บอ ฆ็อห แวน บอ หมาบ เฆ ตี บอ โบง ดี เฆ, แตห อึณ กาดาน ดี แปะ แฮะ โบง เฆ. โคว, แม เฌา มืร นับ โตต ปี ปาย แคง น็อห เฆ. 31 เซ อึณ ปาย ตี เฆ ดูอี ปี อึบ แม เฌา เฆ ดี บอ โรวเซ แม เฌา บอ โบง โดบ ดารา แม เฌา ดอ กอย เฆ แคง มืง แปะ แฮะ ดัว แม ดี เฆ บอ ดี ฆูณ ดัง เฆ อี มูห แดเจณ แม เฌา.

32 แดง ตี บอ ดูอี อาโมยว เฮา อี ตัห มืง โต็ง อี ตู มูห ดูอี อาโมยว อีซาเรลัะ, เซ อัน ยึร ปี ปาย ปวน แม เฌา บอ ลอง อี อาเร ตาง แปะ แฮะ โบง แม เฌา ดี เฆ ดูอี อี มูห ดูอี ปี อึบ แม, เซ อัน วี ตัห กรึบ, ตัห ซาคึร ดี แม เฌา แคง โฮว นี, 33 แตห แม เฌา บอ โทม โฆรห ปี ซาคึร อัน ตี. แม เฌา อี กอย แคง ฆางหราว อี มูห โดง กอย แม, แตห แม โทม ปี ซาคึร อัน บอ ดัว แคะ ปี หมาณ อัน. เซ แม เฌา โบง ปาย ตี, เฆ ดูอี แดง กาดาย บอกาเฆลียด ดี บอ นับ ลอง แม เฌา. เฆ ดี บอ โรวเซ แม เฌา ปี เฆ ดูอี อีซาเรลัะ แฮะ โรวเซ แม เฌา. แตห เฆ นับ บอ โฮว แม เฌาพรา แปะ แฮะ ซัม โอว นี อึณ มูห โดง ดี กรึบ แม เฌาพรา.

34 ดอ ฮาว กาโฆห เฆ ดูอี ปี อึบ แม เฌา ดี รันซู เฆ บอ มูห นา เหมา อาว ต็อห, โดง จัร แม เฌา เฆ ฮาว, เซ เฆ บอ วี มางัห ยอด นา กอย มืง แปะ แฮะ ร็อห แม เฌา นี บอ วี ซาคึร มางัห ยอด โฮว แปะ แฮะ ซัม โอว อาดา แม เฌา นี, 35 แตห แม เฌา โทม โฆรห ปี ซาคึร เฆ. แตห แม เฌา อี กอย ฆางหราว โทม โฆรห เฆ บอ วี กาเว เฆ, แตห เฆ บอ วี แป รันซู เฆ.

36 เซ เฆ ดูอี ปี อึบ แม เฌา บอ แฮะ กาลึบ ดี โบง หมาบ ดี อาต แม เฌา โคว, อึณ ตู มึห ดูอี คอ อู วี อี ดี ลอด กาลึบ, แม เฌา มืร ดี รู ดี เฆ, แตห รันซู เฆ วี แป เฆ, วี ดึห ฮาว เฆ, แตห เฆ ฮาว คัม ดูก แคง มืง ปอ อู มืง บอ มูห มืง อี กอย กาตัด อี กอย กาโต็ง, โอว หมาณ, แตห แม เฌา วี โทม โฆรห ปี ซาคึร เฆ ดูอี ปี อึบ แม เฌา. 37 ดอ กอย เฆ แคง มืง อี เฮา ตี, เซ เฆ วี โหลห หมาบ เฆ, วี กาลาง หมาบ แปะ แฮะ โบง เฆ อี แฮะ ฮาย แฮะ มืก กาเซา ตี, เซ เฆ บอ วี ซาคึร ดี แม เฌา, โอว หมาณ, แตห แม เฌา วี โทม โฆรห ปี ซาคึร เฆ. 38 ดอ กอย เฆ แคง มืง อี เฮา ตี, เซ เฆ แฮะ บยอง น็อห เฆ หมาน อาคาคัร บอ วี หณึม บึง แม เฌา ดอ ซี อึบ รันซู ดี เฆ ตี, เซ เฆ บอ วี ซาคึร, วี มางัห ยอด มืง แปะ แฮะ อาบ ดัว แม เฌา ดี ฆูณ ดัง เฆ อี มูห มืง ปี ร็อห แม, เซ เฆ วี มางัห ยอด บอ โฮว แปะ แฮะ ซัม โอว อาดา แม เฌา นี, 39 แตห แม เฌา วี โทม โฆรห ปี ซาคึร ปี หมาณ เฆ ตี. แม เฌา อี กอย ฆางหราว, แตห แม บอ กาเว เฆ, วี โทม โฆรห เฆ. แตห แม วี ฆ็อห แวน หมาบ แปะ แฮะ โบง กาลึบ เฆ ตี.

40 อึย แม เฌาพรา อี มูห เฌาพรา อี อึบ โอว, โอว หมาณ, แตห แม เฌา ยอด เย บอ โทม โฆรห ปี ซาคึร ปี หมาณ เย ดอ กอย เย ดี นี.

41 แตห แม เฌาพรา ตัห โดบ ฌีดืก เฌาพรา อี บยัะ ปวน แม เฌา. แตห แม เฌา ตัห บอ กอย แคง โฮว นี เซเซ. แตห แม เฌา คยอด เฆ ดา อี หลู ดี เฌาพรา, แตห อึณ ปี เฆ ชึบ ครึง กามาย. แตห แม บอ เฆฌู เฆ ดูอี อี ซีงา บอด, แตห เฆ โบยว ดาคึย.

42 อึย แม เฌาพรา, โอว หมาณ แกวะ แตห แม เฌา แวน คูนดีคัม แปะ แฮะ พ็อห แม เฌา นามัน ดี ฆีณ อัน. แตห แม เฌา วี โหลห เซเซ แคะ ร็อก กาเว แม ดี อาดาวีด อี มูห แดเจณ แม เฌา.”