คาน 17
ลอง คูนดีคัม อาโฮวเซ อึบ มืง อีซาเรลัะ
1 คูนดีคัม อาคาด อึบ มืง ยูดา อาดา ฆึร ดี อา ซีนัม. ดอ อัน ตี อาโฮวเซ อี มูห ฆอน อาเอลาฮา บอ วี แบน คูนดีคัม อี อึบ มืง อีซาเรลัะ. อัน กอย แคง มืง ซามารี อาดา ดีม ซีนัม. 2 อาโฮวเซ ตึอน ยี โบง หมาบ, โบง มืก ปี ตู อึง เฌาพรา. ยี หณัม ครับ หมาบ ปี โบง เฆ คูนดีคัม อีซาเรลัะ อี แฮะ แบน คูนดีคัม นา อาต อัน ตี.
3-4 ดอ อัน ตี อาโฮวเซ แฮะ แบน หมาย คูนดีคัม อาซามัะเนจัะ อี อึบ มืง อาซูรา, แฮะ ฮับ รึอน จึง ดี อัน. ปัน ตี อาโฮวเซ แยะ แฮะ ตึย ฮาว ดาลาม อัน ดี คูนดีคัม อาโซว อี อึบ มืง แอฆึบ. อัน มืร อาว ฮู ดัว รึอน จึง ปี ดึอม ดัว อัน ดอน ซีนัม ดี คูนดีคัม แคง มืง อาซูรียา. คูนดีคัม แคง มืง อาซูรียา บอ ยึร ลอง อัน ตี ดอน โมยว, อัน บอ นับ, อาโฮวเซ แฮะ คราม ดี บลัวะ แวน อัน. โคว, อัน วี ฮาว กาโฆห ดี อาโฮวเซ. 5 คูนดีคัม อาซูรา บอ ดา ซึก อัน, เฆ ลึบ แคง กาดาย มืง อีซาเรลัะ บอ ฮาว ฌัม ดี มืง ซามารี บอ กอย โรบ มืง กอ โนะ โอย ซีนัม. 6 อาโฮวเซ แฮะ อึบ มืง อัน อาดา ดีม ซีนัม. ดอ อัน ตี คูนดีคัม อี อึบ มืง อาซูรา บอ ตัห ลึบ แคง มืง ซามารี บอ ดึห ฮาว เฆ ดูอี อีซาเรลัะ ดี มืง อาซูรียา บอ แตห เฆ วี กอย ดี มืง ฮาลา บอ ดี มืง ฮาปอ บอ โคบ แบลง อึม กอจัน อี มูห กาดาย ดูอี เมดี.
7 ดูอี อีซาเรลัะ โลว คัม ปาย ตี โกบ ตู โดบ ซีคยา เฆ เฌาพรา อี มูห เฌาพรา ปี กรึบ เฆ, อี ดึห ตัห เฆ แคง มืง แอฆึบ, แกวะ แตห คูนดีคัม พาโรว ตึอน อึบ เฆ. เฆ แฮะ วี กรึบ เฌา แบน กาดัง แบน กาดัง. 8 เฆ วี โดบ ทูงฆยาม ดูอี อาโมยว เฮา แปะ แฮะ ณอน แวน เฌาพรา อาต ลึบ เฆ ดูอี อีซาเรลัะ แคง มืง เฆ. เฆ วี โดบ บอ ทูงฆยาม แปะ แฮะ จัร คูนดีคัม อีซาเรลัะ เฆ โบง. 9 เฆ ดูอี อีซาเรลัะ วี ปรา ดี โบง อี ตู ล็อะ น็อห เฌาพรา, อี มูห เฌาพรา ปี กรึบ เฆ. เฆ วี โบง โดง จา, แตห เฆ ปึอน ดี กรึบ ดอน นา ดอน โปละ. บอ แคง มืง เฆ บอ ดี กาโช็ง บัร เฆ มาน มืง, เฆ โบง ปาย ตี. 10 เฆ วี ซัม กันทอน เฆ อารึบ นาง กานัม เอซูรา แดง นอน จา ดอน โปละ บอ ดี ดัง เฮ ตาง ดอน กาดัง. 11 เฆ วี หลู ซีนัม อูห หงูน, โดะ ดี กาโช็ง จา โดง หลู เฆ ตี, แตห อึณ ปี ปี โบง เฆ ดูอี อาโมยว เฮา อี มูห ดูอี ปี ณอน แวน เฌาพรา อาต ลึบ เฆ ดูอี อีซาเรลัะ แคง มืง เฆ. นา ตู หมึอม ดอน โมยว ปี โบง เฆ ฌึร ตี, อึณ แตห เฌาพรา วี รู ดี เฆ. 12 แปะ แฮะ ดึอม ต็อห เฌาพรา “แกวะ โบง,” เฆ ยี วี โบง, วี กรึบ อารึบ ดอน โมยว. 13 มาแล, เฌาพรา บอ วี แดะ ดูอี อี บยาน โฆรห เฌาพรา บอ เฆ ดูอี อี นับ ดี ยึร ปี บยัะ เฌาพรา, แตห เฆ วี กาลาง ดี เฆ ดูอี อีซาเรลัะ บอ ดี เฆ ดูอี อายูดา, แตห เฆ กาลาง ดี ดูอี ต็อห, “เบ โลว แวน นา ตู หมึอม ปี โบง เบ, วี โดบ ดารา ปี ดัม อูน โอว ดี ดา ดา เบ ตึอน. เบ โลว โบง โตต ดอน โมยว ปี จัร โอว เบ โบง ดอ ตึย โอว แดเจณ โอว เฆ ดูอี บยาน โฆรห โอว, แตห เฆ ตัห โดง กอย เบ.”
14 เฆ ดูอี อีซาเรลัะ ยี ตู โทม. เฆ แตห น็อห เฆ ดืร กาเซา, แตห อึณ ปี ดา ดา เฆ ดอ มึอน, อี ตู โทม โฆรห เฌาพรา. 15 เฆ วี แวน โตต ดารา เฌาพรา บอ ปี ดึอม กาแซณ ดา ดา เฆ ดี เฌาพรา ดอ มึอน. เฆ บอ แวน โฆรห ปี กาลาง เฌาพรา ดี เฆ แบน เฌณ แบน เฌณ, แตห เฆ ซาดีก. เฆ วี กรึบ อารึบ อี ตู มึห ดีโคว, แตห บอ อาซาก เฆ อาว ฮู มึห ดีโคว. เฆ วี โบง โดบ เฆ ดูอี อี กอย โดบ เฆ, อี มูห ดูอี ปี ต็อห เฌาพรา, “แกวะ โดบ ปี โบง เฆ.”
16 เฆ แฮะ แวน โตต ดอน โมยว ดารา เฌาพรา อี มูห เฌาพรา ปี กรึบ เฆ. เฆ วี โบง อารึบ มามัก อา โดว บอ กันทอน ปี กรึบ อี นาง กานัม เอซูรา. เฆ โบง บอ โฮว เฌา บาลัะ, วี กรึบ ดอน โมยว ฌึร ตี. 17 เฆ วี ดึห ฆอน อีบึณ ฆอน อีมาย เฆ, แตห เฆ วี แบน ปี ดี หลู อี โดะ ดี เงา. เฆ วี โทม โดบ ปี ต็อห ดา บู มืง บอ เฆ ดูอี อี นับ ดี โบง มยัะหลัยะ. เฆ วี โบง อี หมึอม กาอีห ปี ตู อึง เฌาพรา. ปี โบง เฆ, อึณ แตห เฆ ชึม, แตห เฌาพรา รู ดี เฆ.
18 โคว อัน ตี, เฌาพรา บอ รู กาเซา ดี เฆ ดูอี อีซาเรลัะ, บอ แวน โตต เฆ, อาว ฮู ยอด เฆ. อึณ บอ ฆีด มี เฆ ดูอี อายูดา, อี ซี โดบ เฌาพรา. 19 เฆ ดูอี อายูดา มืร ตู โดบ ซีคยา ดารา เฌาพรา. บอ เฆ วี โดบ ปี โบง เฆ ดูอี อีซาเรลัะ ตึอน. 20 เฌาพรา บอ แวน โตต ครึร ดูอี อีซาเรลัะ, วี แตห เฆ กาดูห ดูก ดอน โมยว, บอ แตห อี ตัห เหมต เฆ. แฮะ ฮอต, เฌาพรา บอ ซูต เตา เฆ, อาว ฮู ยอด เฆ.
21 ดอ กาย็อห เฌาพรา ดูอี อีซาเรลัะ ดี อาดาวีด, เฆ วี แตห อาเยโรวโบว อี มูห ฆอน อาเนบัด ตึอน แบน คูนดีคัม เฆ. อัน แยะ แฮะ กาซูห ดูอี อีซาเรลัะ, แกวะ แตห เฆ โดบ เฌาพรา, แตห เฆ วี โบง หมาบ กืน กาเซา. 22 ปัน ตี ดูอี อาโมยว อีซาเรลัะ วี โบง ฮาว หมาบ ตี, โดบ ปี โบง อาเยโรวโบว, ตู แวน หมาบ ปี โบง เฆ. 23 เฆ โบง ปาย ตี แตห เฌาพรา กอ แวน เฆ ดูอี อีซาเรลัะ, แกวะ แตห อัน ยึร เฆ. ปาย ตี อึณ แบน ปี ดึอม ต็อห เฌาพรา ดี ดูอี บยาน โฆรห อัน แบน วี แบน วี. ดูอี อีซาเรลัะ, เฆ มืร ฮู ปึอน ดี กอย แคง มืง โดง กอย บรีม เฆ. เฆ กอ กาดูห ดี ฮาว แบน หมาย ดูอี อาซูรา กอ ฌัม อาตึร นี.
24 คูนดีคัม อี อึบ มืง อาซูรา บอ ดึห ดูอี แคง มืง บาแบ, มืง ฆูซัะ, มืง อาวา, มืง ฮามาด บอ มืง เซพาอีม, แตห เฆ ฮาว กอย แคง มืง ซามารี, แตห เฆ วี กาดาง ดูอี อีซาเรลัะ. เฆ ดูอี ดอน มืง ตึอน แตห มืง ซามารี วี แบน มืง เฆ, แตห เฆ กอย ดอน นา ดอน โปละ. 25 ดอ โฆว ตัห กอย เฆ ดอน นา ดอน โปละ, เฆ ตู กรึบ เฌาพรา. โคว, เฌาพรา บอ แตห มาครังซี ตัห ก็อะ ยัม เฆ มัง อี. 26 เฆ มัง อี วี กาลาง ลอง อัน ตี ดี คูนดีคัม อาซูรา ต็อห, “แม แฮะ แตห ดูอี ดอน ครึร ดอน โมยว ตัห กอย แคง เรา แคง มืง ซามารี ตึอน. เฆ ยี ตู นับ ดี กรึบ เฌา อี บัร มืง ตี. อัน เฌา ตี แฮะ แตห มาครังซี ตัห ก็อะ ยัม เฆ มัง อี โกบ ตู นับ เฆ ดี กรึบ อัน เฌา อี บัร มืง ตี.”
27 ปัน ตี คูนดีคัม อี อึบ มืง อาซูรา วี ต็อห, “แตห เบ ฮาว แดะ ดูอี หลู ดี เฌาพรา แปะ แฮะ เหมต เบ แคง มืง ซามารี อู วี, แตห อัน วี เวณ กอย แคง มืง บรีม อัน, แตห อัน วี มาโนว เบ ปี ดี ปาย เบ ดี กรึบ เฌาพรา อี บัร มืง ตี.” 28 ปาย ตี ดา อี หลู ดี เฌาพรา แปะ แฮะ เหมต ฮาว เฆ ดี มืง ซามารี ตึอน, อู วี บอ วี ตัห กอย ดี มืง เบดาเอน, วี มาโนว แตห เฆ นับ ปี ดี ปาย ดี กรึบ เฆ เฌาพรา.
29 เฆ ดูอี โมยว เหมา โมยว อัน, เฆ บอ โบง อารึบ ปี กรึบ เฆ, เบลห แคง มืง แบน มืง โดง ตัห กอย เฆ. เฆ บอ เบลห อารึบ ราง เฆ ตี ดี โดง จา แปะ แฮะ ดึอม โบง เฆ ดูอี ซามารี ตึอน. 30 เฆ ดูอี อี ตัห กอย มืง บาแบ, เฆ บอ โบง ดี กรึบ นาง กานัม อี จืร ซูคูดเบนูด. อี มูห ดูอี ฆูซัะ, เฆ โบง อารึบ ราง เฌา อาเนลัะ. อี มูห ดูอี มืง ฮามาด, เฆ โบง ดี กรึบ เฌา อาซีมัะ. 31 เฆ ดูอี อาวา, เฆ วี โบง ดี กรึบ เฌา อานีบัะฮาจัะ บอ เฌา อาดาตาก. อี มูห ดูอี มืง เซพาอีม เฆ ดึห ฆอน เฆ, โดะ แคง เงา, วี หลู ดี เฌา อาตารัมมาเลก บอ ดี เฌา อานัมแมเลก. เฆ ต็อห, อึณ มูห เฌาพรา อี บัร มืง เซพาอีม ตึอน. 32 อี มูห เฌาพรา อาคาคัร มืร เฆ โรวเซ. เฆ ยี กรึบ บอ เฌา ปี กรึบ เฆ. เฆ วี ดึห ดูอี กาแต เฆ, แตห เฆ วี แบน ดา อี หลู ดี เฌา ปี กรึบ เฆ, แตห เฆ หลู ปี ดี หลู เฆ ดี กาโช็ง จา ตึอน. 33 ปาย ตี เฆ โบง อา โมยว. เฌาพรา มืร, เฆ กรึบ. บอ เฌา อารึบ ปี ดึอม กรึบ เฆ แคง มืง บรีม เฆ, เฆ ตู แวน.
34 เฆ วี โดบ ฮีด ทูงฆยาม เฆ อาต นี, กอ ฌัม ดอ ตี นี. เฆ ตู กรึบ เฌาพรา, ตู โดบ ดารา ปี ดัม อูน เฌาพรา ดี เฆ, อี มูห ดารา ปี กาลาง อัน ดี หลูกหลาน อาโกบ อี มูห ดูอี อีซาเรลัะ ตึอน. 35 เฆ ดูอี อีซาเรลัะ ยี มูห อาโมยว แปะ แฮะ ดัว เฌาพรา กาดีก ซัดฌา ต็อห, “เบ แกวะ กรึบ เฌา ปอ อู กาดัง. อาว โลว มูด ฆึบ, อาว โลว โดบ, อาว โลว หลู ปี ดี หลู. 36 แตห เบ กรึบ ฆึบ บอ หลู มี ดี เฌาพรา อี มึห ปวน ตาง, อี แฮะ ดึห เลห เบ แคง มืง แอฆึบ ตึอน. 37 แตห เบ โดบ เซเซ มี ดารา อี มูห ดารา แปะ แฮะ ดัม อูน เฌาพรา ดี เบ, แปะ แฮะ แดม อูน อัน ดัว ดี เบ. อาว โลว โรวเซ กรึบ เฌา แบน กาดัง แบน กาดัง. 38 เบ แกวะ ปีว กาดีก ซัดฌา แปะ แฮะ ดัว โอว ดี เบ ตี. เบ แกวะ กรึบ เฌา แบน กาดัง แบน กาดัง. 39 แตห เบ กรึบ มี เฌาพรา, อี มูห เฌาพรา ปี กรึบ เบ. อัน มูห อัน เฌา อี จอย เบ ลอด รันซู เบ ดอน โมยว.”