1 อาโยวซียา แฮะ แบน คูนดีคัม ดอ อาซาก อัน ปึอน ดา ซีนัม. อัน บอ อึบ บึง มืง, กอย แคง มืง เยรูซาแลม อาดา โอย ฆึร ดี อู ซีนัม. มา อัน จืร นาง ยีตีตัะ อี มูห ฆอน อาตายา, อี ตัห แคง มืง ปอจากาด. 2 อัน บอ โบง นา บอด นา หมึอม ปี อึง เฌาพรา. อัน โบง โดบ ปี ปาย ดา อัน ดี โบง อี จืร อาดาวีด. อัน โดบ ซีคยา, ตู วัห, ตู บลืง มาเซ.

3 อาโยวซียา แฮะ แบน คูนดีคัม อาดา ฆึร ดี ดา ซีนัม, อัน บอ จัร ดา จาเร อัน ฮาว โดง กอย โฮว เฌาพรา. ดา จาเร ตี, อัน จืร อาซาพาน. อัน มูห ฆอน อาจาจี, อี วี มูห ฆอน อาเมซูลัม. คูนดีคัม บอ ต็อห ดี ดา จาเร อัน, 4 “แตห แม โฮะ โดง กอย ดา ตาง หลู ดี เฌาพรา อี จืร อาฮีลาคี, แตห อัน ดึห ตีห รึอน อี กอย แคง โฮว เฌาพรา ปี แฆบ ดา อี บัร มาโลห ดี ดูอี กืน ตึอน. 5 แตห แม วี ดัว ดี เฆ อี อึบ ดูอี อี โบง ฆาน แคง โฮว เฌาพรา. แตห เฆ วี กาซาง รึอน ตี ดี เฆ อี โบง ฆาน แคง โฮว เฌาพรา ตี, แตห เฆ อึณปราย โดง แฮะ ลึร แฮะ กาปยาต. 6 แตห เฆ ฌาง ดูอี อี แบน ลักซามา, เฆ อี โฆว มาว บอ เฆ อี ด็อห มาว. แตห เฆ จึห เฮ เฆ แบน บอ มาว อี แฮะ ฮอต ด็อห, แตห เฆ อึณปราย โฮว เฌาพรา ตี. 7 เฆ ดูอี อี อึบ ดูอี โบง ฆาน, เฆ ยี ตู โลว แดม ดึห ฌาราง รึอน. ดอน อี บอ มึห น็อห ซืร, ตู ปรา, ตู ดึห มาเซ.”

8 ดา ตาง อี หลู ดี เฌาพรา อี จืร อาฮีลาคี, อัน วี ต็อห ดี ดา จาเร อี จืร อาซาพาน, “โอว แฮะ ยึร บับ ดารา เฌาพรา อู พืน แคง โฮว เฌาพรา.” อัน บอ ดัว แตห อาซาพาน ตีห. อัน มืร บอ ตีห. 9 ปัน ตี อาซาพาน บอ วี ฮาว โดง กอย คูนดีคัม ต็อห ดี อัน, “โอว แฮะ ฮอต ดึห เลห รึอน แคะ ปี ยึร โอว แคง โฮว เฌาพรา. โอว แฮะ วี อาบ ดัว ดี เฆ ดา อี อึบ ดูอี อี โบง ฆาน แคง โฮว เฌาพรา.” 10 แฮะ ฮอต, อัน ปี วี ต็อห ดี คูนดีคัม, “อาฮีลาคี อี มูห ดา ตาง หลู ดี เฌาพรา, อัน แฮะ ตึย ตัห บอ บับ ดี โอว.” อัน บอ ตีห แตห คูนดีคัม โทม.

11 คูนดีคัม บอ ยึร ปี ต็อห แคง บับ ดารา ตี, อัน วี กายาต ครึง ปี ตา อัน. 12 ปัน ตี คูนดีคัม วี แดะ ดูอี หลู ดี เฌาพรา อี จืร อาฮีลาคี, อาฮีกัม อี มูห ฆอน อาซาพาน, อาซาโบด อี มูห ฆอน อามีคายา, อาซาพาน อี มูห ดา จาเร อัน บอ อาซายา อี มูห แดเจณ คูนดีคัม. อัน วี ต็อห ดี เฆ, 13 “แตห เบ ฮาว ดีหมอด เฌาพรา ลอง โฆรห แคง บับ แปะ แฮะ ตีห โอว ตี. แตห บอ โอว บอ ดูอี ดอน อี อี มูห อาโมยว ดูอี อายูดา กอ นับ อึณ ดี ปาย เหมา. ฆูณ ดัง เอ ตู ตีห, ตู โทม ปี แดม แคง บับ ตี. โคว, หมาบ เอ แฮะ กืน, แตห เฌาพรา รู กาเซา ดี เอ โกบ ตู โดบ เอ เฌาพรา, แตห อึณ ปี ปี แดม อูน แคง บับ ตี.”

14 ปัน ตี อาฮีลาคี อี มูห ดูอี หลู ดี เฌาพรา, อาฮีกัม, อาซาโบด, อาซาพาน บอ อาซายา, เฆ บอ ฮาว โดง กอย อีบึณ อี มูห ดูอี บยาน โฆรห เฌาพรา. อัน จืร นาง โฮวลาตา. อีมาย อัน จืร อาซาโลม อี บัร ครึง ตา แคง โฮว เฌาพรา. อัน มูห ฆอน อาตีกาวา. อาตีกาวา ตี มูห ฆอน อาฮาราฮัด. นาง โฮวลาตา กอย แคง มืง เยรูซาแลม โดง ซัม เฆ กาง กามาย. เฆ บอ ดีหมอด อีบึณ ตี ลอง บับ ตึอน.

15 อัน วี ต็อห ดี เฆ, “เฌาพรา อี มูห เฌาพรา ปี กรึบ ดูอี อีซาเรลัะ ต็อห, แตห เบ วี เวณ โดง กอย ดา อี จัร เบ ตัห โดง กอย โอว นี. 16 แตห เบ วี แค โฆรห เฌาพรา ตี ดี อัน. เฌาพรา แฮะ ต็อห, ‘โอว ดี แตห อึณ มึห ดูก ตาง ดี เฆ ดูอี อี กอย ดี นี, แตห อึณ แบน ดอน โมยว แปะ แฮะ แดม อูน แคง บับ ปี ตีห คูนดีคัม ตี. 17 โคว, เฆ แฮะ แวน โอว. เฆ แฮะ วี หลู ปี หลู อี โดะ ดี เงา บอ หลู อี อูห หงูน ดี เฌา แบน กาดัง แบน กาดัง ปี กรึบ อี เฮา. โกบ โบง เฆ ปาย ตี อึณ แตห โอว รู กาเซา, อาว นับ ดี หราย ดอ เหมา.’ 18 ปาย ตี แตห เบ วี เวณ กาลาง ดี คูนดีคัม ยูดา อี แฮะ จัร เบ ตัห ดีหมอด เฌาพรา. แตห เบ ต็อห ดี อัน, ‘เฌาพรา อี มูห เฌาพรา ปี กรึบ ดูอี อีซาเรลัะ, อัน แฮะ กาลาง แคะ ตี ลอง บับ แปะ แฮะ ตีห แม ตี. 19 มาแล เฌาพรา ต็อห, อัน แฮะ ยึร ลอง แฮะ วี กาปลูะ แม น็อห แม. แม แฮะ วี ปีเตียม น็อห แม, วี โฆม ดี อาต เฌาพรา ดอ แฮะ ยึร แม โฆรห อัน อี แฮะ ต็อห, อัน ดี ดัม หมาบ ดี เฆ ดูอี แคง มืง นี, โลว ปยาต แวน บอ แตห เฆ คัม ดืง. แม แฮะ วี กายาต ครึง ตา แม, ยาม ดี อาต อัน เฌา. อัน มืร แฮะ ฮอต ยึร โฆรห แม ตี.

20 โกบ อึณ ปาย ตี เฌาพรา ดี วี แตห แม ปี ดา ดา แม เฆ ตึอน. เฆ ดี ปึอน ดี ดีบ แม แคง บาเรว ดอ ซี ดาคึย. แม อาว ฮู โลว ยึร ดูก ปี ต็อห เฌาพรา ดี โบง.’” นาง โฮวลาตา แฮะ ฮอต กาลาง โฆรห ตี, เฆ บอ วี ตัห กาลาง ดี คูนดีคัม ปาย ตี.