1 วาย อัน ตี คูนดีคัม บอ จัร เฆ แดะ อี มูห ดา ตาง แคง กาดาย มืง ยูดา บอ แคง มืง เยรูซาแลม, แตห เฆ ตัห กาฌูะ. 2 อัน บอ โฮะ แคง โฮว เฌาพรา, แดะ บอ เฆ ดูอี อายูดา บอกาเฆลียด บอ ดูอี แคง มืง เยรูซาแลม บอกาเฆลียด บอ ดูอี หลู ดี เฌาพรา บอ ดูอี บยาน โฆรห เฌาพรา บอ เตียะ บอ ตาง, แตห เฆ โดบ อัน. เฆ บอ ดึห บอ บับ ปี ยึร เฆ แคง โฮว เฌาพรา, ตีห แตห เฆ ปึอน ดี โทม ดอน อี. 3 คูนดีคัม บอ จ็อง โคบ ร็อง ซาคึร, วี กาแซณ ดี เฌาพรา ปี ดึอม กาแซณ ฆูณ ดัง อัน. อัน ต็อห ดี โดบ ซีคยา เฌาพรา, ต็อห ดี โดบ ซีคยา ดารา เฌาพรา บอ คัด น็อห คัด พึอม อัน. แคะ ปี จัร เฌาพรา อี โบง, แคะ มึห อากยาม อางยาน เฌาพรา, อัน ต็อห ดี คัม ดี โบง โตต, แตห อึณ โดบ แคะ ปี แดม อูน แคง บับ นี. เฆ ดูอี อี กอย โดบ อัน, เฆ บอ ซาคึร ปาย ตี. 4 วาย ตี, คูนดีคัม วี จัร ดา ตาง หลู ดี เฌาพรา อี จืร อาฮีลาคี บอ เฆ อี แบน ดูอี หลู ดี เฌาพรา อี กอย ครึม อัน บอ เฆ อี บัร มาโลห, แตห เฆ ดึห เลห อึณกรึห ปี ตา เฆ ดอ กรึบ เฆ เฌา บาลัะ บอ นาง กานัม เอซูรา, แตห เฆ ดึห บอ ครึง ปี ตา เฆ ดอ กรึบ เฆ ดอน โมยว อี มึห ปวน แคง เบลณ. เฆ บอ ดึห เลห โตต ฌึร ตี อี กอย แคง โฮว เฌาพรา ตึอน, บอ วี ฮาว โดะ แวน นา เรต มืง เยรูซาแลม ดี โคบ ดีลัยะ แบลง คีดาโรน. เบรา อัน, เฆ บอ วี ดึห ฮาว ดี มืง เบดาเอน. 5 คูนดีคัม อาโยวซียา บอ บลัวะ แวน บอ เฆ อี มูห ดูอี หลู ดี เฌา แบน โมยว แบน โมยว แปะ แฮะ ดาง คูนดีคัม ยูดา, แตห เฆ โดะ ซีนัม อูห หงูน ดี โดง จา อี กอย แคง มืง ดอน มืง แคง กาดาย มืง ยูดา บอ อี กาตัด มืง เยรูซาแลม. อัน บอ บลัวะ แวน เฆ อี หลู ซีนัม อูห หงูน ดี เฌา บาลัะ. บอ เฆ อี กรึบ ซีแง, ซีมัณ บอ มาเฆียน, เฆ อี กรึบ บึง อี กอย แคง เบลณ ดอน โมยว, อัน บอ บลัวะ แวน โตต.

6 อัน บอ ดึห เลห กันทอน โดง กรึบ เฆ นาง กานัม เอซูรา อี กอย แคง โฮว เฌาพรา, วี ฮาว แวน นา เรต มืง เยรูซาแลม อี มูห โคบ แบลง คีดาโรน, บอ ดึห เงา โดะ, แตห อึณ กาซึม ดี ตี. อัน บอ วี ดูห อึณกรึห ตี แตห อึณ กามูน, วี ดึห กามูน อัน ตี, บรัด แดง บาเรว ดูอี กืน.

7 อัน บอ ปยาต แวน กาง เฆ อีมาย อี ลาย ลูต ลาย ลาย แคง โฮว เฌาพรา. บอ โดง ด็อะ เฆ อีบึณ ดี ฆลาง อาดา นาง กานัม เอซูรา ตึอน.

8 อัน บอ แดะ แคะ กอย ดูอี หลู ดี เฌาพรา แคง มืง ยูดา บอ มืง, แตห เฆ ตัห ดี อัน. แฮะ ฮอต, อัน วี กาดาต โดง จา, จูห ดี มืง ฆีบา กอ ฌัม ดี มืง บีราเซบา อี มูห โดง แปะ แฮะ โดะ เฆ ซีนัม อูห หงูน. อัน บอ ปยาต แวน บอ โดง จา อี กอย ดี มาโลห มืง อี จืร มาโลห มืง อาโยวซู, อี มูห ดา ตาง อึบ มืง เยรูซาแลม, อี กอย บลาก อาฆัะ มาโลห มืง ตึอน.

9 เฆ ดูอี อี ดึอม หลู ดี โดง จา อาว ฮู ปึอน ดี หลู ดี เฌา แคง มืง เยรูซาแลม. เฆ ยี ปึอน ดี โฮม คามูน อี ตู มึห ซีนัม บรัห โดบ พึง เฆ อี หลู ดี เฌาพรา.

10 อาโยวซียา บอ ปยาต โดง อี จืร ตอเพด อี กอย โดบ ดีลัยะ อี จืร ดีลัยะ เบนฮีนูม ตึอน. อัน ปยาต โดง ตี, แกวะ แตห อาเซ ปึอน ดี หลู ฆอน อีบึณ ฆอน อีมาย อัน ดี เฌา มูล็อก, โดะ กาซึม แคง เงา.

11 อัน บอ แวน มังปร็อง ปี หลู คูนดีคัม ยูดา ดี ซีแง. เฆ กอย บาง มาโลห โฮว เฌาพรา, อี กอย กาตัด กาง อานาทานเมเลก อี มูห ดา ตาง อี บัร โฮว คูนดีคัม. อัน บอ ดึห ลักเลา เฆ ตี, บอ โดะ กาซึม แคง เงา.

12 กาโช็ง หลู ปี ดึอม โบง อูน คูนดีคัม ยูดา อี กอย แคง โฮว คูนดีคัม ดี คร็อง นา แดง แปะ แฮะ ดึอม โบง คูนดีคัม อาคาด บอ กาโช็ง ปี โบง อามานาเซ อี กอย แคง แวง โฮว เฌาพรา อา โปละ ตึอน, คูนดีคัม บอ ปยาต แวน บอ มัห, แตห อึณ กาลาต กามูน โตต. อัน บอ วี ดึห กามอต อัน ตี, ฮาว แวน แคง แบลง คีดาโรน ตึอน.

13 คูนดีคัม ตึอน บอ ปยาต แวน บอ กาโช็ง เฆ อี กอย นา เลห ซีแง มืง เยรูซาแลม, อี กอย นา เตต นอน อี จืร นอน กาปยาต. กาโช็ง ตี อาซาโลวโมว อี มูห คูนดีคัม ดูอี อีซาเรลัะ, อัน แฮะ โบง แตห เฆ ปึอน ดี กรึบ นาง กานัม เอซาทารีด อี หมึอม กาอีห, ปี กรึบ ดูอี อาโมยว ซีโดน. อัน แฮะ โบง กาโช็ง ตี บอ อาดา เฌา เคมูก อี หมึอม กาอีห, ปี กรึบ ดูอี โมวอาบ บอ อาดา เฌา มูล็อก, ปี กรึบ ดูอี อัมโมน อี หมึอม กาอีห ตึอน. คูนดีคัม อาโยวซียา บอ แวน กาโช็ง ตี ดอน โบ็ง. 14 อัน บอ มัห บอ แวน อารึบ ราง ปี กรึบ เฆ, บอ ฆัร แวน บอ กันทอน ปี กรึบ เฆ นาง กานัม เอซูรา ตึอน. อัน บอ วี ดึห กาอาง ดูอี ยัม เบลห, แตห อึณ กอ โนะ โดง ตี.

15 แดง ตี บอ กาโช็ง อี กอย ดี มืง เบดาเอน บอ กาโช็ง ปี โบง อาเยโรวโบว อี มูห ฆอน อาเนบัด, อี แฮะ แตห บอ ดูอี อีซาเรลัะ กาลึบ โดบ อัน, คูนดีคัม อาโยวซียา บอ ปยาต แวน โตต ดอน โมยว กาโช็ง เฆ ตี. อัน บอ ดึห โดะ บอ มัห แตห อึณ กาลาต โตต. บอ กันทอน ปี กรึบ เฆ นาง กานัม เอซูรา ตึอน มืร, อัน บอ โดะ, แตห อึณ กาซึม โตต. 16 อาโยวซียา ตึอน แฮะ ฮอต โบง ฌึร ตี ดอน โมยว, อัน บอ วี ยอด ดอน โปละ. อัน บอ ยึร กาเดา บาเรว อี กอย แดง นอน, อัน บอ จัร เฆ ดึห เลห กาอาง ดูอี ยัม แคง กาเดา บาเรว ตี, วี เวณ โดะ แดง กาโช็ง กรึบ เฆ เฌา กานัม ตึอน, แตห อึณ วี กาดาต, แตห อึณ โดบ ปี แดม แคง บับ เฌาพรา แปะ แฮะ ดึอม กาลาง ดูอี ปี ตึย เฌาพรา.

17 ปัน ตี อัน วี ดีหมอด ต็อห, “มาว ปี ยึร โอว, อี กอย ดี บาเรว, อึณ มูห มาเซ?” เฆ ดูอี แคง มืง ตึอน วี ต็อห, “อึณ มูห มาว ปี เบลห เฆ ดี บาเรว ดูอี ตึอน, อี มูห ดูอี ปี ตึย เฌาพรา, อี ตัห มืง ยูดา. อัน แฮะ ดึอม ตัห กาลาง โตต ดอน โมยว แปะ แฮะ โบง แม ดอ ตี นี ดี กาโช็ง หลู อี กอย ดี มืง เบดาเอน ตึอน.”

18 อัน วี ต็อห, “แตห อึณ กอย ปาย ตี. อาว โลว ดึห กาอาง อัน. โคว, เฆ ตู โบง มาเซ ดี กาอาง ดูอี ตี บอ ดี กาอาง ดูอี บยาน โฆรห เฌาพรา อี ตัห มืง ซามารี.

19 แคะ กอย โฮว เฆ โดง จา แคง มืง ซามารี อี มูห ปี โบง คูนดีคัม อีซาเรลัะ, อี แตห เฌาพรา รู ดี เฆ, คูนดีคัม อาโยวซียา แฮะ ฮอต ปยาต แวน โตต, แตห อึณ ปี ปี ปยาต อัน กาโช็ง แคง มืง เบดาเอน ตึอน.

20 เฆ ดูอี อี หลู ดี โดง จา ตึอน, อัน บอ ง็อห ยัม เฆ แดง กาโช็ง หลู เฆ ตี. อัน บอ ดึห กาอาง ดูอี ยัม วี โดะ แดง กาโช็ง ตี. แฮะ ฮอต, อัน บอ วี เวณ แคง มืง เยรูซาแลม.”

21 ปัน ตี คูนดีคัม วี จัร เฆ ดูอี ดอน อี ต็อห, “แตห เอ โบง บลอย โหลห เอ เฌาพรา ดอ กาโลห อัน กาง เอ. อัน มูห เฌาพรา ปี กรึบ เอ. แตห เอ โดบ แคะ ปี แดม แคง บับ เฌาพรา นี, อี มูห บับ ลอง ลาย กาแซณ เฌาพรา ดี เอ.” 22 ซีณ ดอ มูห บาน ดา ตาง อี ซูงพยาด ดารา ดี ดูอี อีซาเรลัะ กอ ฌัม อาคราว เฆ คูนดีคัม ยูดา, ดอ แฮะ อึบ เฆ แบน วี แบน วี มืง ตี, เฆ ฮู โบง บลอย ตี คอ อู เฌณ. 23 ยี ฌัม ซีนัม ดอ อึบ คูนดีคัม อาโยวซียา มืง อาดา ฆึร ดี ดา ซีนัม, เฆ บอ วี โบง บลอย ตี แคง มืง เยรูซาแลม. เฆ บอ วี โหลห เฌาพรา ดอ กาโลห อัน กาง เฆ.

24 แดง ตี, คูนดีคัม อาโยวซียา ง็อห แวน ยา เปร บอ เฆ อี บึง กานัม. อัน บอ ปยาต แวน อารึบ ราง ปี เบลห อูน ดูอี แคง กาง เฆ อี แฮะ หมึอม กาอีห, อี กอย แคง มืง ยูดา ฆาย มืง เยรูซาแลม. อัน โบง ปาย ตี แตห อัน โดบ ดารา ปี แดม อูน แคง บับ ตึอน อี กอย แคง โฮว เฌาพรา. อึณ มูห บับ ปี ยึร ดูอี อี หลู ดี เฌาพรา อี จืร อาฮีลาคี. 25 อาต แบน อาโยวซียา คูนดีคัม, อาว มึห คูนดีคัม อี ปี อัน. วาย อัน ตี มืร, อาว มึห อี ปี อัน, อี โดบ ซีคยา ปี ต็อห เฌาพรา, อี แฮะ คัด บอ น็อห บอ พึอม บอ โดว บอ แฮณ, โบง โดบ ปี อึง เฌาพรา, โดบ ดารา อาโมวแซ ดอน โมยว.

26 มาแล, น็อห รู กาเซา เฌาพรา ยี ตู หราย. อัน เฌา รู กาเซา ดี เฆ ดูอี อายูดา โกบ หมาบ แปะ แฮะ โบง อามานาเซ อี แตห เฌาพรา รู ดี เฆ. 27 โคว, เฌาพรา แฮะ ต็อห, “โอว ดี แวน ดูอี อายูดา, แกวะ แตห โอว ซี ยึร, แตห อึณ ปี ดอ แวน โอว ดูอี อีซาเรลัะ ตึอน. โอว ดี แวน เยรูซาแลม อี มูห มืง แปะ แฮะ ร็อห โอว. โอว ดี แวน บอ โฮว นี, แปะ แฮะ ต็อห โอว, โอว ดี กอย ดี ตี เซเซ.”

28 ลอง ปี โบง อาโยวซียา อี หณัม ดึอม กาลาง, บอ ลอง แปะ แฮะ โบง อัน ดอน โมยว, อึณ แฮะ แดม อูน แคง บับ คูนดีคัม ยูดา. 29 ดอ มูห โจว อาโยวซียา, คูนดีคัม พาโรว อาเนคอ อี อึบ มืง แอฆึบ, อัน บอ ตัห โดง กอย คูนดีคัม อาซูรา ดี แบลง อึม อูพาราด. คูนดีคัม อาโยวซียา บอ ฮาว แร อึณเตณ เฆ. ดอ ลาย กาโฆห เฆ, คูนดีคัม พาโรว อาเนคอ บอ ง็อห ยัม อัน ดี มืง มีกีตอ. 30 เฆ แดเจณ อัน บอ ดึห โดว อัน ดี มืง มีกีตอ ตี, วี ดาง แดง ลักเลา เวณ ดี มืง เยรูซาแลม, เวณ ดีบ อัน แคง บาเรว อัน. เฆ ดูอี แคง มืง แคง เรา, เฆ บอ วี กาโพรม ดี ดึห ฆอน อีมาย อัน อี จืร อาโยวคัด วี พ็อห นามัน ดี ฆีณ อัน, แตห อัน แบน คูนดีคัม อี อึบ เฆ กาดาง ฆูณ อัน.

31 อาโยวคัด ตี, ดอ แบน อัน คูนดีคัม, อาซาก อัน แฮะ ปึอน อา ฆึร ดี พวน ซีนัม. อัน บอ อึบ มืง, กอย แคง มืง เยรูซาแลม อาดา โอย มาเฆียน. มา อัน จืร นาง รามูทาด, อี มูห ฆอน อาเยเรมี. อัน ตัห มืง ลีปานา. 32 อาโยวคัด ตึอน โบง อี ตู บอด อี ตู หมึอม ปี ตู อึง เฌาพรา. อึณ ปี ปี โบง ดา ดา อัน. 33 คูนดีคัม พาโรว อาเนคอ บอ เหมต อาโยวคัด, บอ ปัก อัน, แตห อัน กอย แคง มืง รีบาลาฮามาด, ตู แตห อัน กอย แคง โฮว อัน ดี มืง เยรูซาแลม. อัน บอ แฆบ รึอน จึง ดี ดูอี แคง มืง ยูดา ตี. รึอน อู มาย็อห ทาเลน บอ ครีว อู ทาเลน เฆ โลว ฮับ.^a 34 คูนดีคัม พาโรว อาเนคอ ตึอน บอ วี ดึห อาเยโฮวยาคีม อี มูห ฆอน อาโยวซียา ตึอน, แตห อัน วี แบน คูนดีคัม กาดาง ฆูณ อัน. อัน วี แตห จืร กามาย ดี อาเอยาคีม, ต็อห อัน จืร อายอยาคีม. อี มูห อาโยวคัด ตึอน, คูนดีคัม พาโรว อาเนคอ บอ ดึห ฮาว อัน ดี มืง แอฆึบ, แตห อัน กอ ยัม ดี ตี. 35 อาเยโฮวยาคีม บอ แฆบ รึอน เฆ ครีว แคง มืง ยูดา บอ มืง, ฮับ รึอน จึง ปี จัร คูนดีคัม พาโรว อาเนคอ เฆ ฮับ. อัน บอ หมาณ, แตห ดูอี แคง เรา แคง มืง ฮับ ดอน อี แคะ มึห เฆ.

36 อาเยโฮวยาคีม ตึอน แบน คูนดีคัม ดอ แฮะ โนะ อาซาก อัน อา ฆึร ดี พัน ซีนัม. อัน บอ อึบ มืง, กอย แคง มืง เยรูซาแลม ฆึร ดี อู ซีนัม. มา อัน จืร นาง เซบูดา อี มูห ฆอน อาเบตายา, อี ตัห มืง ดูมา.

37 อายอยาคีม โบง หมาบ ปี ตู อึง เฌาพรา, แตห อึณ ปี ปี ดึอม โบง ดา ดา อัน.