1 อาเฮจัะกียา อี มูห ฆอน คูนดีคัม อาคาด แฮะ อึบ มืง ยูดา ดอ คูนดีคัม อาโฮวเซ แฮะ แบน คูนดีคัม อี อึบ มืง อีซาเรลัะ. 2 ดอ แบน อัน คูนดีคัม อาซาก อัน แฮะ โนะ อา ฆึร ดี พัน ซีนัม. อัน บอ อึบ บึง มืง, กอย แคง มืง เยรูซาแลม อาดา อา ฆึร ดี ดีม ซีนัม. มา อัน จืร นาง เอพี อี มูห ฆอน อาซาคารา. 3 อัน บอ โบง นา บอด นา หมึอม ปี อึง เฌาพรา. อัน โดบ ปี ปาย ดา อัน อี มูห อาดาวีด ตึอน. 4 อัน บอ ปยาต แวน โดง จา อี มูห โดง กรึบ เฆ. อัน บอ ดอย แวน อารึบ ราง ปี กรึบ ดูอี, ฆัร แวน บอ กันทอน ปี กรึบ เฆ นาง กานัม เอซูรา. อัน บอ กาแดบ บอ มาฮัณ บ็อง ปี โบง อาโมวแซ ตึอน โคว, เฆ ดูอี แฮะ โดะ อึณกรึห อูห หงูน ดี อาต มาฮัณ บ็อง ตี. เฆ แฮะ แตห มาฮัณ ตี จืร นาฮูกดาน.

5 อัน โบง โดบ ซีคยา ปี อึง เฌาพรา, อี มูห เฌาพรา ปี กรึบ ดูอี อีซาเรลัะ. แคะ กอย เฆ คูนดีคัม ยูดา บอ อาต อัน ตี บอ วาย อัน ตี อาว มึห อี ปี อัน คอ อู วี. 6 อัน โรวเซ ซีคยา เฌาพรา. อัน โหลห เฌาพรา เซเซ. อัน บอ โดบ ซีคยา ดารา เฌาพรา ปี ดึอม กาลาง อัน ดี อาโมวแซ ตึอน. 7 เฌาพรา มืร บอ จอย อัน. อัน บอ ฮาว นา เหมา, อัน บอ โบง มาเซ มืร, อึณ บอ ออง. อัน อาว ฮู โลว คัม ปี อึบ คูนดีคัม อาซูรา. รึอน จึง มืร อัน อาว โลว ฮับ. 8 อัน บอ วี ฮาว กาโฆห ดี ดูอี พีลีที, วี แป บอ เฆ อี กอย แคง มืง แบน มืง บอ เฆ อี กอย ดี กาโช็ง โดง บัร เฆ มาน มืง แตห อึณ กอ ฌัม มืง ฆาซา.

9 คูนดีคัม อาเฮจัะกี แฮะ แบน คูนดีคัม อาดา พวน ซีนัม, บอ คูนดีคัม อาโฮวเซ อี มูห ฆอน คูนดีคัม อาเอลาฮา อี อึบ ดูอี อีซาเรลัะ แฮะ แบน คูนดีคัม อาดา บู ซีนัม. ดอ อัน ตี คูนดีคัม อาซามาเนจัะ อี อึบ ดูอี อาซูรา, อัน บอ ตัห โรบ มืง ซามารี ตึอน. 10 อึณ บอ โนะ โอย ซีนัม, เฆ บอ ปึอน มืง ซามารี ตี. ดอ อัน ตี อาเฮจัะกียา แฮะ แบน คูนดีคัม อาดา เดา ซีนัม. อาโฮวเซ อี มูห คูนดีคัม อี อึบ มืง อีซาเรลัะ, อัน แฮะ อึบ มืง อาดา ดีม ซีนัม. 11 คูนดีคัม อาซูรา บอ ดึห แคะ กอย ดูอี อีซาเรลัะ ฮาว ดี มืง อาซูรียา. อัน บอ แตห เฆ กอย ดี มืง ฮาลา, ดี มืง ฮาปอ บอ โคบ แบลง อึม กอจัน บอ ดี เรา เฆ ดี มืง โดง กอย เฆ ดูอี อาโมยว เมดี ตึอน. 12 เฌาพรา แฮะ แตห เฆ คัม ปาย ตี โกบ ตู โทม เฆ ปี กาลาง เฌาพรา อี มูห เฌาพรา ปี กรึบ เฆ. เฆ แฮะ แวน ปี กาแซณ เฌาพรา, ตู โดบ ปี ดึอม จัร อาโมวแซ เฆ โบง.

13 คูนดีคัม อาเฮจัะกียา แฮะ อึบ มืง ยูดา อาดา ฆึร ดี พวน ซีนัม, คูนดีคัม อาซาคารีบ อี อึบ มืง อาซูรา, อัน บอ ตัห กาโฆห ดี มืง อี มึห แรง ดอน มืง, อี กอย แคง กาดาย มืง ยูดา ตึอน. อัน บอ ปึอน มืง ตี ดอน มืง. 14 คูนดีคัม อาเฮจัะกียา อี อึบ มืง ยูดา ตึอน, อัน บอ จัร เฆ ฮาว กาลาง ดี คูนดีคัม อาซูรียา อี กอย ดี มืง ลาคีด ต็อห, “โอว แฮะ ฮอต ลูต, โอว ดี วี หมาณ แตห แม วี วีว. แม บอ หมาณ แคะ เหมา, โอว มืร ดี ฮับ.” คูนดีคัม อาซูรา บอ หมาณ ดี อัน รึอน โอย มาย็อห ทาเลน. บอ ครีว ฆึร ทาเลน.^a 15 อาเฮจัะกียา บอ ดึห รึอน อี กอย แคง โฮว เฌาพรา บอ รึอน อี กอย แคง โฮว อัน, ดัว โตต.

16 ดอ อัน ตี อาเฮจัะกียา บอ ดึห ครีว อี กอย ดี มาโลห โฮว เฌาพรา บอ ปี ปีด เฆ ดี ร็อง บาง มาโลห โฮว เฌาพรา. อัน บอ ดัว โตต ดี คูนดีคัม อาซูรา.

17 วาย อัน ตี คูนดีคัม อาซูรา บอ วี แดะ ดา โบว ตาง อัน บอ อามาด ตาง อัน บอ ดา อี อึบ โตต แคง โฮว คูนดีคัม. อัน บอ จัร เฆ โอย วี ดึห บอ ดา ซึก เฆ กืน อี กอย ดี มืง ลาคีด ตึอน, แตห เฆ ฮาว โดง กอย คูนดีคัม อาเฮจัะกี ดี มืง เยรูซาแลม. เฆ บอ ตัห ฌัม นา เรต มืง เยรูซาแลม, ตัห ฌัม โคบ อึม ดึง โบ็ง นา กัว อี กอย โคบ กาบึก อี แตห อึม แหล โดง ลัห อี ดี ครึง. 18 ดอ ตัห ฌัม เฆ ดี ตี, เฆ จัร อี ฮาว กาลาง ดี คูนดีคัม. อึณ บอ มูห อาเอยาคีม อี มูห ฆอน อาฮีลาคี, อี อึบ โตต ดอน โมยว แคง โฮว บอ ดา จาเร อี จืร อาเซบานา บอ ดา อี จอย ดา จาเร อี จืร อาโยวอา, อี มูห ฆอน อาซาบ, เฆ โอย วี ตี บอ วี ฮาว โดง กอย เฆ ตึอน.

19 ดา อี อึบ โตต แคง โฮว คูนดีคัม อาซูรา ตึอน, อัน วี ต็อห ดี เฆ, “แตห เบ วี เวณ กาลาง ดี อาเฮจัะกี ต็อห, ‘คูนดีคัม ตาง, อี อึบ มืง อาซูรียา ต็อห, มาเซ อึณ มูห, อี แตห น็อห แม ยัะ แคะ ตี? 20 แม ต็อห, แม แฮะ มึห อางยาน, แฮะ มึห ปวน, แฮะ กยัะ ดี กาโฆห ดี ดา ซึก. โฆรห แม ตี ยี ตู มึห ดีโคว. ดอ ตี นี, แม บึง อาเซ, แตห แม ยัะ กาแคณ ดี โอว? 21 ปี บึง แม คูนดีคัม แอฆึบ, อึณ ปี แม บึง โฆ็ลง อู ณ็อง อี แฮะ ฮอต กาบัก. โฆ็ลง แม ตี, อัน ดี วี ดูห กาหลูห แด ดูอี อี บึง อัน. ดา ตาง อี อึบ แคง มืง แอฆึบ, อี มูห คูนดีคัม พาโรว ตึอน, อัน แฮะ โบง ปาย ตี ดี เฆ ดอน อี อี ดึอม บึง อัน. 22 เซ แม บอ ต็อห, “เย ดี บึง เฌาพรา อี มูห เฌาพรา ปี กรึบ เย,” อัน เฌา ตี แฮะ มูห อาเซ? แม อาเฮจัะกี แฮะ ฮอต ปยาต แวน โดง จา อี มูห โดง หลู อี ดี อัน. แม ปี วี ต็อห ดี เฆ ดูอี มืง ยูดา บอ ดี ดูอี มืง เยรูซาแลม, “เบ ปึอน ดี กรึบ, ปึอน ดี หลู มี แคง มืง เยรูซาแลม.”

23 โคว, ดอ ตี นี, แตห แม ตัห กาแซณ ดี ดา กาณา โอว อี มูห คูนดีคัม อาซูรา. อัน แฮะ ต็อห ดี วี ดัว มังปร็อง อา แหรณ โดว ดี แม, เซ แม มึห ดา ซึก อี นับ ดี ป็อะ มังปร็อง ตี. 24 ดา โบว โอว อี อึบ ดูอี เปรต มืร, แม ตู แป. เหมา อึณปาย ปี ซี บึง แม ดา ซึก เฆ ลักเลา อี ตัห แคง มืง แอฆึบ? 25 แดง ตี, เซ แม ทาง เฌาพรา ตู จอย โอว, อาว มูห อาว หมาน. เฌาพรา แฮะ จัร โอว, ฮาว กาโฆห ดี มืง ตี, ปยาต แวน, แตห อึณ ลึร โตต.’”

26 อัน แฮะ ฮอต กาลาง โฆรห ตี, อาเอยาคีม อี มูห ฆอน อาฮีลาคี บอ อาเซบานา บอ อาโยวอา, เฆ บอ กาลาง ดี ดา อี ตึอน ต็อห, “เย หมาณ แตห แม กาลาง โฆรห อารามี ดี เย. เย แฮะ นับ โฆรห ตี. แกวะ กาลาง โฆรห แฮแบร ดี เฆ อี กอย แดง แรง มืง ตี, แกวะ แตห เฆ ปึอน ดี โทม.”

27 ดูอี ตึอน วี ต็อห ดี เฆ, “ดา กาณา โอว ตู จัร โอว กาลาง โฆรห ปาย ตี มี ดี เบ บอ ดี ดา กาณา เบ. อัน จัร โอว กาลาง บอ ดี เฆ อี กอย แดง แรง มืง. บอ เฆ โลว วี โฮม เอียง เฆ, วี เดียง อึม ชี เฆ โดบ เบ ปาย ตี.”

28 แฮะ ฮอต ดูอี ตึอน บอ วี ดัด ตาง, กาลาง โฆรห แฮแบร ต็อห, “อึย เบ ดอน อี, แตห เบ โทม โฆรห ปี กาลาง คูนดีคัม อาซูรา. 29 คูนดีคัม อาซูรียา ต็อห, ‘แกวะ แตห เบ โทม โฆรห ปี กาโลว อาเฮจัะกี ดี เบ. อัน ตู ปึอน จอย เบ แตห เบ ลอด ตัะ ดา กาณา โอว.’ 30 แกวะ แตห อาเฮจัะกี แยต เบ บึง เฌาพรา. เซ อัน ต็อห, ‘เฌาพรา อี ปึอน จอย เอ อาคัร หมาน.’ อัน ตู แตห คูนดีคัม อาซูรา ปึอน ดี อึบ มืง เอ นี. แกวะ แตห เบ หณึม โฆรห ตี. 31 อาว โลว โทม โฆรห อัน. คูนดีคัม อาซูรา ต็อห, ‘แตห เบ วี ตัห ลาย ดาคึย ดี โอว. วี ตัห โดง กอย โอว ดอน อี. โอว ดี แตห ดอน อี วี ปึอน ดี โฮม เบล มางูน อัน, โฮม เบล ดีปู อัน. ดอน อี ดี วี ปึอน ดี เดียง อึม ดี อึม คึม บรีม อัน.’ 32 แตห กอ ฌัม ปัน ดี วี แตห โอว เบ ฮาว ดี มืง ปอ มืง อี ปี มืง บรีม เบ. มืง อี มึห ดอน โมยว, อี มึห โหงว ดีฆาว, มึห บอ นามัน บอ งาม มาเพียน. แตห เบ ร็อห โอว, แกวะ แตห เบ ยัม, แตห เบ อีม. เบ แกวะ โทม โฆรห อาเฮจัะกี. อัน กาโลว เบ, เซ อัน ต็อห, ‘เฌาพรา ดี จอย แตห เอ ลอด.’ 33 เบ แฮะ ดึอม ยึร เฌาพรา กาดัง เหมา อี แฮะ จอย มืง เฆ ดูอี อี กรึบ อัน? คูนดีคัม อาซูรา ยี แฮะ ปึอน ดี อึบ เฆ บอกาเฆลียด. 34 เฌา ปี กรึบ เฆ ดูอี แคง มืง ฮามาด บอ ดี มืง อาราพาด เฆ กอย ดี เหมา? บอ เฌาพรา ปี กรึบ เฆ ดูอี แคง มืง อาบาด, เฆ ดูอี แคง มืง เซพาอีม, มืง เฮนา, มืง อีวา ตึอน, เฌาพรา เฆ ตี กอย ดี เหมา? เฆ ตู ปึอน แคร โอว, แกวะ แตห โอว อึบ มืง ซามารี. 35 อึณ บอ มึห เฌาพรา ดอน มืง ดอน กาดัง, อาว ดึอม มึห อี ปึอน แคร โอว, แกวะ แตห โอว อึบ มืง บรีม เฆ. เซ เบ ยี ทาง, เฌาพรา ดี จอย มืง เยรูซาแลม, แกวะ แตห โอว ปึอน ดี อึบ, อึณ ตู หมาน.’”

36 อัน แฮะ ฮอต ต็อห ปาย ตี ดูอี เฆ ตึอน ตู ต็อห มาเซ. โคว, คูนดีคัม แฮะ ต็อห, “แกวะ โฆรห.”

37 ปัน ตี อาเอยาคีม อี มูห ฆอน อาฮีลาคี, อี อึบ โตต ดอน โมยว แคง โฮว คูนดีคัม บอ ดา จาเร ตาง อี จืร อาเซบานา บอ ดา ตาง อี จืร อาโยวอา อี มูห ฆอน อาซาบ ตึอน, เฆ บอ กายาต ครึง ตา เฆ, วี เวณ โดง กอย อาเฮจัะกี, วี ตัห แค บอ โฆรห ปี ต็อห ดา อี อึบ โตต แคง โฮว คูนดีคัม อาซูรียา ตึอน.