1 ดูอี เฆ นี บอ มูห หลูกหลาน อาโรน. อาโรน ยี มึห ฆอน อีมาย พวน วี อี จืร อานาดาบ, อาบีฮู, อาเลอาซา บอ อาอีทามา. 2 อานาดาบ ฆาย อาบีฮู ยี แฮะ ยัม ฮาว ดี อาต ฆูณ ฆาย. ฆาย ยี ตู มึห ฆอน. วา ฆาย อี มูห อาเลอาซา บอ อาอีทามา ยี วี แบน ดา อี หลู ดี เฌาพรา. 3 อาฌาโดก อี มูห หลูกหลาน อาเลอาซา, บอ อาฮีมาเลก อี มูห หลูกหลาน อาอีทามา, เฆ จอย คูนดีคัม อาดาวีด, แตห อัน กาย็อห เฆ หลูกหลาน อาโรน แบน พึง แบน พึง โบง ฆาน ปี โลว โบง เฆ. 4 หลูกหลาน อาเลอาซา อี มูห ดา ตาง อี อึบ อี แยต อี เฮา, เฆ ยี กืน หลึอม ดา ตาง อี มูห หลูกหลาน อาอีทามา. โคว, เฆ วี ดาง ดา ตาง อี มูห หลูกหลาน อาเลอาซา ฆึร ดี เดา วี บอ ดา ตาง อี มูห หลูกหลาน อาอีทามา ดา วี. 5 เฆ บอ ดึห จืร ดอน อี, วี กาตาม ร็อห บอ แคง ดูอี อาเลอาซา บอ แคง ดูอี อาอีทามา, แตห เฆ แบน ดา กาณา อี อึบ โฮว เฌาพรา บอ ดา กาณา อี อึบ ฆาน เฌาพรา แบน โมยว แบน โมยว, แปะ แฮะ ลาย กาย็อห เฆ.

6 อาเซมายา อี มูห ฆอน อาเนทาเนลา อี มูห ดูอี อาโมยว อาเลวี, อัน บอ แบน ดา จาเร ตาง. อัน มืร แดม ฌาราง ดูอี เฆ ตี ดอ กอย อัน ดี อาต คูนดีคัม บอ เฆ ดา กาณา อี อึบ มืง. อัน กอย บอ นา อาต ดา อี หลู ดี เฌาพรา อี จืร อาฌาโดก ฆาย อาฮีมาเลก อี มูห ฆอน อาบาทา. อัน กอย บอ นา อาต เฆ ดูอี อี อึบ อี แยต เฆ ดูอี อี หลู ดี เฌาพรา บอ นา อาต เฆ ดูอี ครึร อาเลวี. เฆ บอ แดม ฌาราง จืร เฆ ดูอี อาเลอาซา. เฆ แฮะ ฮอต แดม อู วี, เฆ ปี วี แดม จืร ดูอี อาอีทามา อู วี, แตห อึณ ลาย กาคัน ลาย กาคัน.

7 ปี กาตาม ดอ โฆว บอ เลห อาเยโฮวยารีบ. กาตาม ฮาอา บอ เลห อายีตายา.

8 ปี กาตาม ฮาโอย บอ เลห อาฮารีม. กาตาม อึณพวน บอ เลห อาซอรีม.

9 กาตาม อึณพัน บอ เลห อามาลาคียา. อึณเดา บอ เลห อามียามีน.

10 ปี กาตาม อึณบู บอ เลห อาฮาโคด. ปี กาตาม อึณดา บอ เลห อาพียัะ.

11 ปี กาตาม อึณดีม บอ เลห อายอซู. ปี กาตาม ฆึร บอ เลห อาเซคานี.

12 ปี กาตาม ฆึร ดี เหลห บอ เลห อาเอลาเซบ. ปี กาตาม ฆึร ดี ฮาอา บอ เลห อายาคีม.

13 ปี กาตาม ฆึร ดี ฮาโอย บอ เลห อาฮูพา. ปี กาตาม ฆึร ดี อึณพวน บอ เลห อาเยเซบาบ.

14 ปี กาตาม ฆึร ดี อึณพัน บอ เลห อาบีลาฆา. ปี กาตาม ฆึร ดี อึณเดา บอ เลห อาอีเมรา.

15 ปี กาตาม ฆึร ดี อึณบู บอ เลห อาเฮฌีรา. ปี กาตาม ฆึร ดี อึณดา บอ เลห อาอาบาเจด.

16 ปี กาตาม ฆึร ดี อึณดีม บอ เลห อาเบซาฮี. ปี กาตาม อา ฆึร บอ เลห อาเยเฮเซเคน.

17 ปี กาตาม อา ฆึร ดี เหลห บอ เลห อายาคีน. ปี กาตาม อา ฆึร ดี ฮาอา บอ เลห อากามูลัะ.

18 ปี กาตาม อา ฆึร ดี ฮาโอย บอ เลห อาเดลายา. ปี กาตาม อา ฆึร ดี อึณพวน บอ เลห อามาฌียา.

19 ดูอี เฆ ตี, เฆ แฮะ ลึบ แคง ฌาราง ดูอี อี โลว ลาย กาปลูะ โบง ฆาน แคง โฮว เฌาพรา, แตห อึณ โดบ ปี ดึอม โบง อูน ฆูณ ดัง เฆ อี มูห อาโรน ตึอน, แตห อึณ บอ โดบ บอ ปี กาลาง อูน เฌาพรา อี มูห เฌาพรา ปี กรึบ เฆ ดูอี อีซาเรลัะ.

20 แคง ฆอน อีมาย อามารัม บอ มูห อาเซบูลา. ฆอน อาเซบูลา บอ จืร อาเยเดยา.

21 แคง ฆอน อาเรฮาบี บอ มูห อาอีซียา.

22 แคง ฆอน อาอีฌารา บอ มูห อาเซลอโมด. แคง ฆอน อาเซลอโมด บอ มูห อายาฮาด.

23 แคง ฆอน อีมาย อาเฮโบรว บอ มูห อาเยรียา อี มูห ฆอน ฆีณ, อามารียา บอ มูห วี ฮาอา, อายาฮาเฌลา มูห วี ฮาโอย บอ อาเยกามัม มูห วี อึณพวน.

24 แคง ฆอน อาอูซีเอน บอ มูห อามีคา. แคง ฆอน อามีคา บอ มูห อาซามีรา.

25 วา อามีคา ตี บอ มูห อาอีซียา. แคง ฆอน อีมาย อาอีซียา บอ มูห อาซาคารา.

26 แคง ฆอน อีมาย อาเมนรารี บอ มูห อามาลี ฆาย อามูซี. ฆอน อายาจี บอ มูห อาเบนอ.

27 แคง ฆอน อายาจี อี มูห ฆอน อาเมนรารี บอ มูห อาเบนอ, อาซอฮัม, อาฌากูรา บอ อาอีบารี.

28 แคง ฆอน อีมาย อามาลี บอ มูห อาเลอาซา ตึอน อี ตู มึห ฆอน อีมาย.

29 แคง ฆอน อีมาย อากีซา บอ มูห อาเยราเมเอน.

30 บอ เฆ ฆอน อามูซี บอ มูห อามาลี, อาเอเด บอ อาเยรีมูด. ดูอี เฆ ตี เฆ บอ มูห ดูอี แคง ครึร อาเลวี อี โดบ อึณโฮม เฆ.

31 ดูอี เฆ ตี แฮะ กาตาม ปี บีนอง เฆ อี มูห หลูกหลาน อาโรน ตึอน. เฆ มืร แฮะ กาตาม ดี อาต คูนดีคัม อาดาวีด บอ ดี อาต อาฌาโดก ฆาย อาฮีมาเลก บอ นา อาต เฆ ดูอี อี อึบ อี แยต อึณโฮม แคง ครึร อาเลวี. ดอ กาตาม เฆ, เฆ บอ แดม บอ จืร อีกัด บอ จืร วา, แตห อึณ การัม ดอน อี.