1 อามานาเซ แฮะ แบน คูนดีคัม ดอ อาซาก อัน แฮะ ปึอน ฆึร ดี อา ซีนัม. อัน บอ อึบ บึง มืง, กอย แคง มืง เยรูซาแลม อาดา พัน ฆึร ดี พัน ซีนัม. มา อัน จืร นาง ฮีซาพา. 2 อัน โบง มืก, โบง อี หมึอม กาอีห ปี ตู อึง เฌาพรา. อัน โบง ปี เฆ ดูอี อาโมยว เฮา, อี มูห ดูอี ปี โฮว แวน เฌาพรา อาต ตัห ลึบ ดูอี อีซาเรลัะ แคง มืง เฆ.

3 อัน วี อึณปราย โบง กาโช็ง จา แปะ แฮะ ปยาต แวน ฆูณ อัน. อัน บอ วี โบง กาโช็ง หลู ดี เฌา บาลัะ บอ โบง บอ กันทอน ดี กรึบ นาง กานัม เอซูรา. อึณ ปี ปี โบง อาฮับ อี มูห คูนดีคัม แคง มืง อีซาเรลัะ ตึอน. อัน บอ วี กรึบ บึง ซีมัณ ดอน โมยว อี กอย แคง เบลณ. 4 เฌาพรา แฮะ ดึอม ต็อห, “โอว ดี กอย แคง มืง เยรูซาแลม เซเซ.” คูนดีคัม อามานาเซ ยี วี โบง กาโช็ง แบน โมยว แบน โมยว, เบลห แคง โฮว เฌาพรา. 5 บอ กาโช็ง ดี กรึบ ซีมัณ แคง เบลณ, อัน โบง เบลห แคง แวง โฮว เฌาพรา บอ อา โปละ. 6 อัน บอ คัม ดี ดึห ฆอน อัน, แตห อึณ แบน ปี หลู อี โดะ ดี เงา. อัน บอ แมน เบดาง บอ ดาง แตห อึณ มึห ดา บู มืง บอ ดีหมอด ยา กานัม โลง. อัน บอ โบง กืน กาเซา อี ตู บอด อี ตู หมึอม ปี ตู อึง เฌาพรา, อี แตห เฌาพรา วี รู ดี อัน.

7 อัน บอ ดึห กันทอน ปี กรึบ อี นาง กานัม เอซูรา วี อูน แคง โฮว เฌาพรา. เฌาพรา แฮะ ดึอม ต็อห ดี อาดาวีด ฆาย อาซาโลวโมว, “โอว ดี กอย แคง โฮว เฌาพรา อี กอย แคง มืง เยรูซาแลม นี เซเซ. อึณ มูห โดง แปะ แฮะ ร็อห โอว แคง โดง กอย เฆ ดูอี อีซาเรลัะ ดอน นา ดอน โปละ.” 8 เฌาพรา มืร แฮะ ต็อห, “เซ ดูอี อีซาเรลัะ บอ โบง โดบ ดารา ปี กาลาง โอว ดี แดเจณ โอว อี จืร อาโมวแซ ตึอน, โอว มืร ตู แตห เฆ ดูอี อีซาเรลัะ วี เลห ฮาว ตัะ มืง ปี อาบ โอว ดี ฆูณ ดัง เฆ ตึอน. 9 เฆ ยี ตู โทม. อามานาเซ ตึอน บอ แว แยต แตห เฆ โบง มืก หลึอม เฆ ดูอี อาโมยว เฮา, อี มูห ดูอี ปี โฮว แวน เฌาพรา อาต ลึบ ดูอี อีซาเรลัะ มืง เฆ.”

10 โคว, เฌาพรา วี กาลาง ดี แดเจณ อัน อี มูห ดา อี บยาน โฆรห เฌาพรา ต็อห, 11 “อามานาเซ อี มูห คูนดีคัม ดูอี อายูดา, อัน แฮะ โบง มืก, แฮะ โบง อี หมึอม กาอีห หลึอม ปี โบง ดูอี อาโมวรีด อาต นี. อัน แฮะ โบง แตห บอ เฆ ดูอี อายูดา วี กรึบ อารึบ ราง, แตห อึณ แบน หมาบ ดี เฆ.”

12 เฌาพรา อี มูห เฌาพรา ปี กรึบ ดูอี อีซาเรลัะ ต็อห, “โอว ดี แตห ดูก ตาง ดี เฆ ดูอี แคง มืง เยรูซาแลม บอ แคง มืง ยูดา แตห เฆ อี ยึร ดี โทม ลอง อัน ตี แบน โหยะ เฆ กาอาว. 13 โอว ดี โบง ดี มืง เยรูซาแลม แคะ ปี ดึอม โบง โอว ดี มืง ซามารี. โอว มืร ดี โบง ดี หลูกหลาน คูนดีคัม ยูดา แคะ ปี ดึอม โบง โอว ดี หลูกหลาน อาฮับ, แตห กอ ปี ดูอี โคต ซีลัยะ. เซ ฮี ฮอต โคต บอ วี ซาฆึบ อูน, อาว ฮู มึห มาเซ นา แคง. มืง เยรูซาแลม บอ ปี ซีลัยะ ตี. อาว ฮู มึห ดูอี อี ซี กอย แคง มืง. 14 โอว ดี แวน เฆ ดูอี แปะ แฮะ ร็อห โอว, วี อาบ ดี รันซู เฆ. เฆ โลว คัม, แตห รันซู เฆ ดึห โตต โกรวกราม เฆ. 15 โคว, ซีณ ดอ เลห ฆูณ ดัง เฆ แคง มืง แอฆึบ, กอ วี ฌัม อาตึร นี, เฆ แฮะ โบง ปี ตู อึง โอว แบน โจว แบน โจว, แตห โอว รู.” แคะ ตี ปี ต็อห เฌาพรา.

16 อามานาเซ ตึอน, แดง แฮะ โบง อัน หมาบ ดอน โมยว ปี ตู อึง เฌาพรา, อัน ปี วี ง็อห ยัม กืน บอ ดูอี ตู มึห หมาบ. แคง มืง เยรูซาแลม อึณ ปี หนาม ดูอี ปี ง็อห อัน, อึณ แฮะ กาลัต บอ มืง, จูห อู บลาก, กอ ฌัม ปอ บลาก.

17 ลอง ปี โบง อามานาเซ อี หณัม ดึอม กาลาง บอ ลอง แปะ แฮะ โบง อัน หมาบ แบน โมยว แบน โมยว, อึณ แฮะ แดม อูน แคง บับ คูนดีคัม ยูดา. 18 อามานาเซ บอ ยัม โดบ ดา ดา อัน. เฆ บอ ดีบ อัน แคง กาปึม อี กอย กาตัด โฮว อัน, อี จืร กาปึม อาอูฌา. ฆอน อีมาย อัน อี จืร อาโมน บอ วี แบน คูนดีคัม ปลูะ อัน.

19 ดอ แบน อาโมน คูนดีคัม อาซาก อัน แฮะ ปึอน อา ฆึร ดี อา ซีนัม. อัน บอ อึบ บึง มืง, กอย แคง มืง เยรูซาแลม อาดา อา ซีนัม. มา อัน จืร นาง เมซูลัะมีด อี มูห ฆอน อาฮารูด, อี ตัห แคง มืง ยูกบา. 20 บอ อัน โบง ปี ตู อึง เฌาพรา, โดบ ปี ปาย ฆูณ อัน ดี โบง. 21 อัน บอ โดบ ปี ปาย ฆูณ อัน ดอน โมยว บอ กรึบ เฌา อารึบ, แตห อึณ ปี ปี กรึบ ฆูณ อัน. 22 อัน บอ แวน เฌาพรา ปี กรึบ ฆูณ ดัง อัน, ตู โดบ เฌาพรา.

23 เฆ อามาด อัน บอ วี คราม ดี บลัวะ แวน อัน บอ ง็อห ยัม อัน แคง โฮว โดง กอย อัน. 24 เฆ ดูอี แคง มืง บอ กาโพรม ดี วี ง็อห เฆ อี แฮะ คราม ดี บลัวะ แวน คูนดีคัม อาโมน ตี. ดูอี เฆ ตี บอ วี ดึห ฆอน อีมาย อัน อี จืร อาโยวซียา, วี แตห อัน แบน คูนดีคัม ปลูะ ฆูณ อัน.

25 ลอง แปะ แฮะ โบง คูนดีคัม อาโมน อี หณัม ดึอม กาลาง, อึณ แฮะ แดม อูน แคง บับ คูนดีคัม ดูอี อายูดา.

26 เฆ บอ ดีบ อัน แคง บาเรว อี มูห แคง กาปึม อาอูฌา ตึอน. ฆอน อีมาย อัน อี จืร อาโยวซียา บอ วี แบน คูนดีคัม ปลูะ อัน.