1 ปัน ตี คูนดีคัม อาเฮจัะกี บอ ยึร โฆรห ตี, อัน บอ กายาต ครึง ตา อัน บอ วี ชึบ ครึง จาน, วี ฮาว แคง โฮว เฌาพรา. 2 อัน บอ แดะ อาเอยาคีม อี มูห ดูอี อี อึบ โตต ดอน โมยว แคง โฮว คูนดีคัม บอ ดา จาเร อี จืร อาเซบานา บอ ดา ตาง อี หลู ดี เฌาพรา, แตห เฆ ชึบ โตต ครึง จาน, วี ฮาว โดง กอย ดูอี อี บยาน โฆรห เฌาพรา อี จืร อาอีซายัะ อี มูห ฆอน อาโมด. 3 เฆ บอ ต็อห ดี อัน, “คูนดีคัม อาเฮจัะกี ต็อห, ‘อาตึร นี แฮะ มูห ซีแง ดูก ตาง, ซีแง โลว โทม ปี มาโนว อี เฮา, โอว คัม ปี กาลาง นา ตู หมึอม. อึณ กอ ปี ฆอน งัะ แฮะ โลว ฆึอด, อาว มึห โปลม ดี แตห อัน ฆึอด. 4 เฌาพรา อี มูห เฌาพรา ปี กรึบ แม, อัน ดี บอ ยึร โฆรห ปี กาลาง ดา อี อึบ โตต ดอน โมยว แคง โฮว คูนดีคัม อาซูรา, ปี จัร คูนดีคัม แตห อัน ตัห กาลาง นา จาว ดอน โมยว ดี เฌาพรา อี มูห เฌาพรา อาคาคัร. เฌาพรา ดี บอ โหลห หมาบ แปะ แฮะ โบง อัน ดอ ต็อห อัน โฆรห ตี ดี เฌาพรา. โคว, โอว หมาณ, แตห แม ซาคึร บอ ดาง เฆ อี ซี กอย แคง มืง ยูดา เอ นี.’”

5 แฮะ ฮอต, เฆ แดเจณ อาเฮจัะกี บอ ตัห ฌัม โดง กอย อาอีซียัะ. 6 อาอีซียัะ บอ ต็อห ดี เฆ, “แตห เบ วี เวณ, กาลาง ดี ดา กาณา เบ ต็อห, ‘เฌาพรา ต็อห, แม แกวะ โยว โฆรห ปี ยึร แม ตี, แปะ แฮะ กาลาง แดเจณ คูนดีคัม อาซูรา นา จาว ลอง โอว ตี. 7 โอว ดี ฮับ แคง น็อห อัน แตห อัน มึห น็อห ซี เวณ. เซ อัน ฮี ยึร ซาดาง อู โมยว, โอว ดี แตห อัน เวณ โดง กอย บรีม อัน. อัน ดี บอ ยัม ดี มาปัวะ ลาง เฆ อี กอย รึม โดบ อัน ตี.’”

8 ปัน ตี ดา อี อึบ โตต ดอน โมยว แคง โฮว คูนดีคัม อาซูรา, อัน ยึร ซาดาง ลอง คูนดีคัม แฮะ ฮอต ฮาว ตัะ มืง ลาคีด. ดอ อัน ตี อัน บอ เวณ, บอ กาตูณ คูนดีคัม ดอ กาโฆห อัน ดี มืง ลีปานา.

9 วาย ตี, คูนดีคัม อาซาคารีบ บอ วี ยึร อี เฮา กาลาง ลอง คูนดีคัม อาตีรีกา อี มูห ดูอี กูซา, อัน แฮะ วี อึบ มืง แอฆึบ. เฆ บอ ต็อห, “บัร เบ ยอด, อัน ดี ตัห กาโฆห ดี แม.” แฮะ ฮอต, คูนดีคัม บอ วี จัร ดาลาม อัน, แตห เฆ ฮาว ตึย แปะ ดี อาเฮจัะกี ต็อห, 10 “แกวะ แตห เฌาพรา ปี กรึบ แม กาโลว ดี แม ต็อห, ‘คูนดีคัม อาซูรา ตู ปึอน ดี อึบ มืง เยรูซาแลม.’ 11 แม แฮะ ยึร แปะ แฮะ โบง คูนดีคัม อาซูรา. อัน แฮะ ปยาต แวน มืง ดอน มืง. บอ แม ตู นับ ดี ลอด. 12 แม แฮะ ดึอม ยึร เฌา แบน กาดัง แบน กาดัง ปี กรึบ ดูอี เฮา อาว ปึอน จอย เฆ. อึณ มูห ดา ดา โอว, เฆ แฮะ ปยาต แวน เฆ บอกาเฆลียด. อี มูห เฌา ปี กรึบ ดูอี กอจัน, ดูอี ฮาราน, ดูอี เรจัะ เฆ ดูอี อาเอเดน อี กอย ดี มืง เตลัะฌา, เฆ เฌา บอกาเฆลียด ตู ปึอน จอย มาเซ. 13 แตห แม เหรต บอ คูนดีคัม อี อึบ มืง ฮามาด, คูนดีคัม อี อึบ มืง อาราพาด, คูนดีคัม อี อึบ มืง เซพาอีม, คูนดีคัม อี อึบ มืง เฮนา, คูนดีคัม อี อึบ มืง อีวา, แม อาว ฮู ปึอน ดี ยึร เฆ. เฆ ฮู กอย ดี เหมา.”

14 อาเฮจัะกี บอ ดึห แปะ ดี ดาลาม ตึอน. แฮะ ฮอต, อัน บอ วี ฮาว ดี โฮว เฌาพรา. อัน บอ บลัห แตห เฌาพรา ยอด. 15 แฮะ ฮอต, อัน บอ ซาคึร ดี เฌาพรา ต็อห, “อึย แม เฌาพรา, แม มูห เฌาพรา ปี กรึบ ดูอี อีซาเรลัะ. แม เฌา กอย โดง กอย เฆ อามู อามาด เฌาพรา อี จืร เครูบ. แม เฌา, แม มูห เฌาพรา อู กาดัง อี อึบ ดอน มืง แดง กาดาย นี. แม เฌา แฮะ โบง บอ ฆางหราว บอ กาดาย. 16 โอว หมาณ แม เฌาพรา, แตห แม โทม. หมาณ, แตห แม ยอด โลง, แตห แม ยึร โฆรห ปี ต็อห อาซาคารีบ. อัน แฮะ ตัห กาลาง นา จาว ลอง แม เฌาพรา อาคาคัร. 17 อึย แม เฌาพรา, คูนดีคัม อาซูรา เฆ แฮะ ปยาต ดูอี ดอน มืง ดอน โปละ, บอ อึม เฆ กาดาย, เฆ แฮะ แตห อึณ ลึร. 18 เฆ แฮะ ดึห บอ อารึบ ปี กรึบ เฆ, โดะ แคง เงา. มาแล, อารึบ ตี อาว มูห เฌาพรา คาคัร. อึณ มูห มี มาว เฆ เฮ ปี รัณ ดูอี, แปะ แฮะ ปยาต แวน คูนดีคัม ตี. 19 แม เฌาพรา, แม มูห เฌาพรา ปี กรึบ โอว. ดอ ตี นี, โอว หมาณ, แตห ดูอี ดอน มืง ดอน โปละ กอ นับ, อึณ มูห แม เฌาพรา อู กาดัง อี มูห เฌาพรา อาคาคัร. โอว ซาคึร หมาณ, แตห แม เฌา คยอด โอว, แตห โอว ลอด ตัะ คูนดีคัม ตี.”

20 แฮะ ฮอต ซาคึร, อาอีซายัะ อี มูห ฆอน อาโมด ตึอน, อัน บอ วี ตัห โดง กอย คูนดีคัม อาเฮจัะกี บอ ต็อห ดี อัน, “เฌาพรา อี มูห เฌาพรา ปี กรึบ ดูอี อีซาเรลัะ ต็อห, ‘โอว แฮะ ฮอต ยึร โฆรห ปี ซาคึร แม, ลอง อาซาคารีบ อี มูห คูนดีคัม อี อึบ ดูอี อาซูรา ตึอน.’

21 เฌาพรา มืร แฮะ กาลาง ลอง คูนดีคัม อาซูรียา ตี ต็อห, ‘เฆ ดูอี แคง มืง ฌีโอน, เฆ ปี ฆอน ดีบยา อี แฮะ ลูกตาย บอ กาณัห แม. เฆ ดูอี แคง มืง เยรูซาแลม, เฆ ปี ฆอน อีบึณ อี มาวัด ฆีณ ดี แม ดอ เตา แม. 22 อาเซ อึณ มูห แปะ แฮะ กาแคณ แม? อาเซ อึณ มูห แปะ แฮะ ดัด แดะ แม, แปะ แฮะ ปีคึก แม ดี อัน? อึณ บอ มูห ดี เฌาพรา บอด ปี กรึบ ดูอี อีซาเรลัะ แปะ แฮะ โบง แม ฌึร ตี.’

23 แม แฮะ แตห ดาลาม แม กาลาง นา จาว ดี เฌาพรา. แม แฮะ ต็อห, ‘โอว แฮะ ดึห กืน ลักเลา โอว, โฮะ แดง นอน เลบานูน ดอน โปละ. โอว แฮะ ฆัร แวน บอ เฮ อารีด อี โต็ง อี ตาง บอ เฮ อึณเก อี ชีด, แตห เฆ เกห โตต. โอว แฮะ ฮาว ฌัม โดง ลึก กาเซา บอ อึบ แปร อี หมึอม หลึอม โตต.

24 โอว แฮะ ฆึห ดี เดียง อึม คึม แคง มืง อี เฮา ปี ตู ดึอม ฌัม อี. โอว แฮะ ตา เปลา โอว, ฆวา แบลง อึม แคง มืง แอฆึบ, แตห เฆ กอ ฮีด โตต.’

25 โอว ยี ต็อห, ‘แม ตู ดึอม ยึร ปี ต็อห โอว?’ ซีณ อาต นี โอว แฮะ ฮอต ซูงพยาด. ดอ มึอน โอว แฮะ คราม ดี โบง. ดอ ตี นี, โอว ยี แตห อึณ แบน ปี ดึอม ต็อห โอว. โอว แฮะ แตห แม ปึอน ปยาต มืง อี มึห แรง, แตห เฆ วี ลึร, แบน อึณปึม มาว.

26 โกบ อึณ ปาย ตี เฆ ดูอี อี กอย แคง มืง ตี, อาว ฮู มึห แฮณ. อึณ ดี แบน กาฟัร กาเฟียน น็อห ลึร ดี เฆ, แตห เฆ บอ ชึม ซาเร. เฆ บอ ปี เปต อี กอย แคง แปร, บอ ปี โหงว อี ซี อึณจัม, บอ ปี เปต อี ลัต ดี กาตูะ กาง. อึณ หณัม ดัน ตาง, แฮะ ฮอต วี ยัม.

27 โอว ปี บอ แฮะ แตห แม โบง ปาย ตี โอว ยี นับ โตต ดอน โมยว ปี ดี ปาย แม. แม บอ ตูต บอ ยีต, แม บอ ลึบ บอ เลห, แม บอ รู บอ จาว, โอว แฮะ ฮอต นับ โตต.

28 โกบ แฮะ รู แม ดี โอว, โกบ แฮะ ฮอต นับ โตต โอว ลอง ปีคึก แม น็อห แม. โอว ดี บอ โบง ดี แม แตห อึณ ปี โอว บลูห ฆูง มูห แม, ฮับ วัน, บอ ดึห ลัะ, ฮับ แคง โมต แม. โอว ดี บอ ตึณ แม วี วีว โดบ อึณเตณ บรีม แม.

29 อึย แม คูนดีคัม อาเฮจัะกี, โอว ดี โบง ลักซานา, แตห แม นับ, โฆรห โอว แฮะ หมาน. นัม นี, แม ดี ปึอน ดี โฮม เบล อี เลห ตัห ราง อัน. ซีนัม ดี ตัห มืร, แม ดี ปึอน ดี โฮม ปาย ตี. ตัะ ซีนัม ดี ตัห, แม โลว โซะ ปี ซัม ปี รัณ แม. มาน มางูน ปี ซัม แม, แม ดี ปึอน ดี โฮม.

30 เฆ ดูอี อายูดา อี แฮะ ลอด อี ซี ฆีด ตึอน, เฆ ดี วี ปี เฮ อี ซัม, แตห อึณ มึห เรียห อัน อี ครึม บอ เบล อัน นา แดง.

31 อึณ ดี มึห เฆ อี ซี ฆีด, อี ซี กอย แคง มืง เยรูซาแลม. อึณ บอ มึห เฆ อี แฮะ ลอด แฮะ ตัห ดี นอน ฌีโอน. เฌาพรา อี อึบ โตต ดอน โมยว, อี มึห น็อห โฆยวฆยา ดี จอย เบ, อัน แฮะ โบง ปาย ตี.’

32 โคว, เฌาพรา แฮะ ต็อห ลอง คูนดีคัม อาซูรา, อัน ตู ปึอน ดี ลึบ ฮาว แคง มืง นี, ตู ปึอน บัณ บลา ลึบ แคง มืง, ตู ปึอน บยัะ ครึง กาโฆห อัน นา อาต มืง นี, ตู ปึอน ฆึห กาดาย โบง บล็อะ อึณแตง นา เรต มืง นี.

33 อัน ตัห อึณเตณ เหมา, อัน ดี โลว วี เวณ อึณเตณ ตี. อัน ตู ปึอน ลึบ แคง มืง นี. เฌาพรา แฮะ กาลาง ปาย ตี.

34 เฌาพรา บอ ต็อห, ‘โอว ดี แร ดี คยอด มืง นี โกบ ซี แตห โอว อี เฮา โรวเซ โอว บอ โกบ โหลห โอว แดเจณ โอว อี จืร อาดาวีด.’”

35 บอ ฌัม แคง หมึร ตี, อามู อามาด เฌาพรา บอ ง็อห ยัม ดูอี แคง ดับ ดูอี อาซูรา อาดา อู แซน ดี ดา หมึณ ดี พัน แหรณ วี. บอ ฌัม ซีณวัห ว็อง, ดูอี เฆ ตึอน แฮะ ฮอต ยัม โตต. 36 โคว อัน ตี, อาซาคารีบ อี มูห คูนดีคัม ดูอี อาซูรา ตึอน, อัน บอ วี เวณ กอย ดี มืง นีนีเว.

37 วาย อัน ตี อู ซีแง อัน บอ วี ฮาว แคง โฮว เฌา นีซารอก, ต็อห ดี กรึบ อัน เฌา ตี อี มูห เฌา ปี ดึอม กรึบ อัน. อึณ ยี มูห ฆอน อีมาย อัน อี จืร อาตารัมมาเลก ฆาย อาซาเรฌา, ฆาย บอ ดึห มาปัวะ ลาง, ง็อห ยัม อัน, บอ วี เตา ฮาว แคง กาดาย มืง อาราราด. ปัน ตี ฆอน อัน อี จืร อาซาฮาโดน บอ วี แบน คูนดีคัม วี อึบ มืง อาซูรียา.