ดอ มูห โจว คูนดีคัม อายอยาคีม ตึอน, คูนดีคัม อาเนบูคัดเนจา อี อึบ มืง บาแบ บอ ลึบ แคง มืง อาเยโฮวยาคีม ตึอน. อายอยาคีม บอ กาดูห ดี ฮับ จึง ดี คูนดีคัม อาเนบูคัดเนจา อาดา โอย ซีนัม. แฮะ ฮอต, อัน อาว ฮู วี โยว คูนดีคัม อาเนบูคัดเนจา. จึง มืร อัน อาว ฮู วี ฮับ. 2 เฌาพรา บอ จัร พึง ดา ซึก อี ตัห มืง บาแบ, มืง อาราม, มืง โมวอาบ บอ มืง อัมโมน, แตห เฆ ตัห โฌน แคง มืง ยูดา, แตห มืง เฆ แกร ดี กาปยาต. ปาย ตี อึณ บอ แบน ปี ดึอม กาลาง แดเจณ เฌาพรา อี มูห ดูอี อี บยาน โฆรห เฌาพรา. 3 อึณ บอ แบน ปี ดึอม ต็อห เฌาพรา ตี, แตห เฌาพรา ปึอน ดี แวน ดูอี อายูดา โกบ หมาบ ปี โบง อามานาเซ ตึอน ดอน โมยว. 4 อัน แฮะ ดึอม ง็อห ดูอี ตู มึห หมาบ, อึณ กอ ปี หนาม เฆ แฮะ กอย แคง มืง เยรูซาแลม บอ มืง. โคว, เฌาพรา ตู มึห น็อห ซี ฆ็อห แวน หมาบ ตี.

5 ลอง แปะ แฮะ โบง อายอยาคีม ดอ โจว อัน อี หณัม ดึอม กาลาง, อึณ แฮะ แดม อูน แคง บับ คูนดีคัม ยูดา. 6 อายอยาคีม บอ ยัม โดบ ดา ดา อัน. ฆอน อีมาย อัน อี จืร อาเยคอนี บอ วี แบน คูนดีคัม ปลูะ อัน.

7 คูนดีคัม อี อึบ มืง บาแบ ตึอน, อัน บอ ดึห กาดาย ปี อึบ คูนดีคัม มืง แอฆึบ, จูห ดี แบลง อึม แอฆึบ กอ ฌัม แบลง ตาง อูพาราด ตึอน. โกบ ปาย ตี คูนดีคัม แอฆึบ อาว ฮู ปึอน ดี เลห ตัะ มืง อัน.

8 อาเยคอนี แฮะ แบน คูนดีคัม ดอ อาซาก อัน ฆึร ดี ดา ซีนัม. อัน บอ อึบ มืง เยรูซาแลม อาดา โอย มาเฆียน. มา อัน จืร นาง นาฮูตัะ. อัน มูห ฆอน อาเอนนาทาน อี ดึอม กอย แคง มืง เยรูซาแลม เซเซ. 9 อัน บอ โบง หมาบ, โบง มืก ปี ตู อึง เฌาพรา, แตห อึณ ปี ปี ดึอม โบง ฆูณ อัน.

10 วาย อัน ตี เฆ ดา โบว คูนดีคัม อาเนบูคัดเนจา อี อึบ มืง บาแบ ตึอน บอ ตัห โรบ มืง เยรูซาแลม. 11 ดอ กอย โรบ เฆ มืง เยรูซาแลม, คูนดีคัม อาเนบูคัดเนจา อี ตัห มืง บาแบ, อัน บอ ฌัม ดี มืง เยรูซาแลม ตึอน. 12 ดอ อัน ตี คูนดีคัม อาเยคอนี อี อึบ ดูอี อายูดา ตึอน บอ มา อัน, แดเจณ อัน, อามู อามาด อัน บอ เฆ อี โบง ฆาน อัน, เฆ บอกาเฆลียด ฮาว โดง กอย คูนดีคัม อี อึบ มืง บาแบ ตึอน, คัม ดี โฆม อัน, แตห อัน เหมต เฆ. ดอ อัน ตี คูนดีคัม อาเนบูคัดเนจา แฮะ อึบ มืง อาดา ดา ซีนัม. 13 อัน บอ ดึห ฮาว บอ โกรวกราม อี กอย แคง โฮว เฌาพรา บอ แคง โฮว คูนดีคัม. อัน ดึห บอ ครึง ครีว แปะ แฮะ โบง อูน คูนดีคัม อาซาโลวโมว แคง โฮว เฌาพรา. 14 อัน บอ เหมต ดูอี บอกาเฆลียด แคง มืง เยรูซาแลม. บอ เฆ อามู อามาด คูนดีคัม, เฆ ดา ซึก บอ ดูอี อี แหลว ดี โบง แบน โมยว แบน โมยว อัน เหมต โตต เฆ. อึณ บอ มูห อู หมึณ วี. อัน บอ เหมต ฮาว โตต เฆ, แตห เฆ แบน หมาย อัน. อัน อูน มี ดูอี ฆีน อี กอย แคง เรา แคง กาง.

15 อัน บอ เหมต ฮาว อาเยคอนี ดี มืง บาแบ. บอ มา อัน, นาง ฮอคัม, อามู อามาด คูนดีคัม บอ เฆ ดา ตาง อี อึบ มืง อัน บอ ดึห เลห โตต เฆ แคง มืง เยรูซาแลม, วี แตห เฆ ฮาว ดี มืง บาแบ. 16 คูนดีคัม บาแบ บอ เหมต ฮาว เฆ ดา ซึก บอกาเฆลียด อี กยัะ, อี มึห โปลม บู แหรณ วี. บอ ดูอี อี นับ ดี จึม, อี แหลว ดี โบง แบน โมยว แบน โมยว อู แหรณ วี. อัน บอ เหมต ฮาว เฆ บอกาเฆลียด ดี มืง บาแบ. 17 อัน บอ วี ดึห อามาทานี อี มูห ฆูณ แตะ อาเยคอนี ตึอน, แตห อัน วี แบน คูนดีคัม กาดาง อาเยคอนี. อัน บอ กาปลูะ บอ จืร อามาทานี, วี แตห อัน จืร อาเฌเดกี.

18 อาเฌเดกี ตึอน, ดอ แบน อัน คูนดีคัม, อาซาก อัน แฮะ ปึอน อา ฆึร ดี อู ซีนัม. อัน บอ อึบ บึง มืง, กอย แคง มืง เยรูซาแลม อาดา ฆึร ดี อู ซีนัม. มา อัน จืร นาง รามูทาด อี มูห ฆอน อาเยเรมี, อี กอย มืง ลีปานา.

19 อัน โบง นา ตู หมึอม ปี ตู อึง เฌาพรา, แตห อึณ ปี ปี โบง อายอยาคีม ตึอน. 20 โกบ อึณ ปาย ตี เฌาพรา บอ รู กาเซา ดี เฆ ดูอี อี กอย แคง มืง เยรูซาแลม บอ แคง มืง ยูดา. อัน บอ เบลห แวน เฆ, ตู ยอด ตู แมน เฆ.

วาย อัน ตี อาเฌเดกี อาว ฮู โยว คูนดีคัม อี อึบ มืง บาแบ ตึอน.