คาน 16
ลอง คูนดีคัม อาคาด อึบ มืง ยูดา
1 คูนดีคัม อาเบคา อี มูห ฆอน อาเรมาลี แฮะ อึบ มืง อีซาเรลัะ อาดา ฆึร ดี บู ซีนัม. ดอ อัน ตี อาคาด อี มูห ฆอน อาโยวทาม วี แบน คูนดีคัม แคง มืง ยูดา. 2 ดอ แบน อัน คูนดีคัม, อาซาก อัน แฮะ โนะ อา ฆึร ซีนัม. อัน บอ อึบ บึง มืง, กอย แคง มืง เยรูซาแลม อาดา ฆึร ดี เดา ซีนัม. อัน ยี ตู โบง นา บอด นา หมึอม ปี อึง เฌาพรา ปี กรึบ อัน. อาว ปี ดา ดา อัน อี จืร อาดาวีด ตึอน. 3 อัน โบง โดบ ทูงฆยาม เฆ ดูอี แปะ แฮะ ดึอม ณอน แวน เฌาพรา อาต ลึบ ดูอี อีซาเรลัะ แคง มืง ตี. อัน โบง อี หมึอม กาอีห ปี แปะ แฮะ โบง เฆ ดูอี อี ตู หณึม เฌาพรา. อัน บอ ดึห ฆอน อีมาย อัน แตห อัน แบน ปี หลู อี โดะ ดี เงา.
4 อัน บอ หลู ปี หลู อี โดะ ดี เงา บอ ปี หลู อี อูห หงูน ดี โดง จา ดอน โปละ บอ แดง นอน ดอน นอน บอ ดี ดัง เฮ ตาง ดอน กาดัง.
5 ดอ อัน ตี อึณ มูห คูนดีคัม อาเรซีน อี อึบ มืง อาราม บอ คูนดีคัม อาเบคา อี มูห ฆอน อาเรมาลี อี อึบ มืง อีซาเรลัะ ตึอน ฆาย บอ ตัห ต็อห ดี กาโฆห ดี มืง เยรูซาแลม. ฆาย ตัห โรบ มืง เยรูซาแลม โดง กอย คูนดีคัม อาคาด ตึอน. มาแล, ฆาย ตู แป อัน. 6 ปัน ตี คูนดีคัม อาเรซีน อี อึบ มืง อาราม ตึอน, อัน บอ วี ดึห วีว มืง เอลาด, แตห อึณ วี แบน มืง อัน. อัน บอ ซูต เตา ดูอี อายูดา เฆ อี กอย มืง เอลาด ตี. ดูอี อาราม บอ วี ตัห กอย มืง เอลาด ตี กอ ฌัม อาตึร นี.
7 คูนดีคัม อาคาด ตึอน บอ จัร ดาลาม อัน ฮาว โดง กอย อาตีกาลาดบีเลซา อี มูห คูนดีคัม แคง มืง อาซูรา ต็อห, “โอว มูห แดเจณ แม อี ฮับ จึง ดี แม. โอว หมาณ, แตห แม ตัห จอย โอว, แตห โอว แป คูนดีคัม อาราม ฆาย คูนดีคัม อีซาเรลัะ. ฆาย แฮะ ตัห แบน รันซู โอว, ต็อห ดี กาโฆห ดี โอว.” 8 อาคาด บอ ดึห รึอน เฆ ครีว อี กอย แคง โฮว เฌาพรา บอ แคง โฮว อัน, ดัว ฮาว ดี คูนดีคัม อาซูรา, แตห อึณ แบน ลักซอง อัน. 9 คูนดีคัม อาซูรา บอ โทม โฆรห อาคาด ตึอน. อัน บอ ตัห กาโฆห ดี มืง ดามาคู บอ แป มืง ตี. อัน บอ ดึห ดูอี มืง ดามาคู ตี, แตห เฆ กาโทะ กอย ดี มืง กีรัะ. อัน บอ ง็อห ยัม คูนดีคัม อาเรซีน.
10 คูนดีคัม อาคาด บอ วี ฮาว ดี มืง ดามาคู, ฮาว แล ดี คูนดีคัม อาซูรา อี จืร อาตีกาลาดบีเลซา ตึอน. อัน บอ ยึร กาโช็ง หลู เฆ ดี มืง ตี. อัน บอ หมาย ปี ปาย อารึบ ราง กาโช็ง ตี. อัน บอ เฆา ปี ปาย อี ดี โบง, ปี ปาย อี ดี รัณ. อัน บอ วี ตึย ดี อาอูรียา อี มูห ดา อี หลู ดี เฌาพรา แคง มืง เยรูซาแลม. 11 อาอูรียา บอ โบง กาโช็ง หลู ตี, แตห อึณ ปี ปี กาลาง ตัห คูนดีคัม อาคาด ตึอน ดอน โมยว. อัน แฮะ ฮอต โบง อาต ตัห ฌัม คูนดีคัม อาคาด ดี มืง เยรูซาแลม. 12 ดอ วี ตัห ฌัม คูนดีคัม อาคาด อัน บอ ตัห ยึร กาโช็ง ตี. อัน บอ หลู ปี หลู อัน แดง กาโช็ง ตี. 13 อัน บอ ดึห ปี หลู อี โดะ ดี เงา, ปี หลู กาแปะ เฆ ดีฆาว บอ ปี หลู ปี ดี เดียง ปี ดี โลว โหลว. อัน บอ หลู ปี ดี หลู อี กอย กาฌูะ โฮม รึม, ดึห บอ หนาม กาเทต ดี กาโช็ง ตี. 14 อี มูห กาโช็ง บ็อง อี กอย นา อาต โฮว เฌาพรา, อัน บอ วี กาโทะ ฮาว อูน นา กัว กาโช็ง กามาย ตึอน.
15 แฮะ ฮอต, คูนดีคัม อาคาด บอ วี กาลาง ดี ดา อี หลู ดี เฌาพรา อี จืร อาอูรียา ต็อห, “กาโช็ง หลู โบ็ง ตาง อี กามาย, แตห แม หลู ปี หลู อี โดะ ดี เงา, บอ ปี หลู กาแปะ เฆ ดีฆาว บา ดี อับ บอ ปี ดี หลู คูนดีคัม อี โดะ ดี เงา บอ ปี หลู อัน อี มูห กาแปะ เฆ ดีฆาว บอ ปี หลู ดูอี บอ เรา บอ กาง บอ โกรว ปี หลู เฆ อี มูห กาแปะ เฆ ดีฆาว ตึอน, แตห เฆ บอกาเฆลียด ดึห ตัห โดะ ดี เงา แดง กาโช็ง โบ็ง นี. บอ หนาม ปี ดี หลู ดอน โมยว มืร ดึห คร็อห แดง กาโช็ง โบ็ง ตี. อี มูห กาโช็ง บ็อง อี บรีม, แตห อึณ แบน กาโช็ง โดง ดี ดีหมอด โอว เฌาพรา.” 16 ดา อี หลู ดี เฌาพรา อี จืร อาอูรียา บอ โบง โดบ ปี ต็อห คูนดีคัม อาคาด ตี.
17 คูนดีคัม อาคาด บอ ดึห แวน บลัะ เฆ บาง เบรต อี ดึก ดี กาโช็ง อึณปาน อึม ตึอน. อัน บอ ดึห แวน บอ อึณปาน อี กอย แดง กาโช็ง ตึอน. อัน บอ ดึห เลห อึณปาน ตาง อี กอย แดง อารึบ มามัก บ็อง ตึอน, วี เบลห อูน แดง มาว. 18 อี มูห ทึบ ปี โบง อูน เฆ แคง แวง โฮว เฌาพรา แตห อี กอย ซีแง ดีเหลา บอ โฮว อี กอย โดง ลึบ คูนดีคัม แคง โฮว เฌาพรา, อัน บอ ย็อห แวน แตห อึณ ล็อะ น็อห คูนดีคัม อาซูรา ตึอน.