คาน 15
ลอง คูนดีคัม อาฌารียา อึบ มืง ยูดา
1 คูนดีคัม อาเยโรวโบว บอ อึบ บึง มืง อีซาเรลัะ อาดา อา ฆึร ดี บู ซีนัม. ดอ อัน ตี อาฌารียา อี มูห ฆอน คูนดีคัม อามาฌียา อึบ มืง ยูดา ตึอน. อัน วี แบน คูนดีคัม ปลูะ ฆูณ อัน. 2 ดอ แบน อาฌารียา คูนดีคัม อาซาก อัน แฮะ ฆึร ดี เดา ซีนัม. อัน บอ อึบ บึง มืง ยูดา, กอย แคง มืง เยรูซาแลม อาดา พัน ฆึร ดี อา ซีนัม. มา อัน จืร นาง เยคอลี อี ดึอม กอย แคง มืง เยรูซาแลม เซเซ. 3 อาฌารียา ตึอน โบง นา บอด นา หมึอม ปี อึง เฌาพรา. อัน โบง โดบ ปี ปาย ฆูณ อัน อี จืร อามาฌียา ตึอน. 4 อัน ยี ตู ปยาต แวน โดง จา ตึอน. ดูอี เฆ ซี หลู ปี หลู เฆ อี โดะ ดี เงา บอ อี อูห หงูน ดี ตี.
5 เฌาพรา บอ แตห คูนดีคัม อาฌารียา ตี มึห เซา ดูะ กอ ฌัม ปัน กัด ยัม อัน. อัน แฮะ กอย แคง โฮว ปอ อู โปละ. ฆอน อีมาย อัน อี จืร อาโยวทาม บอ วี กาดาง อัน, แบน อี อึบ แคง โฮว คูนดีคัม บอ อึบ ดูอี อี กอย แคง มาน มืง ตึอน. 6 ลอง แปะ แฮะ โบง อาฌารียา อี หณัม ดึอม กาลาง, เฆ แฮะ แดม อูน แคง บับ คูนดีคัม ยูดา. 7 อาฌารียา ตึอน บอ ยัม, เฆ บอ ดีบ อัน แคง มืง อาดาวีด โดบ ดา ดา อัน. ฆอน อีมาย อัน อี จืร อาโยวทาม บอ วี ปลูะ อัน แบน คูนดีคัม.
ลอง คูนดีคัม อาซาคารา อึบ มืง อีซาเรลัะ
8 อาฌารียา แฮะ แบน คูนดีคัม อี อึบ มืง ยูดา อาดา โอย ฆึร ดี ดา ซีนัม. ดอ อัน ตี อาซาคารา อี มูห ฆอน อาเยโรวโบว บอ วี อึบ บึง มืง อีซาเรลัะ, กอย แคง มืง ซามารี อาดา เดา มาเฆียน. 9 อาซาคารา ตึอน ยี โบง ปี ตู อึง เฌาพรา, โบง ปี ปี ดึอม โบง ดา อัน อี จืร อาเยโรวโบว, อี มูห ฆอน อาเนบัด ตึอน. อัน โบง โดบ บอ แปะ แฮะ กาซูห ดา อัน แตห เฆ ดูอี อีซาเรลัะ โบง.
10 อึณ ยี มูห อาซาโลม อี มูห ฆอน อายาเบด, อัน บอ วี คราม ดี บลัวะ แวน อาซาคารา. อัน บอ วี ง็อห ยัม อาซาคารา ดี อาต ดูอี กืน. แฮะ ฮอต, อัน บอ วี แบน คูนดีคัม. 11 ลอง แปะ แฮะ โบง อาซาคารา ตึอน, แฮะ แดม อูน แคง บับ คูนดีคัม ดูอี อีซาเรลัะ.
12 ปาย ตี อึณ บอ แบน ปี ดึอม กาลาง เฌาพรา ดี อาเยฮู ดอ ต็อห อัน, “หลูกหลาน แม ดี ปึอน ดี อึบ มืง อีซาเรลัะ อาดา พวน โจว.”
13 อาอูฌียา แฮะ อึบ มืง ยูดา อาดา โอย ฆึร ดี ดีม ซีนัม, อาซาโลม อี มูห ฆอน อายาเบด, อัน บอ วี แบน คูนดีคัม แคง มืง ซามารี. อัน อึบ มืง อาดา อู มาเฆียน. 14 ปัน ตี อึณ มูห อาเมนาแฮม อี มูห ฆอน อากาตี. อัน บอ ตัห ดี มืง ดีราจา, ตัห ฌัม ดี มืง ซามารี บอ ง็อห ยัม อาซาโลม อี มูห ฆอน อายาเบด. อัน บอ วี แบน คูนดีคัม กาดาง อาซาโลม ตึอน.
15 ลอง แปะ แฮะ โบง อาซาโลม บอ ลอง แปะ แฮะ คราม อัน ดี บลัวะ แวน อาซาคารา, อึณ แฮะ แดม อูน แคง บับ คูนดีคัม อีซาเรลัะ.
16 ดอ อัน ตี อาเมนาแฮม บอ เลห แคง มืง ดีราจา, ฮาว กาโฆห บอ ปยาต มืง ทีพาซา บอ ดูอี อี กอย แคง มืง ตี โกบ ตู วึห เฆ มาโลห มืง, แตห อัน ลึบ. อัน บอ เปรห บอ วัต เฆ ยา ตู อัห ดอน อี แคง มืง ตี.
ลอง คูนดีคัม อาเมนาแฮม อึบ มืง อีซาเรลัะ
17 อาฌารียา อี มูห คูนดีคัม ยูดา ตึอน บอ อึบ มืง อาดา โอย ฆึร ดี ดีม ซีนัม. ดอ อัน ตี อาเมนาแฮม อี มูห ฆอน อากาตี บอ วี แบน คูนดีคัม อึบ บึง มืง อีซาเรลัะ, อึบ กอย แคง มืง ซามารี อาดา ฆึร ซีนัม. 18 อัน ยี โบง ปี ตู อึง เฌาพรา. อัน ตู แวน หมาบ ปี ดึอม โบง อาเยโรวโบว อี มูห ฆอน อาเนบัด บอ แปะ แฮะ กาซูห อัน ดูอี อีซาเรลัะ โบง.
19 ดอ อัน ตี คูนดีคัม อาบูลา อี อึบ มืง อาซูรา, อัน บอ วี ตัห กาโฆห ดี มืง อีซาเรลัะ. อาเมนาแฮม บอ กาดูห ดี ดัว รึอน อู แหรณ ทาเลน ดี อัน.a 20 อาเมนาแฮม บอ กาดูห ดี แฆบ รึอน ดี เฆ ดูอี อีซาเรลัะ. ดูอี ครัม ดอน อี โลว ดัว รึอน แณต อู วี พัน ฆึร โบ็ง, แตห เฆ ปึอน ดี ดัว ดี คูนดีคัม แคง มืง ตึอน. ปัน ตี คูนดีคัม แคง มืง อาซูรา บอ วี วีว, อาว ฮู กาโฆห ดี มืง อีซาเรลัะ. 21 ลอง แปะ แฮะ โบง อาเมนาแฮม อี หณัม ดึอม กาลาง, แฮะ แดม อูน โตต ดอน โมยว แคง บับ คูนดีคัม อีซาเรลัะ. 22 อาเมนาแฮม บอ ยัม, เฆ บอ ดีบ อัน โดบ ดา ดา อัน. ฆอน อีมาย อัน อี จืร อาเบคาฮี บอ วี ปลูะ อัน, แบน คูนดีคัม.
ลอง คูนดีคัม อาเบคาฮี อึบ มืง อีซาเรลัะ
23 คูนดีคัม อาฌารียา อี มูห คูนดีคัม ดูอี อายูดา บอ อึบ มืง อาดา พัน ฆึร ซีนัม. ดอ อัน ตี อาเบคาฮี อี มูห ฆอน อาเมนาแฮม บอ วี อึบ บึง มืง อีซาเรลัะ, กอย แคง มืง ซามารี อาดา อา ซีนัม. 24 อาเบคาฮี ตึอน โบง ปี ตู อึง เฌาพรา. อัน ตู แวน หมาบ ปี ดึอม โบง อาเยโรวโบว อี มูห ฆอน อาเนบัด. อัน มืร ตู แวน หมาบ แปะ แฮะ กาซูห อัน เฆ ดูอี อีซาเรลัะ โบง. 25 อึณ บอ มูห อาเบคา อี มูห ฆอน อาเรมาลี อี มูห อามู อามาด อาเบคาฮี. อัน บอ วี คราม ดี บลัวะ แวน อาเบคาฮี. อัน บอ วี แดะ ดูอี อาฆีเลอาด พัน ฆึร วี ตัห ง็อห ยัม คูนดีคัม. อัน บอ ง็อห บอ อากอพัะ ฆาย อาเลฮัะ, อี กอย รึม โดบ คูนดีคัม แคง โฮว อัน แคง มืง ซามารี ตึอน. ปัน ตี อาเบคา บอ วี แบน คูนดีคัม.
26 ลอง แปะ แฮะ โบง อาเบคาฮี อี หณัม ดึอม กาลาง, อึณ แฮะ แดม อูน แคง บับ คูนดีคัม อีซาเรลัะ.
ลอง คูนดีคัม อาเบคา อึบ มืง อีซาเรลัะ
27 คูนดีคัม อาฌารียา อี มูห คูนดีคัม แคง มืง ยูดา บอ อึบ มืง อาดา พัน ฆึร ดี อา ซีนัม. ดอ อัน ตี อาเบคา อี มูห ฆอน อาเรมาลี บอ วี แบน คูนดีคัม อี อึบ บึง มืง อีซาเรลัะ บอ กอย แคง มืง ซามารี อาดา อา ฆึร ซีนัม. 28 อาเบคา ตึอน ยี โบง ปี ตู อึง เฌาพรา. อัน ตู แวน หมาบ ปี ดึอม โบง อาเยโรวโบว อี มูห ฆอน อาเนบัด ตึอน, บอ แปะ แฮะ กาซูห อัน ดูอี อีซาเรลัะ โบง.
29 ดอ มูห โจว คูนดีคัม อาเบคา ตี, คูนดีคัม อี อึบ มืง อาซูรา อี จืร อาตีกาลาดบีเลซา บอ ตัห กาโฆห รึบ มืง อีโยน, มืง เบนเบดมาคา, มืง ยานอ, มืง เกเดซัะ, มืง ฮาจอ, มืง ฆีเลอาด บอ มืง ฆาลีเล. อัน บอ ดึห ดูอี แคง มืง นาบทาลี บอ มืง, แตห เฆ ฮาว ฌัม แคง มืง อาราม. 30 อาโยวทาม อี มูห ฆอน อาอูฌียา บอ วี อึบ มืง ยูดา อาดา อา ฆึร ซีนัม. ดอ อัน ตี อาโฮวเซ อี มูห ฆอน อาเอลาฮา บอ วี คราม ดี บลัวะ แวน คูนดีคัม อาเบคา อี มูห ฆอน อาเรมาลี. อัน วี ง็อห ยัม อาเบคา, แตห อัน วี แบน คูนดีคัม.
31 ลอง แปะ แฮะ โบง อาเบคา อี หณัม ดึอม กาลาง แฮะ แดม อูน แคง บับ คูนดีคัม อีซาเรลัะ.
ลอง คูนดีคัม อาโยวทาม อึบ มืง ยูดา
32 คูนดีคัม อาเบคา อี มูห ฆอน คูนดีคัม อาเรมาลี อี อึบ มืง อีซาเรลัะ อัน บอ อึบ มืง อาดา อา ซีนัม. ดอ อัน ตี อาโยวทาม อี มูห ฆอน คูนดีคัม ยูดา อี จืร อาอูฌียา บอ วี อึบ มืง ยูดา.
33 ดอ แบน อาโยวทาม คูนดีคัม, อาซาก อัน แฮะ โนะ อา ฆึร ดี พัน ซีนัม. อัน บอ อึบ บึง มืง, กอย แคง มืง เยรูซาแลม อาดา ฆึร ดี เดา ซีนัม. มา อัน จืร นาง เยรูซา อี มูห ฆอน อาฌาโดก. 34 อัน โบง นา บอด นา หมึอม ปี อึง เฌาพรา. อัน โบง โดบ ปี ปาย ฆูณ อัน อี จืร อาอูฌียา ตึอน. 35 อัน ยี ตู ปยาต แวน โดง จา ตึอน. เฆ ดูอี ซี ปึอน ดี หลู ปี หลู เฆ อี โดะ ดี เงา บอ อี อูห หงูน ดี ตี. อัน บอ โบง มาโลห แคง โฮว เฌาพรา ตึอน.
36 ลอง แปะ แฮะ โบง อาโยวทาม อี หณัม ดึอม กาลาง, อึณ แฮะ แดม อูน แคง บับ คูนดีคัม ยูดา.
37 ดอ อัน ตี เฌาพรา บอ จัร อาเรซีน อี มูห คูนดีคัม อาราม บอ อาเบคา อี มูห ฆอน อาเรมาลี ตึอน, แตห ฆาย ฮาว จูห ดี กาโฆห ดี มืง ยูดา.
38 อาโยวทาม ตึอน บอ ยัม. เฆ บอ ฮาว ดีบ อัน โดบ ดา ดา อัน แคง มืง อาดาวีด ตึอน. ฆอน อีมาย อัน อี จืร อาคาด บอ วี ปลูะ อัน แบน คูนดีคัม.