คาน 20
ลอง อาเฮจัะกี มึห เซา
1 วาย อัน ตี อาเฮจัะกี แฮะ มึห เซา, แฮะ รีน ดี ยัม ดี เซา ตี. ดูอี บยาน โฆรห เฌาพรา อี จืร อาอีซายัะ อี มูห ฆอน อาโมด, อัน บอ ตัห โดง กอย อัน, ต็อห ดี อัน, “เฌาพรา ต็อห, ‘แตห แม อึณปราย อูน ซีคยา โตต ดอน โมยว. โคว, แม อาว ฮู นับ ดี แกน, แม ดี ยัม.’”
2 อัน บอ วี มางัห ดี แรง, ซาคึร ดี เฌาพรา ต็อห, 3 “อึย แม เฌาพรา, หมาณ แตห แม กาเว โอว บอ โหลห ปี โบง โอว. โอว แฮะ คัด น็อห ดี โบง นา บอด นา หมึอม ปี อึง แม.” อัน แฮะ ฮอต ต็อห ปาย ตี, อัน บอ ยาม ตาง.
4 อาอีซายัะ ตึอน หณัม ดัน ฮาว โต็ง. ดอ ซี กอย อัน แคง แวง โฮว ตึอน, เฌาพรา วี ต็อห ดี อัน, 5 “แตห แม วี เวณ โดง กอย คูนดีคัม อี อึบ ดูอี ปี อึบ โอว, ต็อห ดี อัน, ‘เฌาพรา อี มูห เฌาพรา ปี กรึบ ดา แม อี จืร อาดาวีด ตึอน อัน ต็อห, โอว แฮะ ฮอต ยึร โฆรห ปี ซาคึร แม บอ อึม งาย แม. โอว ดี แตห เซา แม แกน. วาย โอย ซีแง, แม แฮะ ปึอน วี ฮาว โฮะ แคง โฮว เฌาพรา. 6 โอว ดี แตห แม วี กอย ปอ ฆึร ดี พัน ซีนัม. โอว ดี คยอด แม บอ มืง นี, แกวะ แตห คูนดีคัม อาซูรา ปึอน ดี อึบ. โกบ ซี แตห โอว อี เฮา โรวเซ โอว บอ โกบ โหลห โอว แดเจณ โอว อี จืร อาดาวีด ตึอน, โอว ดี แร ดี ฆ็อง มืง นี.’”
7 แฮะ ฮอต, อาอีซายัะ ปี วี ต็อห, “โลว ดึห เบล ดีปู อึบ.” เฆ บอ ดึห อึบ โดง ดีม ตึอน, อัน บอ แกร ดี แกน.
8 อาเฮจัะกี วี ดีหมอด อาอีซายัะ ต็อห, “มาเซ อึณ มูห, ลักซานา อี แตห โอว นับ, เซา โอว ดี หราย วาย โอย ซีแง, แฮะ ฮอต โอว ดี วี ปึอน ดี โฮะ ดี โฮว เฌาพรา?”
9 อาอีซายัะ วี ต็อห, “ลักซานา ปี ดี บยัะ เฌาพรา ดี แม, อึณ ปาย นี. เฌาพรา ดี โบง แตห อึณ โดบ ปี อึง แม. เซ แม ซี แตห อึณ มึห กามึก ฮาว นา อาต แม ฆึร อึณฌาบ, อัน ดี โบง ปาย ตี. เซ แม ยี ซี แตห อึณ วีว นา ปัน ฆึร อึณฌาบ, แฮะ ปึอน.”
10 อัน แฮะ ฮอต ต็อห ปาย ตี. อาเฮจัะกี วี ต็อห, “เซ กามึก ดี บอ ฮาว นา อาต ฆึร อึณฌาบ, อึณ หงึย. โอว ซี แตห อัน วีว นา ปัน ฆึร อึณฌาบ.”
11 อาอีซายัะ อี มูห ดูอี บยาน โฆรห เฌาพรา ตึอน, อัน บอ วี ซาคึร ดี เฌาพรา. เฌาพรา บอ โบง กามึก ตึอน แตห อึณ วีว นา ปัน ฆึร อึณฌาบ, แตห กามึก ตี วี โลง อาดา ฆึร บล็อะ แดง อึณแตงa แปะ แฮะ ดึอม โบง คูนดีคัม อาคาด ตึอน.
12 ดอ อัน ตี คูนดีคัม อาเมรอดับบาดาน อี มูห ฆอน อาบาดาน, อี อึบ มืง บาแบ, อัน บอ แดม แปะ บอ ตึย ลักซอง ดี อาเฮจัะกี ตึอน โกบ แฮะ ยึร อัน ลอง เซา อาเฮจัะกี แฮะ วี แกน. 13 อาเฮจัะกี บอ รวห ดาลาม คูนดีคัม บาแบ บอ บยัะ โตต แคะ กอย โกรวกราม อัน ดอน โมยว. บอ มูห โกรว อี ง็อห ตาง, รึอน เฆ ครีว, บอ อึณกรึห อูห หงูน, นามัน อูห หงูน, ครึง กาโฆห อี บอด อี หมึอม ดอน โมยว, แคะ ปี อูน อัน, อัน บยัะ โตต ดี เฆ. บอ อี กอย แคง โฮว แคง มืง อัน ดอน โปละ, อัน กาลาง โตต ดี เฆ. อู โมยว มืร, อัน ตู เครียง.
14 วาย ตี อาอีซายัะ อี มูห ดูอี บยาน โฆรห เฌาพรา บอ วี ตัห โดง กอย คูนดีคัม อาเฮจัะกี บอ วี ดีหมอด อัน ต็อห, “ดูอี เฆ ตึอน ต็อห มาเซ ดี แม? เฆ ตัห มืง เหมา, ตัห ฌัม โดง กอย แม?” อาเฮจัะกี วี ต็อห, “เฆ ตัห โต็ง กาเซา, เฆ ตัห ดี มืง บาแบ.”
15 อาอีซายัะ ปี วี ดีหมอด ต็อห, “แคง โฮว แม นี, เฆ แฮะ ยึร มาเซ?” อาเฮจัะกี วี ต็อห, “แคะ กอย แคง โฮว โอว นี, เฆ แฮะ ฮอต ยึร โตต, บอ โกรว อี กอย แคง ฌีดืก ปี อูน โอว ตึอน, โอว แฮะ ฮอต บยัะ โตต ดี เฆ.”
16 แฮะ ฮอต, อาอีซายัะ วี ต็อห ดี อาเฮจัะกี, “แตห แม โทม โฆรห เฌาพรา. อัน แฮะ ต็อห, 17 ‘อึณ ดี ฌัม อาคราว อัน, แคะ มึห อี กอย แคง โฮว แม นี บอ แปะ แฮะ ดึห ตัห กาฌูะ อูน ดา ดา แม, โกรว อี กอย กอ ฌัม อาตึร นี ดอน โมยว, อึณ ดี ฌัม โตต มืง บาแบ. อู โมยว มืร อาว ฮู ฆีด.’ เฌาพรา ต็อห ปาย ตี. 18 เฆ ดี บอ ดึห ฆอน อาราง แม บอ หลาน อาราง แม มัง อี, แตห เฆ ฮาว แบน ดูอี ซัห กอย แคง โฮว คูนดีคัม บาแบ ตึอน.”
19 อาเฮจัะกี วี ต็อห ดี อาอีซายัะ, “แฮะ บอด, โฆรห เฌาพรา ปี กาลาง แม ตี.” อัน ปี วี ต็อห แคง น็อห อัน, “แฮะ มูห แฮะ บอด, อึณ ดี ดาคึย ฆัด เยน ดอ มูห โจว โอว นี.”